Papela dzra ku sungula ledzri yaka ka Vakorinte 15:1-58
15 Vamakwezru, swoswi ni djula ku mi dzrimuxa hi ta madzrungula lamanene lawa ni mi zrezreliki wone, lawa mi ma yamukeliki mi tlhela mi womelela ka wone.
2 Loko mi tama mi khoma swi tiya ka madzrungula lamanene lawa ni mi zrezreliki wone, ma huluxiwa. Loko mi nga khomi swi tiya, a ku pfumela kwenu a ku pfuni ntxhumu.
3 Hikusa ka mintxhumu ya ku sungula leyi ni mi byeliki yone yin’we ya kone hi leyi na mine ne ke dondzrisiwa, ku nga leswaku Kriste a fele swidoho swezru, hi lani Matsralwa ma hlayaka ha kone.
4 Ni leswaku a lahliwile a gama a pfuxiwa hi siku dzra wuzrazru hi lani Matsralwa ma hlayaka ha kone;
5 ni leswaku a humelele ka Khefasi,* a gama a humelela ka vapostola lava 12.
6 Ntsrhaku ka leswo a humelela hi nkama wun’we ka vamakwezru lava tlulaka 500 wa vone, lava ku tala kwavu va ha liki na hine kambe van’we vavu va fiki.
7 Ntsrhaku ka leswo a humelele ka Yakobe a gama a humelela ka vapostola hinkwavu.
8 Kambe hi wugamu a humelele ni kwanga, mine ni fanaka ni n’wana lweyi a pswaliwiki na nkama wu nga si na tlhasa.
9 Hikusa ni lwentsrongo ka vapostola nakone a swi ni faneli ku vitaniwa mupostola, hikusa ni xanise bandla dzra Xikwembu Nkulukumba.
10 Kambe hi kola ka timpswalu letikulu ta Xikwembu Nkulukumba ni leswi ni nga swone. Futsrhi a timpswalu leti a ni kombiki tone a ti vanga ta mahala, hikusa ni tizre ngopfu swinene ku tlula hinkwavu; nambitanu, a ku vanga mine kambe kuve timpswalu letikulu ta Xikwembu Nkulukumba leti ni kombisiwiki tone.
11 Kutani swi nge na mhaka leswaku mi dondzrisiwe ha mine kumbe mi dondzrisiwe ha vone, hinkwezru hi zrezra dzrungula dzroledzri dzra dzrin’we, nakone leswi hi leswi mi swi pfumeliki.
12 Kutani loko ku zrezriwa leswaku Kriste a pfuxiwile ku feni, ha yini van’we venu va hlaya leswaku a ku na ku pfuxiwa ka vafi?
13 Loko nakunene ku nga na ku pfuxiwa ka vafi, na yene Kriste a nga pfuxiwanga ku feni.
14 Kambe loko a li leswaku Kriste a nga pfuxiwanga ku feni, a ku zrezra kwezru a ku pfuni ntxhumu na dzro lipfumelo dzrenu a dzri pfuni ntxhumu.
15 Handle ka leswo, loko a li leswaku nakunene a vafi a va nge ti pfuxiwa swi hlaya leswaku hi timboni ta madzrimi, hikusa hi hembela Xikwembu Nkulukumba hi ku hlaya leswaku a pfuxe Kriste na kasi a nga mu pfuxanga.
16 Hikusa loko a li leswaku vafi a va nge ti pfuxiwa, na yene Kriste a nga pfuxiwanga.
17 Handle ka leswo, loko a li leswaku Kriste a nga pfuxiwanga swi hlaya leswaku a lipfumelo dzrenu a dzri pfuni ntxhumu, ma ha tama mi va ni swidoho.
18 Swi tlhela swi hlaya ni leswaku lava fiki* na va li valandzreli va Kriste va fe swa wugamu.
19 Loko dumbo dzrezru ka Kriste dzro tizrela wutomi lebyi ntsena, hi fanela ku tweliwa wusiwana ngopfu swinene ku tlula vhanu hinkwavu.
20 Kambe ha swi tiva leswaku Kriste a pfuxiwile ku feni, a ve wa ku sungula ku pfuxiwa ka* lava fiki.
21 Hikusa ku fana ni leswi a lifu dzri viki kone hi kola ka mhunu, na ko ku pfuxiwa ka vafi ku ta va kone hi kola ka mhunu.
