Papela dzra wubidzri dzra Petro 3:1-18
3 Vamakwezru lava zrandzrekaka, ledzri i papela dzra wubidzri ni mi tsralelaka dzrone, nakone ku fana ni ka dzra ku sungula, ni mi tsralela akuva ni mi tsratsriya ku tizrisa wuswikoti byenu bya ku yanakanya hi ndlela leyinene hi ku mi dzrimuxa mintxhumu leyi kutani mi yi tivaka,
2 leswaku mi dzrimuka leswi hlayiwiki* khale hi vaprofeta lava xwengiki, kun’we ni tidondzro ta Hosi tlhelo Muhuluxi leti mi ti yingeliki hi vapostola venu.
3 Kambe xa ku sungula ka hinkwaswu, tivani leswaku a masikwini ya wugamu ku ta va ni vhanu lava taka poyilela mintxhumu leyinene nakone va ta yentxa mintxhumu ya ku biha leyi fambisanaka ni ku navela kwavu
4 va ku: “A dumbise leswaku a a ta tlhela akuva a ta va na hine. A kwini leswi? Phela ku sukela siku ledzri vakokwana va fiki ha dzrone, a mintxhumu hinkwayu ya ha tsrhamisise xiswoswi a yi li xiswone ku sukela a ku tumbuluxiweni ka misava.”
5 Hikusa va yi ba hi makatla mhaka ya leswaku khale ku ve ni matilo, ni misava yi ve kone yi pfa a matini nakone yi yime yi tiya a xikazri ka mati hi zritu dzra Xikwembu Nkulukumba,
6 ni leswaku a vhanu va le minkameni yoleyo va helisiwile hi mintxhumu leyo nkama lowu ku viki ni ndhambhi leyi funeketiki misava hinkwayu.
7 Kambe hi zritu dzra Xikwembu Nkulukumba a matilo ni misava leswi nga kone swoswi, swi bekisiwe akuva swi ta helisiwa hi ndzrilo nakone swi bekisiwe ku ya tlhasa siku dzra wuyavanyisi ni dzra ku helisiwa ka vhanu lava kalaka va nga mu hloniphi Xikwembu Nkulukumba.
8 Nambitanu vamakwezru lava zrandzrekaka, mi nga dzrivali leswaku ka Yehovha a siku dzrin’we dzri fana ni 1.000 wa malembe nakone 1.000 wa malembe ma fana ni siku dzrin’we.
9 Yehovha a nga hlweli ku hetisisa xidumbiso xake, hi lani vhanu van’wana va yanakanyaka ha kone, kambe a mi lehisela mbilu hikusa a nga naveli leswaku ni mun’we a helisiwa kambe a navela leswaku vhanu hinkwavu va tisola.
10 Kambe a siku dzra Yehovha dzri ta tlhasa ku fana ni muyivi. Kutani a matilo ma ta khaluta hi ku dzruma,* a mintxhumu ya le tilweni ni le misaveni yi ta hisiwa ngopfu yi nyivilika, nakone a misava ni mintxhumu leyi nga ka yone swi ta hisiwa.*
11 Leswi mintxhumu leyi hinkwayu yi taka nyivilikisiwa hi ndlela leyi, tikambelani akuva mi vona leswaku mi fanela ku va vhanu va matsrhamela muni a mhakeni ya ku va ni mahanyela lama xwengiki ni ku tinyiketela ka Xikwembu Nkulukumba,
12 nkama lowu ma ha zrindzriki ni ku yanakanyisisa* hi ku ta* ka siku dzra Yehovha, hikusa hi siku ledzro a matilo ma ta helisiwa hi ndzrilo, ni mintxhumu ya le tilweni ni le misaveni yi ta nyivilika hi ku hisa lokukulu!
13 Kambe hi ku ya hi xidumbiso xake hi yimele matilo lamampshwa ni misava leyimpshwa, leswi ka swone ku taka va ni wululami.
14 Xileswo vamakwezru lava zrandzrekaka, leswi mi yimelaka mintxhumu leyi, yentxani hinkwaswu leswi mi nga swi kotaka akuva hi wugamu a mi kuma na mi nge na bati, mi nge na nandzru, nakone mi li ni ku zrula.
15 Handle ka leswo, tekani ku lehisa mbilu ka Hosi yezru ku li ku huluxiwa, hi lani makwezru lweyi a zrandzrekaka Pawulo na yene a mi tsraleliki ha kone hi ku ya hi wutlhazri lebyi a nyikiwiki byone,
16 nakunene a tsrale mayelanu ni mintxhumu leyi ka mapapela yake hinkwawu. Nambitanu, mintxhumu yin’wana ka mapapela wolawo ya kazrata ku yi twisisa, futsrhi vhanu lava va kalaka va nga tivi ntxhumu* nakone va kalaka va nga tiyanga va yi soholota mintxhumu leyi, hi lani va yentxaka ha kone ni le ka Matsralwa laman’wana hinkwawu, leswi taka yentxa leswaku va helisiwa.
17 Xileswo, n’wine vamakwezru lava zrandzrekaka, leswi mi tiviki timhaka leti na ka ha li nkama, tivonelani akuva mi nga hambukisiwi na vone, hi wukanganyisi bya vhanu lava bihiki, kutani mi wa, mi tsrhika ndlela leyinene leyi mi tiyiki ka yone.
18 Kambe hanyani hi ndlela leyi taka mi pfumelela ku ya mahlweni mi yamukela timpswalu letikulu ta Hosi yezru tlhelo Muhuluxi Yesu Kriste, mi tlhela mi ya mahlweni mi yengesela wutivi mayelanu na yene. A a dzrumisiwi, swoswi ni hi lani ku nga helikiki. Amen.
Tintlhamuxelo ta le hansi
^ Kumbe: “leswi profetiwiki”.
^ Kumbe: “hi pongwe ledzrikulu”.
^ Kumbe: “swi ta vonekisiwa”.
^ Kumbe: “mi swi yimeliki ngopfu swinene”. Hi ku kongoma: “mi kahlulisaka”.
^ Hi Xigriki: “parousia”.
^ Kumbe: “va kalaka va nga dondzrisiwanga”.
