Papela dzra ku sungula ledzri yaka ka Vatesalonika 4:1-18
4 Xa wugamu vamakwezru, nakunene ma swi landzra swileleto leswi hi mi nyikiki swone swa ndlela leyi mi fanelaka ku hanya ha yone akuva mi nyonxisa Xikwembu Nkulukumba, kambe swoswi hi vito dzra Hosi Yesu ha mi tsratsriya ni ku mi kombela leswaku mi ya mahlweni mi swi yentxa hi ku helela.
2 Hikusa ma swi tiva swileleto leswi hi mi nyikiki swone leswi pfaka ka Hosi Yesu.
3 Hikusa a ku zrandzra ka Xikwembu Nkulukumba, i ku va mi va lava xwengiki mi tlhela mi tsrutsruma swiyentxo swa tingana hi tlhelo dzra tinkuku.*
4 Mun’wana ni mun’wana wenu a fanela ku tiva leswaku a nga wu lawulisa kuyini mizri wake,* akuva wu tama wu va lowu xwengiki nakone wu va lowu hloniphekaka,
5 mi nga fani ni vamatiko, lava kalaka va nga mu tivi Xikwembu Nkulukumba lava landzraka ku navela kwavu ka swa tinkuku loku kalaka ku nga lawuleki, nambi ku yaneliseka va kalaka va nga yaneliseki.
6 Ku nga vi na mhunu lweyi a yentxaka leswi kalaka swi nga li swinene a va a londzrovota makwavu a mhakeni leyi, hikusa Yehovha a ta khatisa hinkwavu lava yentxaka mintxhumu leyi, hi lani hi samiki hi mi byela ha kone hi va hi mi basopisa ngopfu swinene.
7 Hikusa Xikwembu Nkulukumba a nga hi vitanelanga kuva hi hanya wutomi bya nsila, kambe akuva hi va lava xwengiki.
8 Xileswo, a mhunu lweyi a dzrelaka mintxhumu leyo, a nga dzreli vhanu kambe a dzrela Xikwembu Nkulukumba, lweyi a mi nyikaka moya wake wa ku xwenga.
9 Nambitanu, mayelanu ni mhaka ya kuva mi zrandzranana ingiki hi loko mo va vandangu wun’we a swi vileli kuva hi mi tsralela, hikusa Xikwembu Nkulukumba a mi dondzrisile ku zrandzranana.
10 Futsrhi ma swi yentxa leswo ka vamakwezru hinkwavu lava nga tikweni hinkwadzru dzra le Makedoniya. Kambe vamakwezru, hi mi tsratsriya leswaku mi ya mahlweni mi swi yentxa hi lani ku yengeselekiki.
11 Tiyimiselani ku hanya hi ku zrula ni ku kala mi nga tingheniseli ka timhaka ta vambeni ni kuva mi tizra hi mavoko yenu, hi lani hi mi dondzrisiki ha kone,
12 akuva vhanu va le handle va ta swi vona leswaku mi hanya hi ndlela leyinene nakone a mi pfumali ntxhumu.
13 Handle ka leswo vamakwezru, a hi swi djuli leswaku mi nga tivi ntxhumu mayelanu ni lava yetleliki ku feni, akuva mi nga xukuvali ku fana ni vhanu lava kalaka va nga na dumbo.
14 Hikusa loko hi ni lipfumelo dzra leswaku Yesu a file a tlhela a pfuxiwa, ha kholwa leswaku hinkwavu lava fiki, Xikwembu Nkulukumba a ta va pfuxa hi ku tizrisa Yesu akuva va ta va na yene.*
15 Hi ku ya hi zritu dzra Yehovha hi mi byela leswaku hine hi hanyaka nakone hi taka tama hi hanya ku ya tlhasa loko Hosi yi va kone, a hi nge ti txhuka hi va zrangela lava va yetleliki ku feni;
16 hikusa a Hosi hi ntshima yi ta xika hi le tilweni na yi khome xipalapala* xa Xikwembu Nkulukumba, kutani a zritu dzra yone dzra ku zruma, dzri nga zritu dzra ntsrumi leyikulu, dzri ta twiwa kutani lava va fiki na va ni wumun’we na Kriste va ta zranga va pfuka.
17 Ntsrhaku ka leswo, hine lava hi taka kumiwa na ha ha hanya, hi ta tekiwa kun’we na vone hi nghenisiwa matlavini, akuva hi ya kumana ni Hosi a mpfhukeni, hi ndlela leyo hi ta va xikan’we ni Hosi minkama hinkwayu.
18 Xileswo yanani mahlweni mi txhavelelanana hi mazritu lawa.
Tintlhamuxelo ta le hansi
^ Hi Xigriki: porneía. Vona Ntlhamuxelo Wa Mazritu.
^ Hi ku kongoma: “a nga xi lawulisa kuyini xibya xake”.
^ Ku hlayiwa Yesu.
^ Kumbe: “trombeta”.
