Bwat. Kufanakesh ma maniskri makur kumekeshin anch uruu wa Bibil waswimpap ap anch aukopirila tupamp tuvud nakash pa yom yikata kusheshik.

 Antu ajingunina tunan twa ma maniskri makur ma Bibil. Mamwing mading makwet kushalijan kanang, chinech chimekeshin anch kwading yilim kanang yasalau mu kukopiril. Kushalijan kuvud kwinoku kud kwau kukemp ni kaswimpap kurumburik kwa mifund. Pakwez, kushalijan kumwing akujingunina, ni kushalijan kukwau kumekeshin anch akusala kwa kwisotin kud antu mulong wa kuswimp uruu wa Bibil. Shinshikin yilakej yaad ey:

1.   Mu 1 Yohan 5:7, ma Bibil mamwing makur makarumwin mazu minan anch: “mwiur, Tatuku, Dizu ni Spiritu Utumbila: awonsu asatu inay ad umwing.” Pakwez, ma maniskri makin mamekeshin anch mazu minam madingap kwau mu mifund ya kusambish. Amaweja kupwa kwa mivu. a Chawiy chisadina anch ma Bibil makin madiaku nlel madioshin mazu minam.

2.   Dijin dia Nzamb amwinend adifunda tupamp tunan mu ma maniskri makur ma Bibil. Pakwez, ma Bibil mavud maswinkesha dijin dined ni maz mud “Nsalej ap Nzamb.”

 Nlel unou, kud ma maniskri mavud nakash majinguninau ni chiswapel nakash kujingunin yilim kusutamu pakur. b Kufanakesh mikand yiney kumekeshin yom ik piur pa win kashinsh wa Bibil nlel?

•   Palondinay piur pa Mifund ya Hebereu (yitazukinau anch “Manswik Makur), mwin kwilej milong ya Bibil William Green walonda anch: “Tukutwish kulond nich kashinsh anch kwikil mukand ukwau wafundau pakur nakash watushikena nawamp nakash.”

•   Piur pa Mifund ya Grek ya win Kristu, yitazukinau anch “Manswik Masu,” mwin kwilej milong ya Bibil Frederick Bruce wafunda anch: “Uman umekeshina win kashinsh wa mifund yetu ya Manswik Masu ud ujim nakash kusutamu uman wa mikand yivud yafundau kud antu ijikena, ni kwikil muntu ukutwisha kutadik win kashinsh wa mifund yiney.”

•   Frederic Kenyon, muntu wijikena wileja nakash ma maniskri ma Bibil, walonda anch muntu ni muntu “ukutwish kumukwat Bibil mu chikas chend ni kulond pakad wom ap kwidjidjek anch ulamin chakin kamu Dizu diakin dia Nzamb, diatushikena pakad kuswimp kukash mu kusut kwa tunan ni tunan twa mivu.”

•   In Yuda pamwing nau in Kristu in kukopiril afunda jinsangu jilejena kurumbuk kujim kwasalau antu a Nzamb. c (Kuchind Michid 20:12; 2 Samwel 11:​2-4; Galatia 2:​11-​14) Chilik chimwing kand, achidija mifund yilejena patok mutapu waufishau nich muchid wa in Yuda mulong wa kubwambwil kwau ni yilejena mafundish mimedina pa yishankur ya antu. (Ozey 4:2; Malakiy 2:​8, 9; Mateu 23:​8, 9; 1 Yohan 5:21) Mu kukopiril jinsangu jinej nich win yakin, in kukopiril amekesha anch ad antu a kuchingejin ni akwet kalimish kakurikina mulong wa Dizu ditumbila dia Nzamb.

•   Ov, choviken kutong anch Nzamb wapepila Bibil ukutwish kand kuchidij win kashinsh wa uruu udiamu? d (Isay 40:8; 1 Pita 1:​24, 25) Chikwau kand, wasota anch etu niyetu nlel tutaninamu mu uruu winou, kadiap kwau ching antu a pasak. (1 Korint 10:11) Chawiy, “yom yawonsu yafundau pakur mu Mukand wa Nzamb ayifunda mulong wa kutulejan etu. Afunda mwamu chakwel tukujamish ni kukasikesh mulong wa ruchingej rezila mu Mukand wa Nzamb.”​—Rom 15:4.

•   Yesu nau in kwilejend ajimbulang yom yidia mu Mifund ya Hebereu pakad kumekesh anch ading iyikamishin piur pa win kashinsh wa mifund yiney yikur.​—Luka 4:​16-21; Midimu 17:​1-3.