Papela ledzri dzri yaka ka Filemoni 1:1-25
1 Mine Pawulo, lweyi a nga xib’otxhwa hi kola ka lipfumelo ka Kriste Yesu, na Timotewu makwezru, ni tsralela wene Filemoni, mutizrikulozri lweyi a zrandzrekaka,
2 na makwezru Afiya, na Arkipu sotxhakulozri, ni bandla ledzri tlhanganaka a kaya kwaku:
3 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.
4 Makwezru lweyi a zrandzrekaka Filemoni, minkama hinkwayu ni tlangela Xikwembu Nkulukumba loko ni ku patsra ka swikhongoto swanga,
5 hikusa ni tsrhamela ku twa hi ta lipfumelo ni lizrandzru ledzri u nga nadzru hi Hosi Yesu ni hi vaxwengi hinkwavu.
6 Ni khongota leswaku lipfumelo ledzri hi nga na dzrone dzri ku susumetela ku twisisa mintxhumu hinkwayu leyinene leyi hi nga nayu ha Kriste.
7 Ni ve ni ku nyonxa ni ku tiyisiwa lokukulu loko ni twa hi ta lizrandzru dzraku, hikusa wene makwezru u tiyise timbilu ta vaxwengi.
8 Hi ndlela leyo, nambileswi ni nga ni ntsrhunxeko lowu heleliki ka Kriste wa ku ku byela leswi u fanelaka ku swi yentxa,
9 ni nyonxela ku yentxa hi ku ku tsratsriya hi lizrandzru, hi ku ya hi leswi mine Pawulo ni nga swone, wanuna lweyi a kuliki hi ntanga nakone swoswi a nga xib’otxhwa hi kola ka Kriste Yesu.
10 Ni kombelela n’wananga Onezimu, lweyi ni viki papayi wake na ni li djele.
11 Khale a a nga pfuni ntxhumu kwaku, kambe swoswi i wa lisima kwaku ni kwanga.
12 Ni mu tlhelisela kwaku, ina, yene i mhunu lweyi ni mu zrandzraka ngopfu swinene.
13 A ni navela leswaku a tama a va na mine akuva a ta ni yentxela ntizro lowu wene a wu ta ni yentxela wone leswi ni nga djele hi kola ka madzrungula lamanene.
14 Kambe a ni djuli ku yentxa ntxhumu na ni nge na mpfumelelo waku, akuva wunene byaku byi nga vi hi ku sindzriseka, kambe byi va hi ku swi zrandzra.
15 Swi nga yentxeka a ve leswo swi mu yentxiki a tsravukana na wene swa nkamanyana, akuva u ta tlhela u va na yene hi minkama hinkwayu,
16 na a nga ha li xikazrawa, kambe ku tlula xikazrawa, na a li makwezru lweyi a zrandzrekaka, ngopfungopfu kwanga kambe a zrandzrekaka hi lani ku tlulisaka kwaku, he nyameni ni le Hosini.
17 Loko u ni vona swanga munghanu waku,* mu yamukeli hi ndlela leyinene leyi a wu ta ni yamukela ha yone.
18 Handle ka leswo, loko a ku hoxelile kumbe ku ni leswi a ku devhaka swone, ni ta ku hakela mine.
19 Mine Pawulo, ni swi tsrala hi voko dzranga: Ni ta ku hakela. Nakone a swi djuli ni za ni hlaya leswaku u ni devha nambi wutomi byaku.
20 Ina makwezru, ingiki u nga ni pfuna mhakeni leyi a Hosini; tiyisa mbilu yanga ka Kriste.
21 Na dumba leswaku u ta yentxa leswi ni ku kombelaka swone, xileswo ni ku tsralela na ni swi tiva leswaku u ta yentxa ni swa ku tlula leswi ni ku kombelaka swone.
22 Kambe handle ka leswo, ni kombela u tlhela u ni bekisela mbangu lowu ni taka tlhasela ka wone, hikusa na dumba leswaku hi kola ka swikhongoto swenu ni ta ntsrhunxiwa ni tlhela ni va na n’wine.
23 Epafrasi, xib’otxhwakulozri hi kola ka Kriste Yesu, awa mi dzrungula.
24 Marka, Arixtaku, Demasi na Luka, va nga vatizrikulozri, na vone va mi dzrungula.
25 Ni mi navelela timpswalu letikulu ta Hosi Yesu Kriste hi kola ka moya lowu mi wu kombisaka.
Tintlhamuxelo ta le hansi
^ Hi ku kongoma: “nakuloni”.
