Papela dzra ku sungula dzra Petro 2:1-25
2 Xileswo tsrhikani wubihi hinkwabyu, wukanganyisi, matsrhoho ni ku lumbeta ka mixaka hinkwayu.
2 Ku fana ni leswi swibebetana leswi swa ha ka ku pswaliwa swi ma djulaka ngopfu swinene mafi, na n’wine wu djulani ngopfu swinene ntiyiso wa zritu dzra Xikwembu Nkulukumba, akuva mi kota ku kula mi va mi huluxiwa; a zritu dzra Xikwembu Nkulukumba dzri fana ni leiti ledzri kalaka dzri nga patsriwanga ni ntxhumu.
3 Nakone mi nga swi yentxa leswo hikusa mi swi tiva ha hombe* leswaku a Hosi yi ni timpswalu.
4 A nkama lowu mi yaka kwake, yene zribye ledzri hanyaka ledzri dzreliwiki hi vhanu, kambe Xikwembu Nkulukumba a dzri hlawuliki nakone dzri hlawulekiki kwake,
5 na n’wine leswi mi nga mazribye lawa ma hanyaka mi le ku yakiweni mi va yindlu ya moya akuva mi va vaprista va ku xwenga, ku yentxela leswaku mi nyikela magandzrelo lama yamukelekaka ka Xikwembu Nkulukumba hi ku tizrisa Yesu Kriste.
6 Hikusa a Tsralwa dzri li: “Lavisa! A Siyoni ni beka zribye dzra lisima ledzri hlawuliwiki, ku nga zribye dzra lisima dzra masungulo ledzri hlawulekiki, nakone lweyi a kombisaka lipfumelo ka dzrone a nge ti txhuka a danisiwa.”
7 Kutani a hlawuleke kwenu, hikusa ma pfumela kwake; kambe ka lava va kalaka va nga pfumeli kwake, “a zribye ledzri vayaki va dzri bakanyiki, dzri ndzruluke zribye dzra lisima ku tlula hinkwawu”
8 ni “zribye ledzri taka wisa vhanu ni ledzri taka va kwatisa”. Va wa hi mhaka ya leswi va kalaka va nga dzri yingiseti zritu. Lebyo hi byo wugamu lebyi byi va yimeliki.
9 Kambe n’wine “mi lixaka ledzri hlawuliwiki, vaprista va le wuhosini, tiko ledzri xwengiki, ntlawa lowu hlawuleliwiki ku va vhanu va Xikwembu Nkulukumba, akuva mi twalisa matsrhamela ya ku hlawuleka* ya Lweyi a mi vitaniki mi suka munyameni mi ta livaningwini dzrake ledzri hlamalisaka.
10 Hikusa a mi nga li vhanu va Xikwembu Nkulukumba, kambe swoswi mi vhanu vake; Xikwembu Nkulukumba a a nga mi kombanga timpswalu, kambe swoswi a mi kombe tone.
11 Vazrandzriwa, na mi tsratsriya swanga vapfi ni vatsrhami va nkamanyana leswaku mi fambela kule ni ku navela ka nyama loku lwaka yimpi na n’wine.
12 Vanani ni mahanyela lamanene a xikazri ka vamatiko, akuva loko va mi lumbeta leswaku mi vayentxi va swa ku biha, va va timboni ta mintizro yenu leyinene, kutani va dzrumisa Xikwembu Nkulukumba hi siku dzrake dzra ku kambela.
13 Hi kola ka Hosi, tibekani hansi ka vafumi hinkwavu,* nambi ka hosi hikusa yi tlakukile ku mi tlula,
14 kumbe ka vagovhernadori hikusa va bekiwe akuva va khatisa lava yentxaka swa ku biha kambe va dzrumisa lava yentxaka leswinene.
15 Hikusa i ku zrandzra ka Xikwembu Nkulukumba leswaku hi mahanyela yenu lamanene mi miyeta* swiphunta leswi vulavulaka mintxhumu leyi kalaka yi nga pfuni ntxhumu.
16 Hanyani ku fana ni vhanu lava ntsrhunxekiki, kambe mi nga tizrisi ntsrhunxeko wenu akuva mi yentxa mintxhumu ya ku biha,* ku hambana ni leswo, hanyani swanga vhanu lava tizrelaka Xikwembu Nkulukumba.
17 Hloniphani vhanu va mixaka hinkwayu, mi zrandzra vamakwezru hinkwavu,* mi txhava Xikwembu Nkulukumba, mi hlonipha hosi.
18 A vatizri a va tibeki hansi ka vatholi vavu hi ku va komba xitxhavu hinkwaxu lexi xi va fanelaka, ku nga li ntsena vatholi lava nga vanene kumbe lava nabyalaka kambe ni lava swi kazrataka ku va nyonxisa.
19 Hikusa mhunu lweyi a tiyiselaka swikazratu* a tlhela a xaniseka na a nga na nandzru hi ku djula ku va ni lipfalu ledzri basiki awa yamukeleka ka Xikwembu Nkulukumba.
20 Hikusa swi pfuna yini ku va u tiyiselela ku biwa hi ku va u dohile? Kambe loko u tiyiselela ku xanisiwa hi mhaka ya ku va u yentxa mintxhumu leyinene, leswo swa yamukeleka ka Xikwembu Nkulukumba.
21 Nakunene mi vitaneliwe swoswo, hikusa nambi Kriste a xanisekele n’wine, a mi siyela xikombiso akuva mi landzrelelisisa leswi yene a swi yentxiki.*
22 A nga dohanga, nambi mazritu ya wukanganyisi a ma kumekanga a non’wini wake.
23 Loko a zruketeliwa yene a a nga va zruketeli. Loko a xanisiwa, a a nga va txhaviseli kambe a a swi tsrhikela Lweyi a yavanyisaka hi ku lulama.
24 A zrwale swidoho swezru nkama lowu mizri wake wu gongondzreliwiki* a mhandzrini,* akuva hi ntsrhunxiwa ka swidoho swezru* kutani hi hanyela ku yentxa leswi lulamiki. Nakone “mi hanyisiwe hi swilondzra swake”.
25 Hikusa a mi fana ni tihamba leti lahlekiki, kambe swoswi mi tlheliseliwe ka mubyisi tlhelo mulaviseli wa wutomi byenu.*
Tintlhamuxelo ta le hansi
^ Hi ku kongoma: “mi swi dzringile”. Kumbe: “mi swi vonile”.
^ Ku hlayiwa mintizro ni matsrhamela lamanene.
^ Kumbe: “wulawuli hinkwabyu”.
^ Hi ku kongoma: “mi pfala minomu ya”.
^ Kumbe: “swanga ntxhumu wa ku tiyimelela ha wone”.
^ Hi ku kongoma: “wumakwezru”.
^ Kumbe: “swivavu”.
^ Hi ku kongoma: “mi landzrelelisisa minkondzro yake”.
^ Hi ku kongoma: “a mizrini wake”.
^ Kumbe: “a nsinyeni”.
^ Kumbe: “hi heliseliwa swidoho swezru”.
^ Kumbe: “mahika yenu”.
