Madzrungula Lamanene Lama Tsraliwiki hi Luka 21:1-38
21 Loko Yesu a lavisa, a vona vhanu va ku ganya na va peta mali ka makaxa ya swihanano.*
2 Hiloko a vona wansati wa xisiwana lweyi a feliwiki hi nuna na a peta swimalana swibidzri swa lisima dzritsrongo,*
3 kutani a ku: “Ni mi byela ntiyiso, wansati lweyi wa xisiwana nakone a feliwiki hi nuna a hanane ngopfu ku tlula lavan’wana hinkwavu.
4 Hikusa hinkwavu va hanane leswi va swi pambuliki ka leswi swi va taleliki, kambe yene nambileswi a nga xisiwana* a nyikeli hinkwaswu leswi a a li na swone, leswi a a ta tihanyisa hi swone.”
5 Ntsrhaku ka leswo, na van’we va bulisana hi ndlela leyi tempele dzri xongisiwiki ha yone hi mazribye lamanene ni hi mintxhumu leyi nyikeliwiki ka Xikwembu Nkulukumba,
6 Yesu a ku: “Mayelanu ni mintxhumu leyi mi yi vonaka swoswi, ma ta masiku lawa ku nga tiki sala zribye henhla ka zribye dzrin’wana, ma ta gilhitiwa hinkwawu.”
7 Kutani va mu vutisa va ku: “Mudondzrisi, xana leswo swi ta yentxeka siku muni, nakone xi ta va xini xikombiso xa leswaku mintxhumu leyi yi kusuhi ni ku yentxeka?”
8 Yesu a ku: “Tivonelani leswaku mi nga hambukisiwi, hikusa vanyingi va ta ta hi vito dzranga va ku: ‘Hi mine Kriste’, va tlhela va ku: ‘Nkama lowu bekisiwiki wu kusuhi.’ Mi nga va landzri.
9 Handle ka leswo, loko mi yingela hi ta tiyimpi ni mpfilumpfilu, mi nga txhavi. Hikusa a mintxhumu leyo yi fanela ku zranga yi yentxeka, kambe a wugamu a byi nge ti tekela ku tlhasa.”
10 A ya mahlweni a va byela a ku: “A tiko dzri ta lwisana ni tiko dzrimbeni, ni mfumu wu ta lwisana ni mfumu wumbeni.
11 Ku ta va ni ku tsrekatsreka lokukulu ka misava, nakone a mimbangwini ya ku siyanasiyana ku ta va ni ku pfumaleka ka swakuda ni mintungu; a vhanu va ta vona mintxhumu leyi taka va txhavisa ni swikombiso leswikulu a tilweni.
12 “Kambe na mintxhumu leyo hinkwayu yi nga si na yentxeka, vhanu va ta mi khoma ni ku mi xanisa, va mi nyikela masinagogeni ni le madjele. Mi ta yisiwa a mahlweni ka tihosi ni ka vagovhernadori hi kola ka vito dzranga.
13 Leswo swi ta mi pfulela mukhandlu wa kuva mi nyikela wumboni.
14 Xileswo, mi nga vilelisiwi hi ndlela leyi mi taka va hlamula ha yone akuva mi tiyimelela,
15 hikusa ni ta mi nyika mazritu ni wutlhazri; a valala venu hinkwavu va ta hluleka ku mi kaneta kumbe ku mi hlamula.
16 Handle ka leswo, mi ta nyikeliwa nambi hi vapswele venu, vamakwenu, maxaka ni vanghanu, nakone va ta yentxa leswaku van’we venu va dlayiwa,
17 mi ta nyenyiwa hi vhanu hinkwavu hi mhaka ya vito dzranga.
18 Kambe a mi nge luzekeliwe nambi ku li hi nsisi wun’we a tinhlokweni tenu.
19 Loko mi tiyisela mi ta huluxa wutomi byenu.
20 “Nambitanu, loko mi vona doropa dzra Yerusalema na dzri tsrandzreliwi hi masotxha, swi tivani leswaku a ku helisiwa ka dzrone ku kusuhi.
