Daniyele 5:1-31
5 Hosi Belxatsara a hamba nkhuvu wa wukulu, a hambela 1.000 wa vhanu va xiyimu xa le henhla va le mfun’wini wake, nakone a a nwa vhinyu a mahlweni kwavu.
2 Loko a popswile, Belxatsara a leleta leswaku ku buyisiwa tikopo ta woru ni ta prata leti papayi wake Nebukadnetsara a ti tekiki a tempeleni a Yerusalema, akuva a hosi, vhanu va xiyimu xa le henhla va le mfun’wini wa yone, vasati va yone lavatsrongo ni vasati va yone lavan’wana, va nwa hi tone.
3 Hiloko va buyisa a tikopo ta woru leti tekiwiki a tempeleni a ndlwini ka Xikwembu Nkulukumba a Yerusalema, kutani a hosi, vhanu va xiyimu xa le henhla va le mfun’wini wa yone, vasati va yone lavatsrongo ni vasati va yone lavan’wana, va nwa hi tone.
4 Va nwe vhinyu va tlhela va dzrumisa swikwembu swa woru, swa prata, swa kobri, swa nsimbi, swa ku vatliwa ni swa zribye.
5 Hi nkama wolowo, ku humelela tintiho ta voko dzra mhunu ti sungula ku tsrala khumbini dzra yindlu ya wuhosi a mahlweni ka xa ku tlhoma mimotsre. Nakone a hosi a yi dzri vona voko na dzri tsrala.
6 Hiloko a wuso bya hosi byi txintxa, leswi a yi swi yanakanya swi yi txhavisa, a masenge ya yone ma zruzrumela nakone a matsrolo ya yone ma banana.
7 A hosi yi hlaya hi zritu dzra le henhla leswaku ku vitaniwa vapfhumbi, Vakaldeya* ni vangoma lava tizraka hi tinyeleti. Yi byela tintlhazri ta le Babilona yi ku: “Mhunu lweyi a taka dondzra leswi tsraliwiki a va a ni byela ni ntlhamuxelo wa swone, a ta yambexiwa mpahla ya lisima a va a bekeliwa kolari dzra woru a nkolweni, nakone a ta bekiwa swanga mufumi wa wuzrazru a mfun’wini.”
8 Kutani ku buya tintlhazri hinkwatu ta hosi, kambe a ti swi kotanga ku dondzra leswi swi tsraliwiki nambi ku nyika hosi ntlhamuxelo wa swone.
9 Hi kola ka leswo, hosi Belxatsara a txhava ngopfu swinene nakone a wuso byake byi txintxa. A vhanu va xiyimu xa le henhla va le mfun’wini wake va pfumala xa ku xi yentxa.
10 Loko mamana wa hosi a* tive leswi a swi kazrata hosi ni vhanu va xiyimu xa le henhla va le mfun’wini wa yone, a nghena ka sala ledzri a ku hambeliwa ka dzrone nkhuvu. A ku: “We hosi, hanya hi masiku! U nga pfumeleli miyanakanyu yaku yi ku txhavisa, ni wuso byaku byi nga txintxi.
11 A mfun’wini waku ku ni wanuna wa kukazri* lweyi a nga ni moya wa swikwembu swa ku xwenga. A masikwini ya papayi waku ku gunguliwe leswaku wanuna lweyo a ni wutivi, ku twisisa ni wutlhazri bya ku fana ni bya swikwembu. Hosi Nebukadnetsara, papayi waku, a mu beke swanga muzrangeli wa vaprista va masalamusi, vapfhumbi, Vakaldeya ni vangoma lava tizraka hi tinyeleti; we hosi, papayi waku a swi yentxile leswo.
12 Hikusa Daniyele lweyi a hosi yi mu txhuliki vito dzra ku Beltexatsara, a ni moya lowu kalaka wu nga tolovelekanga, wutivi ni ku twisisa akuva a tlhamuxela milozro, swihundla ni ku lulamisa timhaka ta ku kazrata. Xileswo a ku vitaniwi Daniyele, yene a ta ku byela ntlhamuxelo wa swone.”
13 Hiloko Daniyele a buyisiwa mahlweni ka hosi, a hosi yi mu vutisa yi ku: “Hi wene Daniyele, lweyi a humaka ka swikazrawa swa le Yuda, leswi papayi wanga lweyi a a li hosi a swi buyisiki hi le Yuda?
14 Ni twe leswaku u ni moya wa swikwembu ni leswaku u ni ndhuma ya ku va ni wutivi, ku twisisa ni wutlhazri lebyikulu ngopfu swinene.
15 A tintlhazri ni vapfhumbi va buyisiwe mahlweni kwanga akuva va ta dondzra leswi tsraliwiki ni ku ni byela ntlhamuxelo wa swone, kambe a va swi koti ku ni byela leswi tlhamuxelaka swone.
