Mintizro ya Vapostola 2:1-47
2 Hi siku dzra Nkhuvu wa Pentekoxta, hinkwavu a va hlengeletani mbangwini wun’we.
2 Ku suketana ku twala pongwe na dzri pfa tilweni, dzra ku fana ni ku hunga ka moya wa wukulu ngopfu swinene, dzri tata yindlu hinkwayu leyi a va tsrhame ka yone.
3 Kutani va vona tindzrimi leti fanaka ni ndzrilo, hiloko ti yavana, lidzrimi ha dzrin’we dzri tsrhama henhla ka mun’wana ni mun’wana wavu,
4 xileswo hinkwavu va tala hi moya wa ku xwenga va sungula ku vulavula hi tindzrimi ta ku siyanasiyana, hi lani moya wa Xikwembu Nkulukumba a wu va kongomisa ha kone.
5 Hi nkama wolowo a Vayuda lava txhavaka Xikwembu Nkulukumba lava humaka a matikweni ya ku hambanahambana ya misava a va li Yerusalema.
6 Xileswo loko ku twale mpfumawulu wolowo, a xitsrhungu xi hlengeletani na xi hlamala, hikusa mun’wana ni mun’wana wavu a a yingela vadondzrisiwa na va vulavula hi lidzrimi dzrake.
7 Nakunene xi hlamale ngopfu kutani xi ku: “Hinkwavu lava vulavulaka a hi Vagalileya lava?
8 Kutani swi kotekisa kuyini kuva mun’wana ni mun’wana wezru a va yingela hi lidzrimi dzrake?*
9 A makazri kwezru ku ni Vaparta, Vamedo, Vaelamita, vayaki va le Mezopotamiya, Yudeya, Kapadokiya, Ponto, xifundzra xa le Aziya,
10 Frigiya, Pamfiliya, Egipta, va le migangeni ya Libiya kusuhi ni Kirene, vayendzri lava pfaka hi le Roma, Vayuda, Vaproselita,
11 Vakreta ni Vaarabiya; hinkwezru hi va yingela na va khanela hi mintxhumu leyi tlakukiki ya Xikwembu Nkulukumba hi tindzrimi tezru.”
12 Ina, hinkwavu va hlamale ngopfu va tlhela va pfilunganyeka, va vutisana va ku: “Swi hlaya yini leswi?”
13 Nambitanu, van’wana va va poyila va ku: “Ve popswa lava.”
14 Kambe Petro a sekeleka kun’we ni lava 11 a va byela hi zritu dzra ku tlakuka a ku: “Vavanuna va le Yudeya na n’wine hinkwenu mi tsrhamaka Yerusalema, zreyani ndleve mi ma yingiseta ha hombe mazritu yanga.
15 Ku hlaya ntiyiso, vhanu lava a va popswanga hi lani mi yanakanyaka ha kone, hikusa ka ha li ma 9 wora.*
16 Ku hambana ni leswo, leswi hi leswi hlayiwiki hi muprofeta Yuwele loko a ku:
17 ‘“A masikwini ya wugamu”, ku hlaya Xikwembu Nkulukumba, “ni ta txhulula moya wanga ka vhanu hinkwavu, kutani vana venu va xinuna ni va xisati va ta profeta, vana venu va madjaha va ta vona swivoniso nakone vavanuna lava kuliki va ta va ni milozro;
18 a masikwini wolawo ni ta txhulula moya wanga nambi ka malandzra yanga ya xinuna ni malandzra yanga ya xisati, kutani ma ta profeta.
19 Ni ta yentxa mintxhumu ya ku hlamalisa a henhla tilweni, ni mahlolana a hansi misaveni—mintxhumu yoleyo ku ta va ngati, ndzrilo ni matlavi ya ximusi.
20 Na siku ledzrikulu dzra ku phatima dzra Yehovha dzri nga si na tlhasa, a dambu dzri ta ndzrulutiwa dzri va munyama ni n’weti wu ta pshwuka wu fana ni ngati.
21 Kutani mun’wana ni mun’wana lweyi a vitanaka vito dzra Yehovha a ta huluxiwa.”’
22 “Vavanuna va Israyele, yingisetani mazritu lawa: Yesu wa Munazareta a a li mhunu lweyi a zrumiwiki hi Xikwembu Nkulukumba. Leswo swi tikombe hi mintxhumu ya ku hlamalisa ni mahlolana lawa Xikwembu Nkulukumba a ma yentxiki a makazri kwenu hi ku tizrisa yene, hi lani na n’wine mi swi tivaka ha kone.
23 Wanuna lweyi, lweyi a nyikeliwiki leswaku a hetisisa leswi a swi bohiwile nakone Xikwembu Nkulukumba a a swi tiva ha khale, mi mu gongondzrele mhandzrini hi ku tizrisa vadohi, mi mu dlaya.
24 Kambe Xikwembu Nkulukumba a mu pfuxile a mu ntsrhunxa ka ntamu* wa lifu, hikusa a swi nge ti koteka kuva a lifu dzri tama dzri mu khoma.
25 Hikusa Davhida a hlaya leswi mayelanu na yene: ‘Minkama hinkwayu ni beka Yehovha mahlweni kwanga, hikusa a le vokweni dzranga dzra xinene, akuva ni nga txhuki ni tsrekatsrekisiwa.
