Papela dzra ku sungula ledzri yaka ka Timotewu 6:1-21
6 Lava va nga vatizri* a va hloniphi vatholi vavu hi timbilu tavu hinkwatu akuva ku nga txhuki ku vulavuliwa ku biha hi vito dzra Xikwembu Nkulukumba ni hi tidondzro take.
2 Handle ka leswo, lava va nga ni vatholi lava nga vapfumeli va nga va yeyisi hi leswi va nga vamakwezru. Ku hambana ni leswo, va fanela ku va tizrela hi nkhinkhi ngopfu swinene, hikusa lava pfunekaka hi ntizro wavu lowunene i vapfumelikulobye tlhelo vamakwavu lava zrandzrekaka.
Yana mahlweni u va dondzrisa mintxhumu leyi ni ku va tsratsriya leswaku va yi yentxa.
3 Loko mhunu wa kukazri a dondzrisa tidondzro ta madzrimi nakone a nga pfumelelani ni swileleto leswi pfunaka, leswi pfaka ka Hosi Yesu Kriste, a tlhela a nga pfumelelani ni dondzro leyi fambisanaka ni ku tinyiketela ka Xikwembu Nkulukumba,
4 mhunu lweyo a tikukumuxa ngopfu nakone a nga twisisi ntxhumu. O vabya hi ku phikisana ni ku lwa hi mazritu. Mintxhumu leyo yi pfuxa matsrhoho, timholova, swizruku ni ku pimiselana swa ku biha,
5 yi tlhela yi yentxa vhanu lava nga ni miyanakanyu leyi bihiki nakone va tsrhikiki ntiyiso va tsrhamela ku lwisana hi timhaka ta ku kala ti nga nyawuli, na va tibyela leswaku ku tinyiketela ka Xikwembu Nkulukumba i ndlela ya ku kota ku ganya.
6 I ntiyiso leswaku ha ganya ngopfu swinene, kambe ntsena loko hi tinyiketela ka Xikwembu Nkulukumba na hi yaneliseka hi leswi hi nga na swone.
7 Hikusa a hi buyanga ni ntxhumu a misaveni, ni loko hi fa a hi nge ti famba ni ntxhumu.
8 Xileswo, loko hi ni swakuda* ni swa ku yambala,* hi ta yaneliseka ha swone.
9 Kambe lava tiyimiseliki ku ganya va wela a ndzringweni, a ntlhan’wini ni ka ku navela kunyingi loku kalaka ku nga pfuni ntxhumu nakone ku vavisanaka, loku ku va vangelaka mahlomulo ni lifu.
10 Hikusa a ku zrandzra mali i limitsru dzra mintxhumu hinkwayu ya ku biha, futsrhi hi ku zrandzra mali van’we va hambukile a lipfumelweni nakone va tivangele swivavu swinyingi.*
11 Nambitanu, wene mhunu wa Xikwembu Nkulukumba, tsrutsruma mintxhumu leyi. Kambe lwela ku yentxa leswi lulamiki, u tinyiketela ka Xikwembu Nkulukumba, u va ni lipfumelo, lizrandzru, ku tiyisela ni ku zrula.
12 Lwana yimpi leyinene ya lipfumelo; u khoma swi tiya ka wutomi lebyi nga helikiki lebyi u vitaneliwiki byone nakone u nyikeliki a wumboni lebyinene mayelanu na byone a mahlweni ka vhanu vanyingi.
13 A mahlweni ka Xikwembu Nkulukumba lweyi a yentxaka mintxhumu hinkwayu yi tama yi hanya, na Kriste Yesu lweyi a nyikeliki wumboni lebyinene a mahlweni ka Pontiyu Pilatu, ni ku tsratsriya
14 leswaku u yingiseta swileleto hi ku helela ni hi ndlela leyi nga tiki solisa ku ya tlhasa a ku vonekisiweni ka Hosi yezru Yesu Kriste,
15 loku a taka ku kombisa hi nkama wa kone,* yene Hosi leyi nyonxiki nakone a nga yene ntsena a nga ni ntamu lowukulu ngopfu swinene. Yene i Hosi ya lava nga tihosi ni Mufumi wa lava nga vafumi,
16 lweyi a nga yene ntsena a kalaka a nga fi, a tsrhamaka ka livaningu ledzri kalaka dzri nga tsrhindzrekeleki, lweyi ku kalaka ku nga na mhunu lwa samiki a mu vona kumbe a nga swi kotaka ku mu vona. A xitxhavu ni ntamu lowu nga helikiki a swi ve kwake. Amen.
17 Dondzrisa lava nga swipfundzri ka misava leyi* akuva va nga tikulisi ni kuva va nga dumbi a wupfundzri lebyi helaka, kambe va dumba Xikwembu Nkulukumba lweyi a nga yene a hi nyikaka hi ntalu mintxhumu hinkwayu leyi hi tikholisaka ha yone.
18 Va byele leswaku va yentxa leswinene, ina, va yentxa mintizro yinyingi leyinene, va hanana,* va tiyimisela ku yavelana leswi va nga na swone.
19 Loko va yentxa leswo, va va na vo tihlengeletelela wukosi ku nga masungulo lamanene ya wumundzruku, akuva va kota ku khoma swi tiya ka wutomi lebyi nga byone.
20 Timotewu, hlayisa leswi Xikwembu Nkulukumba a ku tamelisiki swone, hi ku fambela kule ni mabulu lama kalaka ma nga pfuni ntxhumu lawa ma lwisanaka ni leswi xwengikiki u tlhela u fambela kule ni “wutivi” bya madzrimi lebyi pfuxaka mabulu lawa ma lwisanaka ni ntiyiso.
21 Van’we hi ku tibyela hi wutivi bya ku tasu va hambukile a lipfumelweni.
Ingiki a timpswalu letikulu ti nga va na wene.
Tintlhamuxelo ta le hansi
^ Hi ku kongoma: “Lava nga hansi ka mpinga wa wukazrawa”.
^ Kumbe: “swa ku tihanyisa”.
^ Kumbexana: “ka ku tsrhama kone”; Hi ku kongoma: “swa ku funekela”.
^ Hi ku kongoma: “va titlhavetele hi mahlomulo manyingi”.
^ Ku hlayiwa Yesu.
^ Kumbe: “xiyimu lexi xa misava; nguva leyi”. Vona Ntlhamuxelo Wa Mazritu.
^ Kumbe: “va hanana na va tsrhunxekile”.
