Habakuki 3:1-19
3 Xikhongoto xa muprofeta Habakuki, lexi a xi hambiki hi ndlela ya xidzrilo:
2 We Yehovha, ni twe madzrungula mayelanu na wene.
We Yehovha, ni hlamalisiwa hi mintizro yaku.
A ku fambeni ka malembe,* u tlhela u yentxa mintizro yaku!*
A ku fambeni ka malembe, yentxa leswaku mintizro yaku yi tlhela yi tiviwa.
Ingiki u nga dzrimuka ku hi komba timpswalu loko u vanga hasahasa.
3 Xikwembu Nkulukumba a buye hi le Temani,Lweyi wa ku Xwenga a buye hi le Nhaveni ya Parani. (Sela)*
A wukulu byake byi funekete matilo;A lidzrumu dzrake dzri tate misava.
4 A ku phatima kwake a ku fana ni livaningu.
A vokweni dzrake a ku huma ku hatima ka minseve yibidzri,Lani ntamu wake a wu tumbele kone.
5 A mahlweni kwake a ku famba ntungu,Ni dzedzedze ledzrikulu a dzri mu landzrela.*
6 A yime a tsrekatsrekisa misava.
Loko a lavisa matiko a yentxe leswaku ma tsrekatsreka.
A tinhava leti nga kone ku sukela khale ka khaleni ti gilhitiwile,Nakone a maganga ya khale ma kozramile.
A famba tindleleni ta khale ngopfu swinene.
7 Ni vone tinxanisa a matendeni ya Kuxe.
A tipanu ta matende ya tiko dzra Midiyani ti tsrekatsrekile.
8 We Yehovha, xana we kwatela milambu,Xana we hlundzrukela milambu?
Kumbe we hlundzrukela lwandle?
Hikusa u khwele ka makavhalu yaku;A tin’qolo taku ta yimpi ti hlulile.*
9 U humesa wugubu byaku nakone u lulamele ku txopa.
A matlhazri ma lulamele ku hetisisa xihlambanyu xaku.* (Sela)
Hi ku tizrisa milambu u tsravukanise misava.
10 A tinhava tikonyile hi ku twa ku vavisa loko ti ku vona.
Ku khalute pfula ya yikulu ngopfu swinene a tikweni.
A nsinga wu hamba pongwe.
A mati ya le nsingeni ma tsravukana ma tlakuka ma ya henhla.
11 A dambu ni n’weti swi yimile a mimbangwini ya swone leyi tlakukiki.
A matlhazri yaku ma hume ku fana ni livaningu.
A ndjungwa yaku yi phatima ku fana ni ku dzrindzra ka tilo.
12 U fambafambe a misaveni na u hlundzrukile.
U kandzretele* matiko hi ku hlundzruka.
13 U humile akuva u ya huluxa vhanu vaku, akuva u huluxa muhlawuliwa waku.
U pfotlote muzrangeli wa* yindlu ya lava va ku biha.
Yi helisiwe ku sukela a henhla a wugan’wini ka yone, ku ya tlhasa hansi a masungulweni ya yone.* (Sela)
14 U boxe tinhloko ta valwi vake hi matlhazri lawa a a li na wone,*Loko va ni tele ingiki hi loko vo va xidzedze akuva va ta ni hangalasa.
A va nyonxa hi ku tibyela leswaku va ta helisa mhunu lweyi a xukuvaliki na swi nga tiviwi hi mhunu.
15 Hi makavhalu yaku u tsremakanye lwandle,U khaluta mavimbi ya makulu.
16 Ni swi yingelile ni va ni zruzrumela hi le ndzreni;*A nomu wanga wu tsrekatsreka hi kola ka mpfumawulu.
A ku bola ku nghene a mazrambyini yanga;A milenge yanga yi gudlagudla.
Kambe ni yimela siku dzra nhlomulo na ni zrulile,Hikusa dzri tela lava va hi hlaselaka.
17 Nambiloko nkuwa wu ngo kala wu nga hluki,Nakone ku nga vi na mihandzru a minsinyeni ya mawuvha;Nambiloko a nsinya wa nhlwazri wu nga humesi mihandzru,Ni masimu ma nga bindzruli ntxhumu;Nambiloko a tihamba ti ngo nyamalala a xib’ayeni,Nakone ku nga ha vi na tihomu a xib’ayeni;
18 Kambe loko ku li mine ni ta twalisa Yehovha,Ni ta titsrhavela ka Xikwembu Nkulukumba wa ku huluka kwanga.
19 Yehovha Hosi Leyi Tlakukiki i ntamu wanga;A ta yentxa leswaku milenge yanga yi fana ni ya nhlangu*Nakone a ta ni yentxa ni famba mimbangwini leyi tlakukiki.
Tintlhamuxelo ta le hansi
^ Hi ku kongoma: “A minkameni yezru”.
^ Kumbe: “u yentxa leswaku mintizro yaku yi tlhela yi hanya”.
^ Vona Ntlhamuxelo Wa Mazritu.
^ Hi ku kongoma: “a dzri landzrela maghwansu yake”.
^ Kumbe: “ti hulukile”.
^ Kumbexana: “ku huweleliwa ka xihlambanyu xa tinxaka”.
^ Hi ku kongoma: “u hule”.
^ Hi ku kongoma: “nhloko ya”.
^ Hi ku kongoma: “ka nkolo”.
^ Hi ku kongoma: “hi tinhonga take”.
^ Hi ku kongoma: “a khuzri dzranga dzri zruzrumelile”.
^ Ku hlayiwa xihazri xa kukazri xa ku fananyana ni mhunti.
