Madzrungula Lamanene Lama Tsraliwiki hi Luka 8:1-56
-
Vavasati lava a va fambafamba na Yesu (1-3)
-
Xifaniso xa mudzrimi (4-8)
-
Leswi yentxiki Yesu a tizrisa swifaniso (9, 10)
-
Ku tlhamuxeliwa ka xifaniso xa mudzrimi (11-15)
-
A motsre a wu tlhavikiwi wu gama wu funeketiwa (16-18)
-
Mamana ni vamakwavu va Yesu (19-21)
-
Yesu a miyeta xidzedze (22-25)
-
Yesu a pfumelela mademona leswaku ma ya nghena tinguluveni (26-39)
-
N’wana wa Yayiro wa n’hwanyana; wansati wa kukazri a khumba mpahla ya Yesu (40-56)
8 Ntsrhakunyana ka leswo a yendzra hi doropa ni doropa ni hi xidoropana ni xidoropana a zrezra madzrungula lamanene ya Mfumu wa Xikwembu Nkulukumba. Nakone lava 12 a va li na yene,
2 kun’we ni vavasati va kukazri lava van’we va vone va humesiwiki mademona van’wana va hanyisiwiki mavabyi, ku nga lava: Mariya lweyi a vitaniwaka Magadala, lweyi ku humesiwiki 7 wa mademona kwake;
3 Jowana nsati wa Kuza, wanuna lweyi a a lavisela muti wa Heroda; Suzana ni vavasati van’wana va vanyingi lava a va va pfuna hi mintxhumu yavu.
4 Loko a xitsrhungu lexikulu kun’we ni lava a va mu landzrelela loko a suka ka doropa dzrin’wana ni dzrin’wana va hlengeletanile, Yesu a sungula ku va dondzrisa hi ku tizrisa xifaniso a ku:
5 “A mudzrimi wa kukazri a sukile a ya xuvela mbewu. Loko a li ku xuveleni, timbewu ta kukazri ti wele tlhelweni ka ndlela ti kandzreteliwa, kutani ti diwa hi tinyanyana.
6 Tin’wana ti wele mazribyeni, kutani ntsrhaku ka loko ti milile, ti game ti woma hikusa a ku nga na ntsrhongo.
7 Tin’wana ti wele a xikazri ka mitwa, kutani a mitwa leyi kuliki kun’we na tone yi ti kamanyeta.
8 Kambe tin’wana ti ye wela a misaveni leyinene, kutani loko ti milile ti beka mihandzru hi lani ku phindiwiki ka 100.” Ntsrhaku ka loko a hlaye mintxhumu yoleyo, a hlaya hi zritu dzra ku tlakuka, a ku: “Lweyi a nga ni tindleve ta ku yingela, a a yingiseti.”
9 Kambe a vadondzrisiwa vake va mu vutisa leswaku hi wini ntlhamuxelo wa xifaniso lexi.
10 A va byela a ku: “N’wine mi nyikiwe ku twisisa swihundla swa ku xwenga swa Mfumu wa Xikwembu Nkulukumba, kambe van’wana ni va dondzrisa hi ku tizrisa swifaniso, akuva nambiloko va lavisa, va nga voni ntxhumu, ni loko va swi twa, va nga wu twisisi mongo.
11 A ntlhamuxelo wa xifaniso lexi hi lowu: A mbewu i zritu dzra Xikwembu Nkulukumba.
12 A leti weliki tlhelweni ka ndlela hi lava va yingeliki zritu dzra Xikwembu Nkulukumba, kutani Diyavulosi a ta a teka zritu ledzro a timbilwini tavu akuva va nga kholwi kutani va huluxiwa.
13 Leti weliki mazribyeni, hi lava loko va yingela zritu, va dzri yamukelaka hi ku nyonxa, kambe a va na timitsru. Va pfumela swa nkamanyana kambe loko va kumana ni mindzringo, va tsrhika.
14 Leti ti weliki xikazri ka mitwa, hi lava va yingeliki zritu, kambe hi mhaka ya ku vilela hi wutomi, ku kokiwa hi wukosi, ni ku djula ku tinyonxisa, va kamanyeteka hi ku helela kutani va nga beki mihandzru leyinene.
15 Kasi leti weliki a misaveni leyinene, hi lava loko va yingela zritu hi mbilu leyinene, va dzri bekisaka kutani va pswala mihandzru hi ku tiyisela.
16 “A nga kone lweyi loko a tlhavika motsre a wu funeketaka hi ntxhumu kumbe a wu beka hansi ka mubede, kambe a wu tlhanteka henhla ka menza akuva wu vaningela lava nghenaka.
