Papela dzra ku sungula dzra Yohane 5:1-21
5 Mun’wana ni mun’wana lweyi a kholwaka leswaku Yesu i Kriste, i n’wana wa Xikwembu Nkulukumba, nakone mun’wana ni mun’wana lweyi a zrandzraka Papayi, ku nga Xikwembu Nkulukumba, awa va zrandzra vana va Xikwembu Nkulukumba.
2 Hi kota ku tiva leswaku ha va zrandzra vana va Xikwembu Nkulukumba loko hi zrandzra Xikwembu Nkulukumba hi tlhela hi landzra milawu yake.
3 Hikusa a ku zrandzra Xikwembu Nkulukumba swi hlaya ku va hi yingiseta milawu yake, nakone a milawu yake a yi bindzri,
4 hikusa mun’wana ni mun’wana lweyi* a nga n’wana wa Xikwembu Nkulukumba awa yi hlula misava. Nakone a lipfumelo dzrezru hi dzrone dzri hi pfuniki ku hlula misava.
5 I mani a nga hlulaka misava? A hi yene lweyi a nga ni lipfumelo dzra leswaku Yesu i N’wana wa Xikwembu Nkulukumba?
6 Yesu Kriste a te hi mati ni ngati, ku nga li hi mati ntsena, kambe hi mati ni ngati. Nakone a moya hi wone wu nyikelaka wumboni mayelanu ni mhaka leyi, hikusa a moya wu paluxa ntiyiso.*
7 Hikusa ku ni mintxhumu yizrazru leyi paluxaka ntiyiso mayelanu na Yesu,
8 ku nga moya, mati kun’we ni ngati; nakone a mintxhumu leyi yizrazru ya twanana.
9 Loko hi yamukela wumboni bya vhanu, hi fanela ku yamukela ni wumboni bya Xikwembu Nkulukumba lebyi nga byikulu. Hikusa lebyi i wumboni lebyi Xikwembu Nkulukumba a byi nyikelaka, ku nga wumboni lebyi a byi nyikeliki mayelanu ni N’wanake.
10 A mhunu lweyi a kombisaka lipfumelo ka N’wana wa Xikwembu Nkulukumba a kombisa leswaku a na swone a mbilwini yake leswi Xikwembu Nkulukumba a mu dondzrisiki swone. A mhunu lweyi a kalaka a nga na lipfumelo ka Xikwembu Nkulukumba a mu yentxa muhembi, hikusa a nga kombisi lipfumelo ka wumboni lebyi Xikwembu Nkulukumba a byi nyikeliki mayelanu ni N’wanake.
11 A wumboni bya kone i bya leswaku Xikwembu Nkulukumba a hi nyike wutomi lebyi nga helikiki, nakone hi kuma wutomi lebyo hi kola ka N’wanake.
12 Lweyi a pfumelaka N’wana wa Xikwembu Nkulukumba a na byone wutomi lebyo; kambe lweyi a kalaka a nga mu pfumeli N’wana wa Xikwembu Nkulukumba a nga na byone wutomi lebyo.
13 Ni mi tsralela mintxhumu leyi akuva mi swi tiva leswaku mi ni wutomi lebyi nga helikiki, n’wine lava kombisaka lipfumelo ka vito dzra N’wana wa Xikwembu Nkulukumba.
14 Nakone ha tiyiseka leswaku Xikwembu Nkulukumba a ta hi yingela loko hi kombela ntxhumu wun’wana ni wun’wana lowu fambisanaka ni ku zrandzra kwake.*
15 Leswi hi swi tivaka leswaku awa hi yingela loko hi mu kombela ntxhumu wun’wana ni wun’wana, ha tiyiseka leswaku hi ta yi yamukela mintxhumu leyi hi yi kombelaka, hikusa hi yi kombela kwake.
16 Loko mhunu wa kukazri a vona makwavu na a yentxa xidoho lexi kalaka xi nga yisi ku feni, a a mu kombeleli ka Xikwembu Nkulukumba, kutani Xikwembu Nkulukumba a ta nyika makwavu yelweyo wutomi, leswi swi tizra ka lava va yentxaka xidoho lexi kalaka xi nga yisi ku feni. Nambitanu, ku ni xidoho lexi yisaka ku feni. Mayelanu ni xidoho lexi, a ni mu byeli swone leswaku a a mu kombeleli.
17 Hinkwaswu leswi kalaka swi nga lulamanga i xidoho, nambitanu, ku ni xidoho lexi kalaka xi nga yisi ku feni.
18 Ha swi tiva leswaku mun’wana ni mun’wana lweyi a nga n’wana wa Xikwembu Nkulukumba a nga hanyi hi xidoho, nakone leswi a N’wana* wa Xikwembu Nkulukumba a mu vonelelaka, Sathana* a nge mu yentxi ntxhumu.*
19 Ha swi tiva leswaku hi va* Xikwembu Nkulukumba, kambe a misava hinkwayu yi le ntan’wini wa* Sathana.*
20 Nambitanu ha swi tiva leswaku a N’wana wa Xikwembu Nkulukumba a tile, a va a hi nyika ku twisisa* akuva hi kota ku tiva lweyi a nga yene wa ntiyiso. Nakone hi kola ka N’wanake Yesu Kriste, hi ni wumun’we ni lweyi a nga yene wa ntiyiso. Yene i Xikwembu Nkulukumba wa ntiyiso tlhelo xihlovo xa wutomi lebyi nga helikiki.
21 Vatsrongwana vanga, tivonelani ka ku gandzrela swithombe.*
Tintlhamuxelo ta le hansi
^ Hi ku kongoma: “xin’wana ni xin’wana lexi”.
^ Hi ku kongoma: “a moya i ntiyiso”.
^ Ku hlayiwa Xikwembu Nkulukumba.
^ Ku hlayiwa Yesu Kriste.
^ Hi ku kongoma: “mubihi”.
^ Kumbe: “a nge mu khumbi”.
^ Hi ku kongoma: “hi huma ka”.
^ Kumbe: “mavokweni ya”.
^ Hi ku kongoma: “mubihi”.
^ Hi ku kongoma: “wuswikoti bya ku twisisa”.
^ Kumbe: “swifaniso”.
