Papela dzra wubidzri ledzri yaka ka Vatesalonika 1:1-12
1 Hi mine Pawulo, ni na Silvhanu* na Timotewu. Ni tsralela bandla dzra Vatesalonika ledzri lumbaka Xikwembu Nkulukumba Papayi wezru kun’we na Hosi Yesu Kriste:
2 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.
3 Vamakwezru, swa fanela kuva minkama hinkwayu hi tlangela Xikwembu Nkulukumba hi kola kwenu, hikusa a lipfumelo dzrenu dzri ya dzri kula ngopfu swinene ni ndlela leyi mi zrandzranaka ha yone yi ya yi kula ngopfu swinene.
4 Hi mhaka ya leswo, ha tikhuza ha n’wine a xikazri ka mabandla ya Xikwembu Nkulukumba, hi kola ka ku tiyisela kwenu ni lipfumelo ledzri mi dzri kombisaka henhla ka tinxanisa hinkwatu ni swikazratu* hinkwaswu leswi mi kumanaka na swone.*
5 Leswi swi tiyisekisa leswaku a ku yavanyisa ka Xikwembu Nkulukumba ku lulamile, hi mhaka ya leswo, mi voniwa mi li lava faneliwaka hi ku yamukela Mfumu wa Xikwembu Nkulukumba, lowu mi xanisekaka hi mhaka ya wone.
6 Leswi Xikwembu Nkulukumba a lulamiki, a ta va khatisa lava va mi xanisaka.
7 Kambe n’wine mi xanisiwaka, Xikwembu Nkulukumba a ta mi nyika ntsrhunxeko kun’we na hine, loko Hosi Yesu a humelela* hi le tilweni kun’we ni tintsrumi take ta ntamu
8 na a li ndzrilweni lowu pfuzraka, nkama lowu a telaka ku ta dzrihisela lava va kalaka va nga mu tivi Xikwembu Nkulukumba, ni lava va kalaka va nga ma yingiseti madzrungula lamanene mayelanu ni Hosi yezru Yesu.
9 Vhanu volavo a Hosi yi ta va yavanyisa yi tlhela yi va khatisa hi ku va helisela wugamu, nakone a yi nge he ti va lavisa, nambi ku va pfuna hi ntamu wa yone lowukulu,
10 leswo swi ta yentxeka loko yi ta akuva yi ta dzrumisiwa na yi li xikan’we ni vamakwavu lava xwengiki ni leswaku yi ta hloniphiwa hi hinkwavu lava kombisaka lipfumelo, hikusa a wumboni lebyi hi byi nyikeliki mi byi yamukele hi lipfumelo.
11 Hi leswo swi hi yentxaka minkama hinkwayu hi mi khongotelela, leswaku Xikwembu Nkulukumba a mi vona na mi faneliwa hi ku va a mi vitana ni leswaku hi ku tizrisa ntamu wake a yentxa hi ku helela mintxhumu hinkwayu leyinene leyi a yi zrandzraka a tlhela a tovokisa mintizro yenu hinkwayu ya lipfumelo,
12 akuva a vito dzra Hosi yezru Yesu dzri dzrumisiwa kwenu, na n’wine mi dzrumisiwa kwake hi ku ya hi timpswalu letikulu ta Xikwembu Nkulukumba wezru ni ta Hosi Yesu Kriste.
Tintlhamuxelo ta le hansi
^ Lweyi a tlhelaka a vitaniwa Silasi.
^ Kumbe: “mahlomulo”.
^ Kumbe: “mi swi tiyiselelaka”.
^ Hi ku kongoma: “a pfuleteliwa”.
