Papela dzra ku sungula ledzri yaka ka Timotewu 2:1-15
2 Xa ku sungula, ni tsratsriya leswaku ku hambiwa swikhongoto, swikhongoto swa ku kombela mpfunu wa Xikwembu Nkulukumba ni swa ku tlangela, swi hambeliwa vhanu va tinxaka hinkwatu,
2 tihosi ni vafumi hinkwavu,* akuva hi ta ya mahlweni hi hanya hi ku zrula ni ku dumbeka ka Xikwembu Nkulukumba hi ku helela, hi tlhela hi yentxa hinkwaswu hi mbilu hinkwayu.
3 Leswi i swinene nakone swa yamukeleka a mahlweni ka Xikwembu Nkulukumba Muhuluxi wezru,
4 lweyi a ku zrandzra kwake ku nga kuva vhanu va tinxaka hinkwatu va huluxiwa va tlhela va wu tiva ha hombe ntiyiso.
5 Hikusa ko va ni Xikwembu Nkulukumba mun’we ni mhunu mun’we lweyi a tlhanganisaka Xikwembu Nkulukumba ni vhanu, ku nga Kriste Yesu,
6 lweyi a tinyikeliki swanga xitizrulo lexi yanelaka xa vhanu hinkwavu.* A mhaka leyi vhanu va ta vulavula ha yone loko nkama wa yone wu tlhasa.
7 Ni bekiwe akuva ni va muzrezri ni mupostola leswaku ni ta nyikela wumboni bya mhaka leyi, ni hlaya ntiyiso a ni hembi, ni bekiwe ku va mudondzrisi wa vamatiko, ni va dondzrisa mayelanu ni lipfumelo ni ntiyiso.
8 Xileswo ni navela leswaku a mimbangwini hinkwayu vavanuna va ya mahlweni va khongota, nakone va fanela ku yentxa leswo na va ni timbilu leti basiki, na va nga hlundzrukanga nakone va nga kanetani.
9 Hi ndlela leyi fanaka, vavasati va fanela ku tixongisa hi mpahla leyi fanelekaka,* hi ku dzringanisela ni hi mayanakanyela lamanene,* ku nga li hi switayela swa malukela ya misisi,* woru, maperola kumbe timpahla ta ku dula,
10 kambe hi ndlela leyi fanelekaka ka vavasati lava txhavaka Xikwembu Nkulukumba, leswi liki, va fanela ku tixongisa hi ku yentxa mintizro leyinene.
11 Wansati a a dondzri na a miyelile* hi ku tibeka hansi hi ku helela.
12 A ni swi pfumeleli kuva wansati a dondzrisa kumbe ku lawula wanuna, kambe a a miyeli.*
13 Hikusa ku zrange ku vumbiwa Adamu, ku gama ku landzrela Evha.
14 Handle ka leswo, Adamu a hi yene a kanganyisiwiki kambe i wansati lweyi a kanganyisiwiki a va a ndzruluka mutluli wa nawu.
15 Nambitanu, a ta huluxiwa hi kuva a va mamana loko a* tama a tsrhama lipfumelweni, a lizrandzrwini, a va lweyi a xwengiki, a tlhela a va ni mayanakanyela lamanene.*
Tintlhamuxelo ta le hansi
^ Kumbe: “lava nga ka swiyimu leswi tlakukiki swa wulawuli”.
^ Kumbe: “vhanu va tinxaka hinkwatu”.
^ Kumbe: “leyi hloniphekaka”.
^ Kumbe: “hi wutlhazri”.
^ Ku hlayiwa ku luka misisi hi ndlela leyi kalaka yi nga hlonipheki.
^ Kumbe: “na a zrulile”.
^ Kumbe: “a a zruli”.
^ Hi ku kongoma: “va”.
^ Kumbe: “wutlhazri”.
