Papela dzra ku sungula dzra Petro 3:1-22
3 Hi lani ku fanaka, n’wine vasati, tibekani hansi ka vanuna venu, akuva loko ku ni lava va kalaka va nga dzri yingiseti zritu dzra Xikwembu Nkulukumba, va kokiwa hi mahanyela yenu ku nga li hi mazritu,
2 hi ku va va vona mahanyela yenu lamanene kun’we ni xitxhavu lexikulu.
3 A ku tixongisa kwenu ku nga vi ka le handle, leswi liki, ka ku luka misisi, ku yambala maworu kumbe timpahla ta ku dula,
4 kambe a ku ve ka le mbilwini loku kalaka ku nga boli. Xileswo yambalani ku zrula ni ku nabyala ku nga ku tixongisa loku nga ka lisima ngopfu swinene a mahlweni ka Xikwembu Nkulukumba.
5 Hikusa leyi hi yo ndlela leyi vavasati va ku dumbeka* va le minkameni ya khale lava a va dumba Xikwembu Nkulukumba a va tixongisa ha yone, hi ku tibeka hansi ka vanuna vavu,
6 ku fana na Sara lweyi a a yingiseta Abrahamu, a mu vitana hosi yake. Kutani mi nga fana na Sara* loko mi ya mahlweni mi yentxa leswinene mi nga txhavi ntxhumu.
7 Hi lani ku fanaka, n’wine vanuna, tamani mi tsrhama ni vasati venu hi ku ya hi wutivi.* Va kombani xitxhavu hikusa vavasati va fana ni swibya leswi kalaka swi nga tiyanga nakone na vone i vamadapfindla kun’we na n’wine va wutomi lebyi kumiwaka hi kola ka timpswalu letikulu ta Xikwembu Nkulukumba, akuva swikhongoto swenu swi nga siveliwi.
8 Hi wugamu, hinkwenu vanani ni mayanakanyela man’we,* mi twelana, mi zrandzrana,* mi kombana ntwelawusiwana, mi tlhela mi titsrongahata.
9 Mi nga tlheliseli wubihi hi wubihi kumbe xizruku hi xizruku. Ku hambana ni leswo, va yentxelani leswinene van’wana,* hikusa Xikwembu Nkulukumba a mi vitanele swoswo, akuva mi ta tovokisiwa.
10 Hikusa “mun’wana ni mun’wana lweyi a djulaka ku tikholisa hi wutomi ni ku hanya na a nyonxile, a fanela ku vonelela lidzrimi dzrake akuva dzri nga vulavuli swa ku biha, ni nomu wake akuva wu nga vulavuli mintxhumu ya wukanganyisi.
11 A a tsrhiki ku yentxa leswi bihiki a yentxa leswinene, a a djuleteli ku zrula a va a ku lwela.
12 Hikusa a matihlo ya Yehovha ma lavisa lava lulamiki nakone a tindleve take ta swi yingela swikombelo swavu, kambe Yehovha a lwisana* ni lava yentxaka leswi bihiki”.
13 Nakunene, i mani lweyi a nga kotaka ku mi vavisa loko mi hisekela ku yentxa leswinene?
14 Kambe ma nyonxa nambiloko mi xaniseka hi mhaka ya leswi mi lulamiki. Nambitanu, mi nga swi txhavi leswi va swi txhavaka,* nambi ku li ku kazrateka.
15 Kambe a timbilwini tenu xwengisani Kriste swanga Hosi, minkama hinkwayu mi lulamela ku hlamula mun’wana ni mun’wana lweyi a mi vutisaka hi ta dumbo dzrenu, kambe swi yentxani hi moya wa ku zrula ni hi xitxhavu lexikulu.
16 Vanani ni lipfalu ledzrinene, akuva nambiloko va mi hehla hi ndlela yini, lava va mi hehlaka va daniseka hi mhaka ya ku vona mahanyela yenu lamanene swanga valandzreli va Kriste.
17 Hikusa loko Xikwembu Nkulukumba a swi pfumelela leswaku mi xaniseka hi mhaka ya ku yentxa mintxhumu leyinene, swa yampswa ku tlula ku va mi xaniseka hi ku va mi yentxa mintxhumu ya ku biha.
18 Hikusa nambi Kriste mhunu lweyi a lulamiki, a fe kan’we swi helela kolanu, a fela swidoho swa vhanu lava kalaka va nga lulamanga, a yentxe leswo akuva a mi yisa ka Xikwembu Nkulukumba. A dlayiwe na a ni mizri wa nyama kambe a pfuxiwa na a ni mizri wa moya.
19 Kutani na a ni mizri wa moya a ye twalisa dzrungula dzra yavanyiso ka tintsrumi leti pfaleliwiki djele,
20 leti khale ti tsrhikiki ku yingiseta, nkama lowu Xikwembu Nkulukumba a a li ku lehiseni ka mbilu* a masikwini ya Nowa, na ngalawa yi li ku yakiweni, leyi ka yone ku hulukiki vhanu vatsrongo, ku nga 8 wa vhanu lava* huluxiwiki ka ndhambhi.
21 A babatiso ledzri fanisiwaka ni leswi, na dzrone dzra mi huluxa swoswi (dzrone a dzro susa nsila ya mizri, kambe i xikombelo xa lipfalu ledzri basiki a mahlweni ka Xikwembu Nkulukumba) hikusa mi ni lipfumelo ka Yesu Kriste lweyi a pfuxiwiki a ku feni.
22 Yene a le vokweni dzra xinene dzra Xikwembu Nkulukumba, hikusa a ye tilweni, nakone a tintsrumi, wulawuli ni mintamu swi bekiwe hansi kwake.
Tintlhamuxelo ta le hansi
^ Hi ku kongoma: “va ku xwenga”.
^ Hi ku kongoma: “mi vanake”.
^ Kumbe: “mi va nyika lisima; mi va twisisa”.
^ Kumbe: “pfumelelanani ka miyanakanyu yin’we”.
^ Kumbe: “mi kombana lizrandzru dzra wumakwezru”.
^ Hi ku kongoma: “va tovokisani”.
^ Kumbe: “a wuso byake byi lwisana”.
^ Kumbexana: “mi nga va txhavi loko va mi txhavisela”.
^ Hi ku kongoma: “na ku lehisa mbilu ka Xikwembu Nkulukumba ku li ku zrindzreni”.
^ Hi ku kongoma: “mahika lawa ma”.