17 Hikusa a ku na ntxhumu lowu tumbetiwiki lowu taka kala wu nga paluxiwi, nambi lowu fihliwiki ha hombe lowu taka kala wu nga tiviwi ni ku humesiwa a livaleni.
18 Xileswo mi fanela ku yingiseta ha hombe, hikusa lweyi a nga na swone a ta yengeseleliwa swimbeni, kambe lweyi a kalaka a nga li na swone a ta tekeliwa nambileswi a yanakanyaka leswaku a na swone.”
19 Kutani vamakwavu ni mamana wake va mu tela, kambe va hluleka ku tsrhindzrekela kusuhi na yene hi mhaka ya xitsrhungu.
20 Xileswo va mu byela va ku: “Mamana waku ni vamakwenu va yime hala handle, va djula ku ku vona.”
21 A va hlamula a ku: “Mamana wanga ni vamakwezru hi lava va yingelaka zritu dzra Xikwembu Nkulukumba va tlhela va dzri landzra.”
22 Siku dzrin’wana yene kun’we ni vadondzrisiwa vake va nghene botini, kutani a va byela a ku: “A hi tluleleni hi ya ka tlhelo ledzrin’wana dzra lwandle.” Kutani va famba.
23 Kambe na va li ku tsremakanyeni, Yesu a khomiwa hi wuzrongo. Kutani ku va ni xidzedze lexikulu a lwandle, a boti dzravu dzri sungula ku tala hi mati dzri djula ni ku mbombomela.
24 Xileswo va ya mu pfuxa va ku: “Mudondzrisi, Mudondzrisi, ha fa!” Hiloko a pfuka a kawuka moya ni mavimbi, kutani swi miyela, ku va ni ku zrula.
25 Kutani a va vutisa a ku: “Dzri kwini lipfumelo dzrenu?” Kambe a va tale hi ku txhava va tlhela va hlamala, va vutisana va ku: “Kasi i mani mhunu lweyi, wa ku kota ku kawuka nambi ku li moya ni lwandle nakone swi mu yingiseta?”
26 Kutani va tlhasa a nkingeni wa lwandle a mugangeni wa Vagerasa, lowu lavisaniki ni Galileya.
27 Loko Yesu a huma botini, wanuna wa kukazri lweyi a a ni mademona lweyi a a huma doropeni ledzro a mu tela. A ku khalute nkama wa ku leha na a nga yambali ntxhumu, nakone a a nga tsrhami kaya, kambe a a tsrhama masizreni.
28 Loko a vona Yesu a bandlukana a khinsama mahlweni kwake, a hlaya hi zritu dzra ku tlakuka a ku: “U djula yini kwanga wene Yesu, N’wana wa Xikwembu Nkulukumba Lweyi a Tlakukiki Ngopfu? Na ku kombela, u nga ni xanisi.”
29 (Hikusa Yesu a a byeli demona ledzro leswaku dzri huma ka wanuna lweyo. Minkama yinyingi a dzri mu hlasela,* nakone a a tsrhamela ku tsrimbiwa hi matxhini ni hi tinghomondho a tlhela a voneleliwa, kambe a a swi phinya, nakone a demona a dzri mu kongomisa leswaku a ya tsrhama nhoveni.)
30 Yesu a mu vutisa a ku: “Hi wene mani vito dzraku?” A ku: “Ni butsrhu”, hikusa a a ngheniwe hi mademona ya manyingi.
31 Nakone a ma mu kombela leswaku a nga ma zrumi kuva ma ya a xikheleni xa ku yenta.
32 A ku ni ntlhambi wa tinguluve lowu a wu li ku deni a nhaveni, xileswo ma mu kombela leswaku a ma pfumelela kuva ma nghena a tinguluveni, kutani a ma pfumelela.
33 Kutani a mademona ma huma ka wanuna yelweyo ma ya nghena ka tinguluve, a ntlhambi hinkwawu wu tsrutsruma wu ya pela tiveni wu mbombomela.
34 Kambe loko a vabyisi va vona leswi yentxekiki, va tsrutsruma va ya byela vhanu lava tsrhamaka doropeni ni lava a va tsrhama kusuhi ni doropa dzroledzro.
35 Kutani a vhanu va huma akuva va ya vona leswi yentxekiki. Loko va tlhasa lomu Yesu a a li kone va vona wanuna lweyi a humesiwiki mademona, na a yambale mpahla nakone na a hanyisiwile a miyanakanywini, yene a a tsrhame minkondzrweni ya Yesu, kutani va sungula ku txhava ngopfu swinene.
