Papela dzra ku sungula dzra Petro 5:1-14
5 Xileswo, swanga nkulukulobye tlhelo mhunu lweyi a voniki tinxanisa ta Kriste nakone a taka yamukela kun’we na n’wine a ku phatima loku taka pfuleteliwa, a xitsratsriyo lexi ni xi nyikaka vakulu lava nga makazri kwenu hi lexi:
2 Byisani ntlhambi wa Xikwembu Nkulukumba lowu mi tamelisiwiki wone, mi wu vonelela ha hombe* ku nga li hi ku sindzriseka, kambe hi ku swi zrandzra, swanga vatizreli va Xikwembu Nkulukumba; mi nga yentxi leswo hi ku djula ku kuma swa kukazri, kambe swi yentxani hi ku zrandzra ku tizrela van’wana;
3 mi nga va bindzriseli lava va nga pfindla dzra Xikwembu Nkulukumba, kambe vanani xikombiso ka ntlhambi.
4 Kutani loko mubyisi lwenkulu a humelela, mi ta yamukela ngiyana ya ku phatima leyi kalaka yi nga honeki.
5 Hi lani ku fanaka, n’wine madjaha, tibekani hansi ka vavanuna lava kuliki.* Kambe mun’wana ni mun’wana a a titsrongahati ka mun’wana,* hikusa Xikwembu Nkulukumba awa ku nyenya ku tikulisa, kambe lava va titsrongahataka a va nyika timpswalu letikulu.
6 Kutani titsrongahatani ka voko dzra ntamu dzra Xikwembu Nkulukumba, akuva a ta mi tlakuxa hi nkama wa kone,
7 na mi txukumetela kwake ku hlatiyela kwenu hinkwaku,* hikusa awa zron’weka ha n’wine.
8 Tlhazrihani, mi tivonela! A nala wenu Diyavulosi a fambafamba ku fana ni nghonyama* leyi bongaka, yi djula wa ku mu hahlulela.
9 Kambe mu kanetani hi lipfumelo ledzri tiyiki, na mi tiva leswaku vamakwenu a misaveni hinkwayu va kumana ni tinxanisa leti fanaka.
10 Kambe ntsrhaku ka loko mi xanisekenyana, Xikwembu Nkulukumba lweyi a taliki hi timpswalu letikulu, lweyi a mi vitaneliki a ku phatimeni kwake loku nga helikiki hi ku tizrisa Kriste, yene ha wuswake a ta mi dondzrisa hi lani ku heleliki. A ta mi tiyisa, a ta mi pfuna kuva mi tama mi dumbeka, a tlhela a mi beka ka masungulo lama tiyiki.
11 A ntamu i wake hi lani ku nga helikiki. Amen.
12 Hi ku tizrisa Silvhanu* lweyi ni mu tekaka a li makwezru lweyi a dumbekaka, ni mi tsralele mazritunyana matsrongo akuva ni mi tiyisa ni ku mi tiyisekisa leswaku leti hi tone timpswalu ta ntiyiso ta Xikwembu Nkulukumba. Khomani swi tiya ka tone.
13 Makwezru wa xisati lweyi a nga le Babilona lweyi a nga muhlawuliwa ku fana na n’wine, awa mi dzrungula, na yene n’wananga Marka awa mi dzrungula.
14 Losananani hi ku n’quntana,* mi kombisa lizrandzru dzrenu.
Ingiki hinkwenu n’wine mi nga vadondzrisiwa va Kriste mi nga va ni ku zrula.
Tintlhamuxelo ta le hansi
^ Kumbe: “mi wu lavisela”.
^ Kumbe: “vakulu”.
^ Kumbe: “a a yambali ku titsrongahata ingiki hi loko ku li mpahla; a a tikhami”.
^ Kumbe: “mivilelo yenu hinkwayu; swikazratu swenu hinkwaswu”.
^ Kumbe: “ndzrawu”.
^ Lweyi a tlhelaka a vitaniwa Silasi.
^ Hi ku kongoma: “hi ku n’qunta ka lizrandzru”.
