Papela dzra ku sungula ledzri yaka ka Timotewu 4:1-16
4 Nambitanu, a zritu ledzri huhuteliwiki dzri* swi khanyisa ha hombe leswaku a minkameni leyi taka van’we va ta hambuka a lipfumelweni, va yingiseta mazritu lama kanganyisanaka* lawa ma tikombaka ingiki ma pfa ka Xikwembu Nkulukumba, kun’we ni tidondzro ta mademona,
2 nakone va ta yingiseta wukanganyisi bya vhanu lava vulavulaka madzrimi, lava a mapfalu yavu ma tlanyaliki ingiki hi loko me hisiwa hi nsimbi ya ku hisa.
3 Va tsimbisa vhanu ku txhata, va tlhela va sivela vhanu ku da swakuda swa kukazri, kambe Xikwembu Nkulukumba a hambe swakuda leswo akuva lava nga ni lipfumelo hi kola ka wutivi lebyi nga byone bya ntiyiso, va kota ku swi da va tlhela va mu tlangela.
4 Hikusa hinkwaswu leswi Xikwembu Nkulukumba a swi tumbuluxiki i swinene, nakone a ku na lexi fanelaka ku dzreliwa loko a li leswaku xi yamukeliwe hi xikhongoto xa ku tlangela,
5 hikusa xi xwengisiwa hi zritu dzra Xikwembu Nkulukumba ni hi xikhongoto.
6 Loko u nyika vamakwezru xilayu lexi, u ta va mutizreli lwenene wa Kriste Yesu lweyi a wundliwiki hi mazritu ya lipfumelo ni hi dondzro leyinene leyi u yi landzrelelisaka hi ku dumbeka.
7 Kambe fambela kule ni swihitana swa madzrimi, swa ku fana ni leswi thiwaka hi vavasati lava duhwaliki. Hi tlhelo dzrin’wana, yentxa hinkwaswu leswi u nga swi kotaka* akuva u va ni ku tinyiketela ka Xikwembu Nkulukumba.
8 Hikusa ku tiwolola leswaku u tiyisa mizri swa pfuna kutsrongo, kambe a ku tinyiketela ka Xikwembu Nkulukumba swi pfuna ka hinkwaswu, hikusa swi tiselana matovoko swoswi ni le nkameni lowu taka.
9 A mhaka leyi ya dumbeka nakone yi fanela ku yamukeliwa hi ku helela.
10 Hi leswo swi hi yentxaka hi tizra hi nkhinkhi hi tlhela hi tikazrata hikusa hi dumba Xikwembu Nkulukumba lweyi a hanyaka, lweyi a nga Muhuluxi wa vhanu hinkwavu, ngopfungopfu lava dumbekaka.
11 Yana mahlweni u va nyika swileleto leswi ni ku va dondzrisa swone.
12 U nga tsrhiki mhunu a ku dzrela hi leswi u nga mumpshwa. A matsrhan’wini ya leswo, vana xikombiso lexinene ka lava dumbekaka, a mhakeni ya ku vulavula, mahanyela, lizrandzru, lipfumelo, ni ku basa.
13 Tama u tinyiketela ka ku dondzra a mahlweni ka vhanu, ka ku tsratsriya* ni ku dondzrisa, ku ya tlhasa loko ni ta.
14 U nga tlangi hi nyiko leyi u nga na yone, leyi u nyikiwiki yone hi ku tizrisa wuprofeta loko huvo ya vakulu yi ku tlhanteke mavoko.
15 Yanakanyisisa hi mintxhumu leyi; u womelela ka yone, akuva a nhluvuku waku wu ta voniwa ha hombe hi vhanu hinkwavu.
16 Tikazratele ku va xikombiso lexinene ni ku va mudondzrisi lwenene. Yana mahlweni u lwela ku yentxa mintxhumu leyi, hikusa hi ku yentxa leswo u ta tihuluxa wene kun’we ni lava ku yingisetaka.
Tintlhamuxelo ta le hansi
^ Hi ku kongoma: “a moya wa”.
^ Hi ku kongoma: “mimoya leyi kanganyisanaka”.
^ Hi ku kongoma: “tidondzrisi”.
^ Kumbe: “ka ku kutxa”.
