Mintizro ya Vapostola 22:1-30
22 “Vavanuna, vamakwezru, na n’wine vapapayi, ni yingisetani loko ni mi tlhamuxela mhaka yanga.”
2 Loko va twa leswaku a vulavula na vone hi lidzrimi dzra Xiheberu, va ya mahlweni va zrula ngopfu swinene, kutani a ku:
3 “Ni Muyuda lweyi a pswaliwiki a Tarso wa le Kilikiya, kambe ni dondzrisiwe hi Gamaliyele a doropeni dzrodzri, ni dondzrisiwe ku landzra Nawu wa vakokwana ha hombe, ni ku hisekela Xikwembu Nkulukumba hi lani na n’wine hinkwenu mi yentxaka ha kone namunhla.
4 Ni xanise lava a va landzrela Ndlela leyi ni va dlaya, ni tsrimba vavanuna ni vavasati ni va pfalela madjele,
5 hi lani muprista lwenkulu ni nhlengeletanu hinkwayu ya vakulu va nga nyikelaka wumboni ha kone. Vone va ve va ni nyiketa ni mapapela akuva ni ya ma nyikela ka vamakwezru a Damaska, nakone a ni le ndleleni ya ku ya khoma lava a va li kohala ni va buyisa a Yerusalema na va tsrimbiwile akuva va ta khatisiwa.
6 “Kambe na ni le ku fambeni, a nhlikanhini, na ni le kusuhi ni ku tlhasa a Damaska, ku tekela ku va ni ku vaninga lokukulu loku pfaka hi le tilweni ku ni tsrandzrela,
7 ni gama ni wa hansi, ni twa zritu dzri ni yangula dzri ku: ‘Sawulo, Sawulo, u ni xanisela yini?’
8 Ni hlamule ni ku: ‘Hi wene mani Hosi?’ Yene a ku: ‘Hi mine Yesu wa Munazareta, lweyi u mu xanisaka.’
9 Vavanuna lava a va li na mine va dzri vonile livaningu, kambe a va dzri twanga zritu dzra lweyi a a vulavula na mine.
10 Xileswo ni vutise ni ku: ‘Ni fanele ni yentxa yini Hosi?’ A Hosi yi ni byela yi ku: ‘Sekeleka u nghena Damaska, u ta byeliwa hinkwaswu leswi u fanelaka ku swi yentxa.’
11 Kambe leswi a ni nga ha swi koti ku vona hi mhaka ya ku phatima ka livaningu ledzro, ni tlhase a Damaska na no khungisiwa hi voko hi lava a va li na mine.
12 “Kutani wanuna wa kukazri lweyi a vitaniwaka Ananiya, lweyi a a txhava Xikwembu Nkulukumba a tlhela a landzra Nawu, nakone a Vayuda hinkwavu lava a va hanya kohala a va vulavula ha hombe hi yene,
13 a ni telile. A tlhasa a yima lani a ni li kone a ni byela a ku: ‘Sawulo makwezru, tlhela u vona!’ Kutani hi nkama wolowo ni lavisa henhla ni mu vona.
14 A ku: ‘Xikwembu Nkulukumba wa vakokwana vezru a ku hlawule akuva u tiva ku zrandzra kwake u tlhela u vona lwe wa ku lulama u twa ni zritu dzrake,
15 hikusa u fanela ku va mboni yake ka vhanu hinkwavu, ya mintxhumu leyi u yi voniki ni ku yi yingela.
16 Kutani ha yini u hlwela? Sekeleka u babatisiwa, u hlampswa swidoho swaku hi ku vitana vito dzrake.’
17 “Kambe loko ni tlhelele a Yerusalema, nakone na ni le ku khongoteni a tempeleni, ni tikume ingiki no lozra
18 kutani ni vona Hosi na yi ni byela yi ku: ‘Kahlula u huma swoswi a Yerusalema, hikusa a va nge ti byi yamukela wumboni byaku mayelanu na mine.’
19 Ni game ni ku: ‘Hosi, va swi tiva ha hombe leswaku a ni talisa ku famba sinagogeni dzrin’wana ni dzrin’wana ni pfalela ni tlhela ni ba lava a va pfumela kwaku;
20 nakone nkama lowu a va dlaya mboni yaku Stefanu a ni li kohala ni seketela leswi a va swi yentxa ni tlhela ni vonelela mpahla ya lava a va mu dlaya.’
21 Nambitanu, yi ni byele yi ku: ‘Famba, hikusa ni ta ku zrumela ka vhanu va matiko a mimbangwini ya le kule.’”
22 Va mu yingisetile ku ya tlhasa loko a hlaya mazritu lawo. Kambe va gama va tlakuxa mazritu yavu va ku: “Susani wanuna lweyi a misaveni, hikusa a nga faneliwi hi ku hanya!”
23 Leswi a va hamba pongwe va tlhela va txukumetela timpahla tavu va pfuxa ni ntsrhuzri,
24 a muzrangeli wa yimpi a zruma masotxha leswaku ma buyisa Pawulo a bazini dzra wone a tlhela a hlaya leswaku a fanela ku thethisiwa na a biwa, akuva a ta kota ku swi kumisisa ha hombe leswaku ha yini vhanu va bandlukana hi ndlela liyani mayelanu na Pawulo.
25 Kambe loko kutani va mu tsrimbile akuva va mu ba, Pawulo a vutisa muzrangeli wa masotxha lweyi a a yime kolanu a ku: “A nawu wa mi pfumelela kuva mi ba Muroma* na a nga si na thethisiwa?”*
26 Loko muzrangeli wa masotxha a twa leswo, a yela muzrangeli wa yimpi a tlhasa a mu byela a ku: “U djula ku yentxa yini? Phela wanuna lweyi i Muroma!”
27 Xileswo a muzrangeli wa yimpi a tsrhindzrekelela Pawulo a mu vutisa a ku: “Hi nga ni byela, u Muroma wene?” Pawulo a ku: “Ina.”
28 A muzrangeli wa yimpi a hlamula a ku: “Ni hakele mali ya yinyingi akuva ni va Muroma.” Pawulo a ku: “Kambe mine nhe pswaliwa na ni li Muroma.”
29 Xileswo vavanuna lava a va djula ku mu thethisa na va mu ba; va mu tsrhika va suka kwake hi ku kahlula, kutani a muzrangeli wa yimpi a txhava loko a gungula leswaku i Muroma ni hi leswi a a mu tsrimbe hi matxhini.
30 Xileswo hi mundzruku ka kone, leswi a muzrangeli wa yimpi a a djula ku swi kumisisa ha hombe leswaku ha yini Vayuda va lumbeta Pawulo, a mu ntsrhunxa a va a byela vaprista lavakulu kun’we ni Sanedri hinkwadzru akuva va hlengeletana. Kutani a buyisa Pawulo a tlhasa a mu yimisa makazri kwavu.
Tintlhamuxelo ta le hansi
^ Kumbe: “muyakitiko wa le Roma”.
^ Kumbe: “na a nga si na voniwa nandzru?”
