Papela dzra wubidzri ledzri yaka ka Vakorinte 2:1-17
-
Ku navela ka Pawulo ka ku djula ku nyonxisa vamakwezru (1-4)
-
Mudohi lweyi a dzrivaleliwiki a tlhela a tlhelelisiwa a bandleni (5-11)
-
Pawulo a Trowasi ni le Makedoniya (12, 13)
-
Ntizro wa ku zrezra wu fanisiwa ni masotxha lawa ma tlhelaka hi le yimpini na ma hlulile (14-17)
-
A hi vaxavisi va zritu dzra Xikwembu Nkulukumba (17)
-
2 Hikusa ni tiyimisele ku kala ni nga mi kwatisi loko ni tlhela ni mi yendzrela.
2 Hikusa loko ni mi kwatisa, i mani lweyi a taka ni nyonxisa loko ku nga li lweyi ni mu kwatisiki?
3 Ni mi tsralele papela akuva loko ni ta halanu ni nga kwatisiwi hi lava a va fanela ku ni nyonxisa, hikusa na tiyiseka leswaku leswi swi ni yentxaka ni nyonxa, na n’wine hinkwenu swi mi nyika ku nyonxa loku fanaka.
4 Hikusa ni mi tsralele na ni kazrateke ngopfu nakone na ni vavisekile a mbilwini, futsrhi na ni xiririka ni minyembeti, kambe a ni ngo djula ku mi kwatisa, a ni djula kuva mi swi tiva leswaku ni mi zrandzra ngopfu swinene.
5 Loko mhunu wa kukazri a mi kwatisile, a nga kwatisanga mine, kambe a kwatise n’wine hinkwenu. Kambe a ni djuli ku khanela swinyingi hi mhaka leyi.
6 A xilayu lexi vanyingi venu va mu nyikiki xone mhunu yelweyo xa yanela;
7 swoswi mi fanela ku mu dzrivalela hi mbilu hinkwayu mi tlhela mi mu txhavelela akuva a nga vaviseki ngopfu a za a godola.*
8 Xileswo ni mi tsratsriya kuva mi mu komba leswaku ma mu zrandzra.
9 Leswo i swin’wana swa leswi swi ni yentxiki ni mi tsralela papela: akuva mi ni tiyisekisa leswaku ma yingiseta ka mintxhumu hinkwayu.
10 Loko mi dzrivalela mhunu ntxhumu wa kukazri, na mine na mu dzrivalela. Nakunene, xin’wana ni xin’wana lexi ni xi dzrivaleliki (loko a li leswaku xi kone) ni swi yentxe akuva ku pfuneka n’wine nakone Kriste a ve mboni ya swone;
11 akuva hi nga hluliwi* hi Sathana, hikusa ha ma tiva mazrengu yake.*
12 Loko ni tlhase a Trowasi akuva ni zrezra madzrungula lamanene mayelanu na Kriste ni va ni pfulekeliwa hi mukhandlu* a ntizrweni wa Hosi,
13 a ni zrulanga* hi leswi ni kalaka ni nga mu kumanga Tito makwezru. Xileswo ni va lelelile ni gama ni suka ni ya a Makedoniya.
14 Kambe a ku tlangeliwi Xikwembu Nkulukumba, lweyi minkama hinkwayu a hi kongomisaka swanga masotxha lawa ma tlhelaka hi le yimpini na ma hlulile na hi li xikan’we na Kriste nakone hi ku tizrisa hine a hangalasaka ku nun’hwela ka wutivi byake* a mimbangwini hinkwayu!
15 Hikusa ka Xikwembu Nkulukumba hi ku nun’hwela loku nandzrikaka ka Kriste a xikazri ka lava yaka ku huluxiweni ni le xikazri ka lava yaka ku helisiweni;
16 ka lava wugamu,* hi ku nun’hwela ka lifu loku yisaka ku feni, ka lava ku sungula* hi ku nun’hwela ka wutomi loku yisaka a wuton’wini. I mani lweyi a faneliwaka hi mintxhumu leyi?
17 Hi hine, hikusa a hi vaxavisi* va zritu dzra Xikwembu Nkulukumba hi lani vanyingi va yentxaka ha kone, kambe hi vulavula ntiyiso swanga vhanu lava zrumiwiki hi Xikwembu Nkulukumba, ina, a mahlweni ka Xikwembu Nkulukumba na hi li kun’we na Kriste.
Tintlhamuxelo ta le hansi
^ Kumbe: “akuva a nga mitiwi hi ku vaviseka”.
^ Kumbe: “kanganyisiwi”.
^ Kumbe: “makungu; maqhinga”.
^ Hi ku kongoma: “ni pfulekeliwa hi xipfalu”.
^ Kumbe: “a moya wanga a wu zrulanga”.
^ Kumbe: “a yentxaka leswaku ku nun’hwela ka wutivi byake ku twiwa”.
^ Kumbe: “ka lava yaka ku helisiweni”.
^ Kumbe: “ka lava yaka ku huluxiweni”.
^ Kumbe: “vaxavisi lava fambafambaka”.