36 Lava va swi voniki va va dzrungulela ndlela leyi wanuna lweyi a a ni mademona a hanyisiwiki ha yone.
37 Kutani vhanu va vanyingi va le tikweni dzra Vagerasa va kombela Yesu leswaku a suka tikweni dzravu, hikusa a va txhava ngopfu swinene. Kutani a khwela boti leswaku a tifambela.
38 Nambitanu, wanuna lweyi a humesiwiki mademona a kombela ku famba na yene, kambe Yesu a mu tlhelisa a ku:
39 “Tlhela u muka kaya, u tama u byela hinkwavu leswi Xikwembu Nkulukumba a ku yentxeliki swone.” Xileswo a tlhela, a sungula ku dzrungula a doropeni hinkwadzru leswi Yesu a mu yentxeliki swone.
40 Loko Yesu a tlhelela a Galileya, a xitsrhungu xi mu yamukela hi ku nyonxa, hikusa hinkwavu a va mu yimelile.
41 Hiloko ku tlhasa wanuna lweyi a vitaniwaka Yayiro; wanuna lweyi a a li muzrangeli wa sinagoga. A tlhasa a khinsama minkondzrweni ya Yesu a sungula ku mu kombela leswaku a famba na yene a kaya kwake,
42 hikusa a xin’hwanyatana xake xa xin’we, lexi a xi ni kolomu ka 12 wa malembe, a xi li kusuhi ni ku fa.
A nkama lowu Yesu a fambaka, a switsrhungu a swi mu kamanyetela.
43 A ku ni wansati lweyi a a ni 12 wa malembe na a ni mavabyi ya ku humetela ngati, nakone a ku vanga na mhunu lweyi a swi kotiki ku mu daha.
44 Kutani a tsrhindzrekelela Yesu hi le ntsrhaku a tlhasa a khumba mponta ya mpahla yake, hi nkama wolowo a ngati yake yi yima ku humetela.
45 Xileswo Yesu a ku: “I mani lweyi a ni khumbiki?” Leswi a ku nga na mhunu lweyi a a pfumela, Petro a ku: “Mudondzrisi, wa swi vona leswaku a switsrhungu swi hi matlhelo hinkwawu nakone swa ku kamanyetela.”
46 Kambe Yesu a ku: “Ku ni lweyi a ni khumbiki, hikusa ni twe ntamu wu huma kwanga.”
47 Loko wansati lweyo a xiya leswaku va mu vonile, a tsrhindzrekela na a zruzrumela a tlhasa a khinsama mahlweni kwake a hlaya mahlweni ka vhanu hinkwavu leswaku ha yini a mu khumbile ni ndlela leyi a hanyisiwiki ha yone hi ku kahlula.
48 Kambe Yesu a mu byela a ku: “N’wananga, a lipfumelo dzraku dzri ku hanyisile. Famba hi ku zrula.”
49 Na a ha vulavula, ku tlhasa muyimeli wa muzrangeli wa sinagoga a ku: “A xin’hwanyatana xaku xi file; u nga ha mu kazrati Mudondzrisi.”
50 Loko Yesu a twa leswo, a byela Yayiro a ku: “U nga txhavi, ntsena kombisa lipfumelo, a xin’hwanyatana xaku xi ta hanya.”
51 Loko a tlhasile mutini, a nga pfumelelanga mhunu leswaku a nghena na yene ndlwini handle ka Petro, Yohane, Yakobe kun’we ni vapswele va xin’hwanyatana.
52 Kambe hinkwavu a va li ku dzrileni, va ti ba ni swifuva hi ku vaviseka hi mhaka ya n’wana lweyi a fiki. Xileswo Yesu a ku: “Yimani ku dzrila, hikusa a xin’hwanyatana lexi a xi fanga kambe xi le ku yetleleni.”
53 Loko va twa leswo, va sungula ku mu hleka, hikusa a va swi tiva leswaku a xin’hwanyatana xi file.
54 Kambe Yesu a xi khoma hi voko a xi yangula a ku: “N’wananga, pfuka!”
55 A xin’hwanyatana xi pfuka* xi sekeleka hi ku kahlula, kutani a va byela leswaku va xi nyika swakuda.
56 A vapswele va xone a va nga ha tikoti hi ku nyonxa, kambe a va byela leswaku va nga byeli mhunu leswi yentxekiki.
Tintlhamuxelo ta le hansi
^ Kumbexana: “A ku khalute nkama wa ku leha na dzri mu hlasela”.
^ Hi ku kongoma: “A moya wa xone wu tlhelela ka xone”.
