Papela dzra ku sungula dzra Yohane 3:1-24
3 Vonani ku kula ka lizrandzru ledzri Papayi a hi kombiki dzrone, lakakuva hi vitaniwa vana va Xikwembu Nkulukumba! Nakone vhela hi vanake. Hi leswo swi yentxaka misava yi nga hi tivi, hikusa a yi mu tivi.
2 Vazrandzriwa, swoswi hi vana va Xikwembu Nkulukumba, kambe a hi si na swi tiva leswi hi taka va xiswone a nkameni lowu taka. Nambitanu, ha swi tiva leswaku loko a ta vonekisiwa hi ta fana na yene, hikusa hi ta mu vona xileswi a nga xiswone.
3 Nakone lweyi a nga ni dumbo ledzri, ledzri seketeliwiki kwake, awa tibasisa, swanga hi leswi na yene a basiki.
4 Mun’wana ni mun’wana lweyi a hanyaka hi xidoho a va na a tlula ni nawu, hikusa a xidoho i ku tlula nawu.
5 Na n’wine ma swi tiva leswaku a tele* ku ta susa swidoho swezru, nakone yene a ngi ngi sama a doha.
6 Mun’wana ni mun’wana lweyi a tamaka a va ni wumun’we na yene a nga hanyi hi xidoho; lweyi a hanyaka hi xidoho a nga mu tivi Yesu, nakone a nga na lipfumelo kwake.
7 Vatsrongwana vanga, mi nga pfumeleli mhunu a mi hambukisa; lweyi a hanyaka hi leswi lulamiki a lulamile, swanga hi leswi Yesu a lulamiki.
8 Lweyi a hanyaka hi xidoho a landzrela* Diyavulosi, hikusa Diyavulosi a le ku doheni ku sukela a ku sunguleni.* Hi leswo swi yentxiki leswaku a N’wana wa Xikwembu Nkulukumba a ta,* akuva a ta helisa* mintizro ya Diyavulosi.
9 Mun’wana ni mun’wana lweyi a nga n’wana wa Xikwembu Nkulukumba a nga hanyi hi xidoho, hikusa mhunu yelweyo a ni ntamu wa Xikwembu Nkulukumba,* nakone a nge hanyi hi xidoho, hikusa i n’wana wa Xikwembu Nkulukumba.
10 A vana va Xikwembu Nkulukumba ni vana va Diyavulosi va voneka hi leswi: Mun’wana ni mun’wana lweyi a kalaka a nga hanyi hi leswi lulamiki a hi n’wana wa Xikwembu Nkulukumba, nambi lweyi a kalaka a nga mu zrandzri makwavu, a hi n’wana wa Xikwembu Nkulukumba.
11 Hikusa ledzri i dzrungula ledzri mi dzri twiki ku sukela a ku sunguleni, dzra leswaku mi fanela ku zrandzranana;
12 mi nga fani na Khayini, lweyi a landzreliki Diyavulosi* kutani a dlaya makwavu.* Kasi a mu dlaye hi mhaka muni? A mu dlaye hi mhaka ya leswi mintizro yake a yi bihile, kambe ya makwavu a yi lulamile.
13 Vamakwezru, mi nga hlamali hi leswi misava yi mi nyenyaka.
14 Ha swi tiva leswaku a hi fana ni vhanu lava fiki, kambe swoswi ha hanya hikusa hi zrandzra vamakwezru. Lweyi a kalaka a nga na lizrandzru a ha file.
15 Mun’wana ni mun’wana lweyi a nyenyaka makwavu i mudlayi, nakone ma swi tiva leswaku a ku na mudlayi lweyi a taka kuma wutomi lebyi nga helikiki.
16 Leswi Kriste a hi feliki* ha swi twisisa leswaku a lizrandzru i yini, nakone hi fanela ku tiyimisela ku fela vamakwezru.*
17 Kambe lweyi a nga ni mintxhumu ya misava leyi kutani a vona makwavu na a li ku pfumaleni nambitanu a yala ku mu komba timpswalu, a nga hlayisa kuyini leswaku awa mu zrandzra Xikwembu Nkulukumba?
18 Vatsrongwana vanga, a hi zrandzrananeni ku nga li hi mazritu kumbe hi nomu ntsena, kambe hi mintizro ni hi ntiyiso.
19 Hi ndlela leyi hi ta swi tiva leswaku hi le ntiyisweni, nakone hi ta tiyisekisa* timbilu tezru leswaku Xikwembu Nkulukumba a nga hi voni nandzru
20 ka ntxhumu wun’wana ni wun’wana lowu timbilu tezru ti nga ha hi vonaka nandzru ka wone, hikusa Xikwembu Nkulukumba i mukulu ku tlula timbilu tezru nakone a tiva mintxhumu hinkwayu.
21 Vazrandzriwa, loko timbilu tezru ti nga hi voni nandzru,* hi nga vulavula na Xikwembu Nkulukumba na hi ntsrhunxekile;
22 nakone leswi hi yingisetaka milawu yake hi tlhela hi hanya hi ndlela leyi yi mu nyonxisaka, a ta hi nyika hinkwaswu leswi hi swi kombelaka.
23 Nakunene, a nawu wake hi lowu: hi fanela ku va ni lipfumelo ka vito dzra N’wanake Yesu Kriste hi tlhela hi zrandzranana hi lani a hi leletiki ku yentxa ha kone.
24 Handle ka leswo, lweyi a yingisetaka milawu yake a tama a va ni wumun’we na yene, na yene a va ni wumun’we ni mhunu yelweyo. Nakone hi kola ka moya lowu a hi nyikiki wone, ha swi tiva leswaku a tama a va ni wumun’we na hine.
Tintlhamuxelo ta le hansi
^ Hi ku kongoma: “a vonekisiwe”.
^ Hi ku kongoma: “a huma ka”.
^ Kumbe: “ku sukela lani yene a sunguliki kone”.
^ Hi ku kongoma: “a vonekisiwa”.
^ Kumbe: “a ta hohlota”.
^ Hi ku kongoma: “a mbewu Yake yi le ka mhunu yelweyo”. Ku nga mbewu leyi kotaka ku beka mihandzru kumbe ku bindzrula.
^ Hi ku kongoma: “a humiki ka mubihi”.
^ Kumbe: “kutani a dlaya makwavu hi ndlela ya nsele”.
^ Kumbe: “a nyikeliki hika dzrake hi kola kwezru”.
^ Kumbe: “ku nyikela mahika yezru hi kola ka vamakwezru”.
^ Kumbe: “kholwisa”.
^ Kumbe: “ti nga hi soli”.