21 Kutani lava nga a Yudeya a va tsrutsrumeli a tinhaveni, lava nga Yerusalema a va humi, kasi lava nga handle ka Yerusalema va nga ha ngheni,
22 hikusa lawa i masiku ya kuva Xikwembu Nkulukumba a khatisa vhanu* leswaku ku hetiseka hinkwaswu leswi tsraliwiki.
23 Khombo ka vavasati lava va taka va na va ni tinyimba ni lava va taka va na va nyan’wisa a masikwini wolawo! Hikusa ku ta xanisekiwa ngopfu a tikweni nakone vhanu lava va ta khatisiwa.
24 Va ta dlayiwa hi xipada, nakone va ta ya yentxiwa swikazrawa a matikweni hinkwawu; Yerusalema a ta kandzreteliwa hi matiko* ku ya tlhasa loko nkama lowu bekiwiki wa matiko* wu hela.
25 “Nakone ku ta va ni swikombiso ka dambu, ka n’weti ni ka tinyeleti; a misaveni, a matiko ma ta dzrila ma nga xi tivi ni xa ku xi yentxa hi mhaka ya ku dzruma ka lwandle ledzri kwatiki.
26 A vhanu va ta titivala* hi ku txhava ni hi ku lavisela leswi taka yentxeka a misaveni, hikusa a mintamu ya matilo yi ta tsrekatsrekisiwa.
27 Ntsrhaku ka leswo, va ta vona N’wana wa mhunu na a ta hi le tlavini na a ni ntamu ni ku phatima lokukulu.
28 Kambe loko mi vona mintxhumu leyi yi sungula ku yentxeka, wololokani mi tlakuxa tinhloko tenu, hikusa a ku huluxiwa kwenu ka tsrhindzrekela.”
29 Xileswo a va byela xifaniso a ku: “Xiyisisani nsinya wa nkuwa ni minsinya leyin’wana hinkwayu.
30 Loko yi sungula ku hluka, ma swi vona mi tlhela mi swi tiva hi wuswenu leswaku a malanga ma kusuhi.
31 Hi lani ku fanaka, na n’wine loko mi vona mintxhumu leyi yi yentxeka, swi tivani leswaku a Mfumu wa Xikwembu Nkulukumba wu kusuhi.
32 Kunene na mi byela leswaku a lixaka ledzri a dzri nge fi dzri hela na mintxhumu leyi hinkwayu yi nga si na yentxeka.
33 Tilo ni misava swi ta khaluta, kambe a mazritu yanga ma nga ka ma nga khaluti.
34 “Kambe tivonelani leswaku a timbilu tenu ti nga txhuki ti bindzriwa hi ku da ngopfu, ku nwa ngopfu ni hi mivilelo ya wutomi, kutani a siku ledzro dzri suketana dzri mi tlhasela na mi nga swi yimelanga
35 ku fana ni ntlhamu. Hikusa dzri ta wela hinkwavu lava tsrhamaka a misaveni.
36 Kutani tsrhamani na mi zrindzrile, minkama hinkwayu mi kombela ka Xikwembu Nkulukumba akuva mi kota ku huluka ka hinkwaswu leswi fanelaka ku yentxeka ni kuva mi kota ku yima a mahlweni ka N’wana wa mhunu.”
37 Loko byi xa a a dondzrisa tempeleni, kambe loko dzri pela a a ya tsrhama a nhaveni leyi vitaniwaka Nhava ya Minhlwazri.*
38 Nakone vhanu hinkwavu a va mu yela a tempeleni na ka ha li mpundzru akuva va ya mu yingiseta.
Tintlhamuxelo ta le hansi
^ Kumbe: “swa ku peta swihanano ka swone”.
^ Hi ku kongoma: “malepta mabidzri”.
^ Hi ku kongoma: “a pfumalaka”.
^ Kumbe: “i masiku ya ku dzrihisa”.
^ Kumbe: “Vamatiko”.
^ Kumbe: “Vamatiko”.
^ Kumbe: “va ta wutleka”.
^ Leswi liki a a ya yetlela ka xin’we xa swidoropana leswi kumekaka a nhaveni yoleyo.
