Papela dzra wubidzri dzra Petro 1:1-21
1 Mine Simoni Petro, xikazrawa tlhelo mupostola wa Yesu Kriste, ni tsralela lava hi kola ka wululami bya Xikwembu Nkulukumba wezru ni Muhuluxi Yesu Kriste, va kumiki lipfumelo dzra lisima dzra ku fana ni dzrezru:
2 Ingiki mi nga yengeseleliwa timpswalu letikulu ni ku zrula. Akuva swi koteka leswo, vanani ni wutivi bya ntiyiso mayelanu na Xikwembu Nkulukumba kun’we na Yesu Hosi yezru,
3 hikusa a ntamu wa Xikwembu Nkulukumba wu hi nyike* mintxhumu hinkwayu leyi yi hi pfunaka kuva hi hanya hi ku tinyiketela ka Xikwembu Nkulukumba, hi leswi hi nga ni wutivi bya ntiyiso mayelanu ni lweyi a hi vitaniki hi ku tizrisa ku phatima kwake ni wunene byake.
4 Hi ku tizrisa mintxhumu leyi, a hi nyike swidumbiso leswikulu ngopfu swinene nakone swi nga ni lisima, akuva hi kola ka yone mi kota ku hlengela ka ku phatima loku Xikwembu Nkulukumba a nga na kone, swanga hi leswi hi tsrhikiki mahanyela ya ku biha ya misava lama vangiwaka hi ku navela ka ku biha.
5 Hi kola ka leswo, tikazratelani kuva ka lipfumelo dzrenu mi yengesela wunene, ka wunene byenu mi yengesela wutivi,
6 ka wutivi byenu mi yengesela ku tikhoma, ka ku tikhoma kwenu mi yengesela ku tiyisela, ka ku tiyisela kwenu mi yengesela ku tinyiketela ka Xikwembu Nkulukumba,
7 ka ku tinyiketela kwenu ka Xikwembu Nkulukumba mi yengesela lizrandzru dzra wumakwezru, ka lizrandzru dzrenu dzra wumakwezru, mi yengesela lizrandzru hi vhanu hinkwavu.
8 Hikusa loko mintxhumu leyi mi li na yone hi ntalu, yi ta mi sivela ku hola, kumbe kuva mi nga beki mihandzru* a mhakeni ya wutivi bya ntiyiso mayelanu ni Hosi yezru Yesu Kriste.
9 Hikusa mun’wana ni mun’wana lweyi a pfumalaka mintxhumu leyi, a fe matihlo,* a tipfala matihlo akuva a nga voni livaningu, nakone a dzrivala leswaku a dzrivaleliwe swidoho swake swa khale.
10 Xileswo, vamakwezru, swanga hi leswi mi vitaniwiki ni ku hlawuliwa, yentxani hinkwaswu leswi mi nga swi kotaka akuva mi tama mi fanelekela ku vitaniwa ni ku hlawuliwa koloko, hikusa loko mi tama mi yentxa mintxhumu leyo, a mi nge ti txhuka mi wa.
11 Hi ndlela leyi, mi ta kuma tovoko dzrikulu dzra ku nghena a Mfun’wini lowu nga helikiki wa Hosi yezru tlhelo Muhuluxi Yesu Kriste.
12 Hi xivangelo lexo, ni tiyimisele kuva minkama hinkwayu ni mi dzrimuxa mintxhumu leyi, nambileswi mi yi tivaka nakone mi tiyiki swinene ka ntiyiso lowu mi wu dondzriki.
13 Kambe na na ha li ka mizri lowu, lowu fanaka ni tabernakela,* ni swi vona na swi li swinene kuva ni tlhela ni mi dzrimuxa mintxhumu leyi,
14 hi ku tiva leswaku a mizri wanga wu* kusuhi ni ku susiwa, hi lani na yene Hosi yezru Yesu Kriste a ni khanyiseliki ha kone.
15 Minkama hinkwayu ni ta yentxa hinkwaswu leswi ni nga swi kotaka akuva ntsrhaku ka loko ni file* mi kota ku dzrimuka mintxhumu leyi* ha wuswenu.
16 A nkama hi nga mi byela hi ta ntamu ni ku tlhela ka Hosi yezru Yesu Kriste leswaku a ta va na hine, a hi ngo landzrelela swihitana leswi khandhiwiki hi vhanu, kambe hi mi byele hi wukulu byake hi leswi hi viki timboni ta byone.
17 Hikusa a yamukele ku tlakuxiwa lokukulu loku pfaka ka Xikwembu Nkulukumba lweyi a phatimaka tlhelo Papayi, nkama lowu a mu byeliki mazritu lawa:* “Lweyi i N’wananga lweyi a zrandzrekaka, lweyi mine ni mu yamukelaka.”
18 Ina, a mazritu lawa hi ma yingele na ma pfa tilweni, nkama lowu na hi li na yene a nhaveni ya ku xwenga.
19 Xileswo hi ni zritu dzra wuprofeta ledzri tiyisekisiwiki ngopfu swinene, nakone mi yentxa swone hi ku va mi dzri yingiseta ku fana ni motsre lowu wu vaningaka a munyameni a timbilwini tenu (ku ya tlhasa loko dzri xa ni loko ku humelela nyeleti ya mixo).
20 Hikusa xa ku sungula ka hinkwaswu, ma swi tiva leswaku a ku na wuprofeta lebyi pfaka ka miyanakanyu ya vhanu.
21 Hikusa a wuprofeta a byi vanga kone hi ku zrandzra ka mhunu, kambe vhanu va vulavule leswi pfaka ka Xikwembu Nkulukumba na va kongomisiwa* hi moya wa ku xwenga.
Tintlhamuxelo ta le hansi
^ Kumbe: “wu hi nyike hi mahala”.
^ Kumbe: “kuva mi nga bindzruli”.
^ Kumbexana: “a ni xikazratu ka ku vona mintxhumu leyi nga kule”.
^ Kumbe: “tende”. Ku hlayiwa mizri wake wa le misaveni.
^ Kumbe: “tabernakela dzranga dzri”.
^ Hi ku kongoma: “ni sukile”.
^ Kumbe: “mi kota ku vulavula ha yone”.
^ Hi ku kongoma: “zritu dzra ku tanu”.
^ Hi ku kongoma: “susumetiwa”.