22 Hikusa ku fana ni leswi hinkwavu va faka hi mhaka ya Adamu, hinkwavu va ta tlhela va pfuxiwa hi mhaka ya Kriste.
23 Kambe mun’wana ni mun’wana a ta pfuxiwa hi nkama wake, Kriste a ve wa ku sungula,* ku gama ku landzrela lava nga vake, hi nkama wa kuva Kriste a tlhela a buya akuva a ta va na hine.
24 Hi ku landzrela ku ta tlhasa wugamu, lani a taka tlhelisela Mfumu ka Xikwembu Nkulukumba wake tlhelo Papayi wake, ntsrhaku ka loko a helise mimfumu hinkwayu, wuhosi hinkwabyu ni ntamu.
25 Hikusa a fanela ku fuma ku ya tlhasa loko Xikwembu Nkulukumba a beka valala hinkwavu a hansi ka minkondzro yake.
26 A nala wa wugamu, ku nga lifu, a ta helisiwa.
27 Hikusa Xikwembu Nkulukumba a beke mintxhumu hinkwayu a hansi ka minkondzro yake, kambe loko a hlaya leswaku a beke mintxhumu hinkwayu a hansi kwake, swi le livaleni leswaku a ku patsreki Xikwembu Nkulukumba lweyi a nga yene a mu bekiki akuva a fuma mintxhumu hinkwayu.
28 Kambe loko mintxhumu hinkwayu yi ta va yi bekiwe hansi kwake, lanu ke, a N’wana na yene a ta tibeka hansi ka lweyi a nga yene a bekiki mintxhumu hinkwayu hansi kwake, akuva Xikwembu Nkulukumba a va mintxhumu hinkwayu ka vhanu hinkwavu.
29 Hi tlhelo dzrin’wana, loko a li leswaku vafi a va nge ti pfuxiwa, lava babatisiwaka hi nkongometo wa kuva va fa, va ta pfuneka hi yini, xana a va nge ti va na vo babatiseliwa swa mahala?
30 Ha yini na hine ha ha tibeka nghozini minkama hinkwayu?
31 Vamakwezru, ku fana ni leswi ni tikhuzaka ha n’wine, hi mhaka ya wuxaka lebyi mi nga na byone na Kriste Yesu Hosi yezru, ni tiyisekisa leswaku siku ni siku ni langusana ni lifu.
32 Loko ku fana ni vhanu vambeni,* ni lwe ni swihazri swa nhova a Efesa, swi ni pfuna ha yini ku va ni lwe na swone? Loko a li leswaku vafi a va nge ti pfuxiwa, “a hi deneni hi tlhela hi nwa, hikusa mundzruku hi ta fa”.
33 Mi nga kanganyisiwi, a vanghanu va ku biha va hona swihena leswinene.*
34 Pfukani* mi yentxa leswi lulamiki nakone mi nga hanyi hi xidoho, hikusa van’we a va mu tivi Xikwembu Nkulukumba, leswo ni swi hlayela ku va ni mi yentxa mi va ni tingana.
35 Nambitanu, mun’wana a ta ku: “Xana vafi va ta pfuxisiwa kuyini? Kone va ta pfuxiwa na va ni mizri wa matsrhamela muni?”
36 Xiphunta ndzriwene, leswi u swi byalaka a swi nge mili na swi nga zranganga hi ku fa.
37 Nakone loko u byala a wu byali nsinya* lowu kutani wu kuliki, kambe lexi u xi byalaka i mbewu, ku nga ha va ya trigu kumbe ya ntxhumu wun’wana.
38 Kambe Xikwembu Nkulukumba a yentxa leswaku mbewu yin’wana ni yin’wana yi kulisa xileswi a swi djulisaka xiswone,* nakone ndlela leyi mbewu yi kulaka ha yone a yi fani.*
39 Na yone nyama a yi fani, ku ni nyama ya vhanu, ya tihomu, ya tinyanyana, ni ya tinhlampfi.
40 Nakone ku ni mizri wa le tilweni ni mizri wa le misaveni; kambe a maphatimela ya mizri wa le tilweni ma hambanile ni ya mizri wa lani misaveni.
41 A dambu dzri ni maphatimela ya dzrone, ni n’weti wu ni maphatimela ya wone, a tinyeleti ti ni maphatimela ya tone; nakunene a maphatimela ya tinyeleti ma hambana.
42 Swi hi lani ku fanaka ni hi ku pfuxiwa ka vafi, a mizri lowu faka wa bola kambe lowu pfuxiwaka awa ha boli.
43 Wu lahliwa na wu li lowu voneliwaka hansi;* wu pfuxiwa na wu li lowu phatimaka. Wu lahliwa na wu tsranile; wu pfuxiwa na wu ni ntamu.
