Papela dzra ku sungula ledzri yaka ka Timotewu 3:1-16
3 A mhaka leyi ya dumbeka: Loko mhunu a lwela ku va mulaviseli, a navela ntizro lowunene.
2 A mulaviseli a fanela ku va lweyi a pfumalaka xisolo, a va nuna wa nsati mun’we, a yentxa mintxhumu hi ku dzringanisela, a va ni mayanakanyela lamanene,* a va lweyi a hlelekiki, a va ni malwandla, a fanekela ku dondzrisa,
3 a nga vi mpopswi, a nga vi wa madzolonga,* kambe a va lweyi a yanakanyelaka, a nga vi mhunu wa timholova, a nga vi lweyi a zrandzraka mali,
4 a va wanuna lweyi a wu zrangelaka hi ndlela leyinene ndangu wake, a va ni vana lava yingisetaka va tlhela va tikhoma hi ndlela leyinene
5 (hikusa loko mhunu a hluleka ku zrangela ndangu wake, a ta swi kotisa kuyini ku hlayisa bandla dzra Xikwembu Nkulukumba?),
6 a nga vi mhunu lweyi a ha ka ku va mupfumeli,* hikusa a nga txhuka a tikulisa kutani a kuma yavanyiso dzra ku fana ni ledzri kumiwiki hi Diyavulosi.
7 Handle ka leswo, a fanela ku va ni ndhuma leyinene* ka vhanu va le handle, akuva a nga soliwi hi vhanu, kutani a wela ntlhan’wini wa Diyavulosi.
8 Hi lani ku fanaka, a malandzra ya wutizreli ma fanela ku va lawa ma hloniphekaka, ma nga tizrisi mazritu ya wukanganyisi loko ma vulavula,* ma nga nwi ngopfu byala, ma nga djuli ku ganya hi ndlela ya wukanganyisi,
9 ma khomelela xihundla xa ku xwenga xa lipfumelo na ma ni lipfalu ledzri basiki.
10 Handle ka leswo, va fanela ku zranga hi ku kambeliwa ku vona loko va faneleka; kutani loko ku nga na lexi va soliwaka ha xone va nga tizra swanga malandzra ya wutizreli.
11 Vavasati na vone va fanela ku va lava hloniphekaka, va nga hlevi, va dzringanisela ka mintxhumu hinkwayu, va va lava dumbekaka ka mintxhumu hinkwayu.
12 A nandzra wa wutizreli a fanela ku va ni nsati mun’we, a zrangela vana ni ndangu wake hi ndlela leyinene.
13 Hikusa vavanuna lava tizraka mintizro yavu hi ndlela leyinene va tikumela vito ledzrinene nakone va nga vulavula na va ntsrhunxeki ngopfu swinene hi ta lipfumelo dzravu ka Kriste Yesu.
14 Ni ku tsralela mintxhumu leyi, nambileswi ni navelaka ku ku yendzrela ku nga li khale,
15 kambe ni swi yentxela kuva loko ni txhuka ni hlwela, u ta kota ku tiva ndlela leyi u fanelaka ku tikhoma ha yone swanga xizro xa ndangu wa Xikwembu Nkulukumba, ku nga bandla dzra Xikwembu Nkulukumba lweyi a hanyaka, nsika* tlhelo xiseketelo xa ntiyiso.
16 Nakunene a xihundla xa ku xwenga lexi fambisanaka ni ku tinyiketela ka Xikwembu Nkulukumba i xikulu, xone hi lexi: ‘A voniwe na a ni mizri wa nyama, a voniwe a li lweyi a lulamiki na a ni mizri wa moya, a humelele mahlweni ka tintsrumi, ku zrezriwe mayelanu na yene a xikazri ka matiko, vhanu a misaveni va mu kholwile, a yamukeliwe matilweni a va a dzrumisiwa.’
Tintlhamuxelo ta le hansi
^ Kumbe: “a va lweyi a tlhazrihiki”.
^ Kumbe: “a nga vi na xigongondzrwana”.
^ Hi ku kongoma: “a ha ka ku ndzruluka”.
^ Kumbe: “vito dzrinene”.
^ Hi ku kongoma: “ma nga vi na tindzrimi tibidzri”.
^ Kumbe: “pilari”.
