Papela dzra ku sungula dzra Petro 4:1-19
4 Leswi Kriste a xanisekiki nkama lowu na a li mhunu wa nyama, na n’wine tiyimiselani ku va ni mayanakanyela lama fanaka; hikusa mhunu lweyi a xanisekiki a tsrhike ku doha,
2 akuva nkama lowu a ha hanyaka swanga mhunu wa nyama a nga ha hanyeli ku yentxa ku zrandzra ka vhanu, kambe a hanyela ku yentxa ku zrandzra ka Xikwembu Nkulukumba.
3 Hikusa wu dzringanile nkama lowu mi wu hetiki na mi yentxa ku zrandzra ka vamatiko, lani a mi ni mahanyela ya ku biha,* ku navela loku ku kalaka ku nga lawuleki, ku popswa, minkhuvu leyi kalaka yi nga lawuleki,* ku tsrhamela ku nwa byala, ni ku gandzrela swithombe.
4 Va hlamala leswi mi kalaka mi nga ha hlengeli na vone ka mahanyela yavu ya ku nyenyentsa, xileswo va vulavula ku biha ha n’wine.
5 Kambe vhanu volavo va ta tihlamulela ka lweyi a lulameliki ku yavanyisa lava hanyaka ni lava fiki.
6 Nakunene hi leswo swi yentxiki leswaku madzrungula lamanene ma zrezreliwa ni lava va fiki, akuva nambiloko va yavanyisiwa hi ku ya hi leswi va langutekisaka xiswone hi ku ya hi langutela dzra vhanu, hi ku ya hi langutela dzra Xikwembu Nkulukumba va kota ku hanya hi ku kongomisiwa hi moya.
7 Kambe a wugamu bya mintxhumu hinkwayu byi le kusuhi. Xileswo vanani ni mayanakanyela lamanene, minkama hinkwayu mi tiyimisela ku khongota.*
8 Henhla ka hinkwaswu, zrandzrananani ngopfu swinene, hikusa a lizrandzru dzri funeketa swidoho swinyingi.
9 Kombanani malwandla na mi nga nguranguri.
10 Mun’wana ni mun’wana wenu a yamukele nyiko ya kukazri, xileswo a a yi tizriseli ku tizrela van’wana swanga mutizri* lwenene wa timpswalu letikulu ta Xikwembu Nkulukumba, leti kombisiwaka hi tindlela ta ku siyanasiyana.
11 Loko mhunu wa kukazri a vulavula, a a vulavule mazritu lama pfaka ka Xikwembu Nkulukumba; loko mhunu wa kukazri a tizrela, a a tiseketeli ka ntamu lowu Xikwembu Nkulukumba a wu nyikelaka; akuva ka mintxhumu hinkwayu Xikwembu Nkulukumba a dzrumisiwa hi ku tizrisa Yesu Kriste. A ku phatima ni ntamu i swake hi masiku ni masiku. Amen.
12 Vamakwezru lava zrandzrekaka, mi nga hlamali hi mindzringo leyikulu leyi mi kumanaka na yone ingiki hi loko ko va ntxhumu wa nyiwana lowu mi yentxekelaka.
13 Ku hambana ni leswo, yanani mahlweni mi nyonxa hi ku va mi kumana ni tinxanisa ta ku fana ni leti Kriste a kumaniki na tone, akuva ni loko ku pfuleteliwa ku phatima kwake, mi ta nyonxa mi tlhela mi nyonxisisa.
14 Ma nyonxa loko mi zrukiwa hi kola ka vito dzra Kriste, hikusa leswo swi kombisa leswaku mi ni ntamu lowu phatimaka, ku nga moya wa Xikwembu Nkulukumba.
15 Nambitanu, ku nga vi na mhunu kwenu lweyi a xanisiwaka hi ku va a li mudlayi, kumbe muyivi, kumbe muyentxi wa mintxhumu leyi bihiki, kumbe hi ku va a tinghenisa ka timhaka ta vhanu vambeni.
16 Kambe loko mhunu a xaniseka hi leswi a nga Mukriste, a nga dani, kambe a a tame a dzrumisa Xikwembu Nkulukumba hi ku hanya swanga mukriste.
17 Hikusa lowu i nkama lowu bekiwiki wa kuva a yavanyiso dzri sungula nakone dzri sungula hi yindlu ya Xikwembu Nkulukumba. Kutani loko dzri sungula ha hine, ku ta yentxeka yini hi lava va kalaka va nga ma yingiseti madzrungula lamanene ya Xikwembu Nkulukumba?
18 “Loko mhunu lweyi a lulamiki swi djula a tikazrata akuva Xikwembu Nkulukumba a mu huluxa, ku ta yentxeka yini hi lweyi a kalaka a nga mu txhavi Xikwembu Nkulukumba nakone a nga mudohi?”
19 Xileswo, lava va xanisiwaka hi leswi va yentxaka ku zrandzra ka Xikwembu Nkulukumba, a va tame va tinyikela* ka Mutumbuluxi lweyi a dumbekaka, na va yentxa leswinene.
Tintlhamuxelo ta le hansi
^ Kumbe: “mahanyela ya tingana”. Hi Xigriki: asélgeia. Vona Ntlhamuxelo Wa Mazritu.
^ Kumbe: “minkhuvu ya mpfilumpfilu”.
^ Kumbe: “tsrhamani na mi zrindzrile a mhakeni ya swikhongoto”.
^ Kumbe: “mulaviseli”.
^ Kumbe: “nyikela mahika yavu”.