44 Wu lahliwa na wu li mizri wa nyama; wu pfuxiwa na wu li mizri wa moya. Loko ku ni mizri wa nyama, swi hlaya leswaku ku ni ni mizri wa moya.
45 Hi lani ku tsraliwiki ha kone: “Adamu wanuna wa ku sungula, a ve mhunu lweyi a* hanyaka.” Adamu wa wugamu a ve mhunu wa moya lweyi a nyikanaka wutomi.
46 Nambitanu, a mizri wa moya a hi wone wa ku sungula. Awa ku sungula i mizri wa nyama ku gama ku landzrela wa moya.
47 A mhunu wa ku sungula a pfa misaveni nakone a hambiwe hi ntsrhuzri; a mhunu wa wubidzri a pfa tilweni.
48 Lava va hambiwiki hi ntsrhuzri va fana ni lweyi a hambiwiki hi ntsrhuzri, ni lava va nga va le tilweni va fana ni wa le tilweni.
49 Nakone swanga hi leswi hi fanaka ni lweyi a hambiwiki hi ntsrhuzri, hi ta tlhela hi fana ni lweyi wa le tilweni.
50 Kambe ni mi byela leswi vamakwezru, a mizri lowu vumbiwaka hi ngati ni nyama, a wu nge di pfindla dzra Mfumu wa Xikwembu Nkulukumba, nambi ku li mizri lowu bolaka a wu nge byi kumi wutomi lebyi nga bolikiki.
51 Ni mi byela xihundla xa ku xwenga: A hi hinkwezru hi taka fa,* kambe hinkwezru hi ta txintxiwa
52 hi nkamanyana wutsrongo, hi ku byavuta* ka tihlo, loko ku txhayiwa xipalapala* xa wugamu, hikusa xipalapala xi ta txhaya kutani vafi va pfuxiwa na va nga ha boli, kutani hi ta txintxiwa.
53 Hikusa mizri lowu bolaka wu fanela ku yentxiwa lowu kalaka wu nga boli, ni lowu faka wu fanela ku yentxiwa lowu kalaka wu nga fi.
54 Kambe loko mizri lowu bolaka wu yentxiwa lowu kalaka wu nga boli, ni lowu faka wu yentxiwa lowu kalaka wu nga fi, ku ta hetiseka leswi Matsralwa ma swi hlayaka swaku: “Lifu dzri mitiwe hi la ku nga helikiki.”
55 “Lifu, a ku hlula kwaku ku kwini? Lifu a ntsrhombo* waku wu kwini?”
56 A ntsrhombo lowu vangaka lifu i xidoho nakone a Nawu hi wone wu nyikaka xidoho ntamu.
57 Kambe hi tlangela Xikwembu Nkulukumba hikusa a hi nyika ku hlula hi ku tizrisa Hosi yezru Yesu Kriste.
58 Kutani vamakwezru lava zrandzrekaka, yimani mi tiya, mi nga tsrekatsreki, tsrhamani na mi ni swinyingi swa ku swi yentxa* a ntizrweni wa Hosi, dzrimukani leswaku a ku tikazrata kwenu a ntizrweni wa Hosi a hi ka mahala.
Tintlhamuxelo ta le hansi
^ Lweyi a tlhelaka a vitaniwa Petro.
^ Hi ku kongoma: “lava va yetleliki ku feni”.
^ Hi ku kongoma: “a ve xizrangana xa”.
^ Hi ku kongoma: “a ve xizrangana”.
^ Kumbexana: “Loko hi ku ya hi vonela dzra vhanu”.
^ Kumbe: “mahanyela lamanene”.
^ Kumbe: “Phaphamukani”.
^ Hi ku kongoma: “mizri”.
^ Hi ku kongoma: “a nyika mbewu a mizri lowu a wu djulaka”.
^ Hi ku kongoma: “nakone a mbewu yin’wana ni yin’wana a yi nyika mizri wa yone”.
^ Kumbe: “na wu li lowu dzrelekaka”.
^ Kumbe: “a ve hika ledzri”.
^ Hi ku kongoma: “hi taka yetlela ku feni”.
^ Kumbe: “ku tsopeta”.
^ Kumbe: “trombeta”.
^ Ku hlayiwa wuswikoti lebyi lifu dzri nga na byone bya ku vanga ku xaniseka.
^ Kumbe: “tsrhamani na mi khomekile”.