16 Nambitanu, ni yingele leswaku u kota ku nyikela mintlhamuxelo ni ku lulamisa timhaka leti kazrataka.* Xileswo, loko wo kota ku dondzra leswi swi tsraliwiki ni ku ni byela ntlhamuxelo wa swone, u ta yambexiwa mpahla ya lisima, u bekeliwa kolari dzra woru a nkolweni nakone u ta va mufumi wa wuzrazru a mfun’wini.”
17 Kutani Daniyele a hlamula hosi a ku: “U nga tsrhama ni swihiwa swaku u va u swi nyika vambeni. Nambitanu, ni ta ku dondzrela we hosi leswi tsraliwiki ni ku byela ni ntlhamuxelo wa swone.
18 We hosi, Xikwembu Nkulukumba Lweyi a nga Henhlahenhla a nyike papayi waku Nebukadnetsara a mfumu, wukulu, ku hloniphiwa ni wuhosi.
19 Hi mhaka ya wukulu lebyi a mu nyikiki byone, vhanu va matiko ni tindzrimi hinkwatu a va zruzrumela hi ku txhava a mahlweni kwake. A a dlaya lweyi a mu djulaka kumbe a mu tsrhika a hanya, a tlakuxa kumbe a tsrongahata lweyi a mu djulaka.
20 Kambe loko mbilu yake yi sungule ku tibyela a va a tiwomisa nhloko lakakuva a yentxa mintxhumu hi ku tikulisa, a susiwile a xitsrhan’wini xa wuhosi nakone a tekeliwe ku phatima kwake swanga hosi.
21 A hlongoliwe a xikazri ka vhanu, a mbilu yake yi txintxiwa yi fana ni ya xihazri, nakone a a tsrhama ni timbongolo ta nhova. A a da byanyi ku fana ni tihomu nakone mizri wake wu tsrakamisiwa hi mbezre ya matilo, ku ya tlhasa loko a pfumela leswaku Lweyi a nga Henhlahenhla i mufumi a mfun’wini wa vhanu nakone a wu nyika mun’wana ni mun’wana lweyi a mu djulaka.
22 “Kambe wene Belxatsara, n’wana Nebukadnetsara, a u titsrongahatanga,* nambileswi a u tiva mintxhumu hinkwayu leyo.
23 A matsrhan’wini ya leswo, u tikulisile u lwisana ni Hosi ya matilo, nakone u lelete leswaku ku buyisiwa tikopo ta le ndlwini kwake. Ntsrhaku ka leswo, wene, vhanu va xiyimu xa le henhla va le mfun’wini waku, vasati vaku lavatsrongo ni vasati vaku lavan’wana, mi nwe vhinyu hi tone mi va mi dzrumisa swikwembu swa prata ni woru, swa kobri, swa nsimbi, swa ku vatliwa ni swa zribye; ku nga swikwembu swa ku a swi voni, a swi yingeli nambi ku tiva ntxhumu. Kambe wene a u mu dzrumisanga Xikwembu Nkulukumba lweyi a wutomi byaku hinkwabyu ni tindlela taku hinkwatu swi nga mavokweni yake.
24 Xileswo, Xikwembu Nkulukumba a zrumele voko akuva dzri tsrala mazritu lawa.
25 Nakone mazritu lama tsraliwiki hi lawa: MENE, MENE, TEKELE na PARISINI.
26 “A ntlhamuxelo wa wone hi lowu: MENE: Xikwembu Nkulukumba a konte masiku ya mfumu waku nakone a wu yentxe wu tlhasa wugamu.
27 “TEKELE: u pimiwile ka balansa* u va u kumiwa na u vevuka.
28 “PERESI: a mfumu waku wu yaviwile wu nyikiwa Vamedo ni Vapersiya.”
29 Hiloko Belxatsara a nyikela xileleto kutani va yambexa Daniyele mpahla ya lisima va mu bekela ni kolari dzra woru a nkolweni, va va va twalisa leswaku a ta va mufumi wa wuzrazru a mfun’wini.
30 Ka wusiku byolebyo, Belxatsara hosi ya Mukaldeya, a dlayiwile.
31 Kutani Dariyosi wa Mumedo, a yamukele mfumu na a ni kolomu ka 62 wa malembe.
Tintlhamuxelo ta le hansi
^ Leswi liki, vhanu lava tibyelaka hi wungoma bya ku tizra hi tinyeleti ni wuswikoti bya ku pfhumbata.
^ Hi ku kongoma: “hosi ya xisati yi”.
^ Kumbe: “wanuna wa kukazri lweyi a nga ni wuswikoti”.
^ Hi ku kongoma: “ni ku tlhantlha mafundzru”.
^ Hi ku kongoma: “a u tsrongahatanga mbilu yaku”.
^ Kumbe: “ka xikalu”.