26 Hi mhaka ya leswo, a mbilu yanga yi nyonxe ngopfu ni lidzrimi dzranga dzri tsrhave ngopfu. Futsrhi ni ta hanya na ni ni dumbo;
27 hikusa a wu nge ti ni tsrhika a Sizreni,* nambi ku pfumelela leswaku nandzra waku lweyi a dumbekaka a bola.
28 U ni yentxe ni tiva tindlela ta wutomi; u ta ni yentxa ni nyonxa ngopfu mahlweni kwaku.’
29 “Vavanuna, vamakwezru, ni pfumelelani ni vulavula na ni ntsrhunxekile mayelanu na mupatriyarka Davhida: hi lani mi swi tivaka ha kone a file a va a lahliwa, nakone a sizra dzrake dzra ha li kone makazri kwezru ku ta tlhasa namunhla.
30 Leswi a a li muprofeta nakone a a swi tiva leswaku Xikwembu Nkulukumba a mu hlambanyele leswaku mun’we ka vana* vake a ta tsrhama xiluvelweni xake,
31 a vone ku pfuxiwa ka Kriste na ku nga si na yentxeka a va a khanela ha kone, a hlaya leswaku a nge ti tsrhikiwa a Sizreni* nambi mizri wake a wu nge ti bola.
32 Xikwembu Nkulukumba a mu pfuxile Yesu, nakone hine hinkwezru hi timboni ta swone leswo.
33 Kutani leswi a tlakuxiwiki a bekiwa vokweni dzra xinene dzra Xikwembu Nkulukumba a va a yamukela moya wa ku xwenga lowu Papayi a wu dumbisiki, yene a wu txhulule kwezru hi lani mi swi vonaka ha kone ni ku swi yingela.
34 Hikusa Davhida a nga tlhantukelanga tilweni kambe yene ha wuswake a te: ‘Yehovha a byele Hosi yanga a ku: “Tsrhamisa vokweni dzranga dzra xinene
35 ku ya tlhasa loko ni beka valala vaku va va wunalavutelo bya minkondzro yaku.”’
36 Xileswo, a Vaisrayele hinkwavu a va swi tive leswaku kunene Yesu lweyi mi mu dlayiki mhandzrini, Xikwembu Nkulukumba a mu yentxe Hosi ni Kriste.
37 Loko va twa leswo, va vaviseka timbilwini tavu kutani va vutisa Petro ni vapostola lavan’wana va ku: “Vavanuna, vamakwezru, hi fanela ku yentxa yini?”
38 Petro a va byela a ku: “Tisolani, nakone mun’wana ni mun’wana wenu a a babatisiwi hi vito dzra Yesu Kriste akuva mi ta dzrivaleliwa swidoho swenu, kutani mi ta yamukela moya wa ku xwenga lowu Xikwembu Nkulukumba a wu nyikelaka hi mahala.
39 Hikusa xidumbiso lexi, Yehovha Xikwembu Nkulukumba wezru a xi yentxele n’wine, vanenu, hinkwavu lava nga mimbangwini ya le kule, ni hinkwavu lava a tivitanelaka vone.”
40 A ye mahlweni a nyikela wumboni lebyi heleliki a tlhela a va tsratsriya a ku: “Titsravukanisani ni lixaka ledzri dzra ku biha.”
41 Xileswo, lava va ma yamukeliki hi mbilu hinkwayu mazritu lawa a ma hlayiki va babatisiwile, kutani hi siku dzroledzro ku yengeseleka 3.000 wa vhanu.
42 Va ye mahlweni va yamukela leswi vapostola a va va dondzrisa swone, va hanyisana, va da xikan’we, ni ku tlhela va khongota xikan’we.
43 Nakunene, vapostola va sungule ku yentxa mintxhumu yinyingi ya ku hlamalisa ni mahlolana kutani hinkwavu va sungula ku txhava.
44 Hinkwavu lava viki vapfumeli a va hlengeletane kun’we nakone a va yavelana hinkwaswu leswi a va li na swone,
45 a va xavisa mimbangu yavu ni mintxhumu hinkwayu leyi a yi va lumba, va teka mali ya kone va yavela hinkwavu, va nyika mun’wana ni mun’wana hi ku ya hi xivileleko xake.
46 Siku ni siku a va hlengeletana a tempeleni hi nkongometo wun’we, a va tlhela va zrambanana leswaku va da swakuda makaya kwavu, va nyikana swakuda na va nyonxe ngopfu swinene nakone na swi sukela mbilwini,
47 va dzrumisa Xikwembu Nkulukumba va tlhela va nyonxeliwa hi vhanu hinkwavu. Nakone siku ni siku Yehovha a a va yengesela vhanu lava a a va huluxa.
Tintlhamuxelo ta le hansi
^ Kumbe: “lidzrimi dzra mapswaliwa”.
^ Hi ku kongoma: “wora dzra wuzrazru”.
^ Kumbexana: “mapindzra”; Hi ku kongoma: “swivavu”.
^ Kumbe: “Hayidesi”, ku nga sizra ledzri tolovelekiki dzra vhanu. Vona Ntlhamuxelo Wa Mazritu.
^ Hi ku kongoma: “mbewu”.
^ Kumbe: “Hayidesi”, ku nga sizra ledzri tolovelekiki dzra vhanu. Vona Ntlhamuxelo Wa Mazritu.
