Mintizro ya Vapostola 24:1-27
24 Loko ku khaluta 5 wa masiku, muprista lwenkulu Ananiya a famba ni vakulu kun’we ni adivhogado lweyi a vitaniwaka Tertulu, va tlhasa va byela govhernadori leswi va lumbetaka Pawulo ha swone.
2 Loko Tertulu a nyikiwa zritu, a sungula ku lumbeta Pawulo a mahlweni ka Felekisi, a ku:
“Ha ku tlangela hi leswi hi hanyaka hi ku zrula, nakone leswi u fumaka hi wutlhazri a tiko dzrezru dzra hluvuka.
3 Nkulukumba Felekisi, hine minkama hinkwayu kun’wana ni kun’wana lani hi nga kone hi swi tlangela ngopfu swinene leswi u swi yentxaka.
4 Kambe akuva ni nga ku deli nkama, ni kombela u hi lehisela mbilu u hi yingiseta swa nkamanyana.
5 Hikusa hi kume leswaku wanuna lweyi i ntungu,* a hlohlotela Vayuda hinkwavu a misaveni hinkwayu akuva va pfukela mfumu nakone hi yene muzrangeli wa ntlawa wa madukwa ya Vanazareta.
6 A dzringise ni ku nyamisa tempele, kutani hi mu khoma.
7 *——
8 Loko wo mu vutisa ha wuswaku, u ta swi xiya leswaku hinkwaswu leswi hi swi hlayaka mayelanu na yene i ntiyiso.”
9 Xileswo a Vayuda na vone va seketela, va hlaya leswaku mhaka leyo i ntiyiso.
10 Loko govhernadori a kwehleta Pawulo leswaku a hlaya swa kukazri, Pawulo a mu hlamula a ku:
“Leswi ni swi tivaka ha hombe leswaku u ni malembe manyingi na u yavanyisa tiko ledzri, na nyonxa hi ku va ni tihlamulela mahlweni kwaku.
11 Hi lani loko u ngo vutisa u nga swi kumaka ha kone, a ku si na khaluta 12 wa masiku na ni ye gandzrela a Yerusalema;
12 a va ni kumanga na ni holovisana ni mhunu nambi ku hlohlotela xitsrhungu a tempeleni, a sinagogeni kumbe a doropeni.
13 Nakone nambi ko va vone a va nge swi koti ku ku komba switiyisekiso swa mintxhumu hinkwayu leyi va ni lumbetaka yone.
14 Kambe na pfumela a mahlweni kwaku leswaku ni tizrela Xikwembu Nkulukumba wa vakokwana nakone na kholwa ka hinkwaswu leswi tsraliwiki a Nawini ni le ka mabuku ya Vaprofeta, ku nga leswi vone va swi vonaka ku li wudukwa.
15 Nakone ni ni dumbo ka Xikwembu Nkulukumba, ku nga dumbo ledzri na vone va nga na dzrone, dzra leswaku lava lulamiki ni lava kalaka va nga lulamanga va ta pfuxiwa a ku feni.
16 Hi mhaka ya leswo, minkama hinkwayu ni tikazratela ku va ni lipfalu ledzri basiki* a mahlweni ka Xikwembu Nkulukumba ni le ka vhanu.
17 Ntsrhaku ka malembe manyingi ni tile akuva ni ta nyikela mali ni pfuna tiko dzranga kun’we ni kuva ni ta nyikela magandzrelo.
18 Na na ha lulamisa timhaka leti, nakone na ni le ku tibasiseni hi ku ya hi xihena, va ni kume tempeleni kambe a ni nge na xitsrhungu kumbe ku vanga mpfilumpfilu. Nambitanu a ku ni Vayuda va kukazri va xifundzra xa Aziya
19 lava loko a li leswaku vhela va ni swa ku ni lumbeta ha swone a va ta va va li kone lani akuva va ta swi hlaya mahlweni kwaku.
20 Kumbe u tsrhika vavanuna lava yimiki lani va hlaya leswaku i yini xa ku biha va xi kumiki kwanga a nkama na va ni thethisa a mahlweni ka huvo ya Sanedri.
21 Lexi va nga xi hlayaka ko va mazritu lawa ni ma hlayiki na ni yime makazri kwavu ya ku: ‘Ni lani mahlweni kwenu namunhla ni yavanyisiwa hi mhaka ya leswi ni kholwaka ka ku pfuka ka vafi!’”
22 Kambe leswi Felekisi a a yi tiva ha hombe Ndlela leyi ya ntiyiso, a va mukisa a ku: “A mhaka yenu ni ta yi tsrema loko ku tlhasa Liziya muzrangeli wa yimpi.”
23 Kutani a zruma muzrangeli wa masotxha leswaku a pfalela Pawulo a djele kambe a mu nyikanyana ntsrhunxeko, a tlhela a pfumelela vanghanu vake leswaku va mu pfuna ka swivileleko swake.
24 Ntsrhaku ka masikunyana Felekisi a tlhasa ni nkatake Drusila, lweyi a a li Muyuda, kutani a vitana Pawulo a mu yingiseta loko a tlhamuxela leswaku swi hlaya yini ku pfumela ka Kriste Yesu.
25 Kambe loko Pawulo a vulavula mayelanu ni wululami, ku tikhoma ni wuyavanyisi lebyi taka, Felekisi a sungula ku txhava a gama a ku: “Swoswi pfana u famba, kambe ni ta tlhela ni ku vitana hi nkama wumbeni loko ni kuma nkama.”
26 A hlaye leswo na a tibyela leswaku Pawulo a a ta mu nyika mali. Xileswo nkama ni nkama a a tsrhamela ku mu vitana akuva a ta bulisana na yene.
27 Kambe loko ku khalute malembe mabidzri, Felekisi a pfaletiwe xitsrhan’wini xake xa wuhosi hi Porkiyu Fextu; kutani leswi Felekisi a a djula ku nyonxeliwa hi Vayuda, a tsrhike Pawulo a djele.
Tintlhamuxelo ta le hansi
^ Kumbe: “muhlohloteli wa madzolonga”.
^ Mazritu ya ndzrimana leyi a ma kone ka matsralwa ya khale.
^ Kumbe: “ku va lweyi a pfumala nandzru”.
