Mintizro ya Vapostola 26:1-32
26 Agripa a byela Pawulo a ku: “U ntsrhunxekile kuva u tihlamulela.” Xileswo Pawulo a tlakuxa voko a va a sungula ku vulavula a ku:
2 “Hosi Agripa na nyonxa hi ku va lani mahlweni kwaku, akuva namunhla ni ta tihlamulela mayelanu ni hinkwaswu leswi Vayuda va ni lumbetaka swone,
3 ngopfungopfu leswi u swi tivaka ha hombe swihena hinkwaswu swa Vayuda ni leswi va phikisanaka ha swone. Xileswo ni kombela kuva u ni lehisela mbilu u ni yingiseta.
4 “Nakunene ndlela leyi a ni hanya ha yone ku sukela a wumpshweni byanga ka valekwezru* kun’we ni le Yerusalema, a Vayuda hinkwavu va yi tiva ha hombe
5 nakone i khale va ni tiva, loko va swi djula va nga ku byela leswaku a ni li wa ntlawa wa Vafarisi. Nakone hi lani u swi tivaka ha kone ntlawa lowu wu ni milawu ya ku bindzra ngopfu swinene ku tlula ya Vayuda lavan’wana.
6 Kambe swoswi ni le ku thethisiweni hi mhaka ya leswi ni yimelaka ku hetiseka ka swidumbiso leswi Xikwembu Nkulukumba a swi dumbisiki vakokwana vezru;
7 lexi hi xo xidumbiso xa xin’we lexi tinxaka tezru ta 12 ti yimelaka ku xi vona xi hetiseka hi ku tikazratela ku mu yentxela ntizro wa ku xwenga wusiku ni nhlikanhi. Lexi yentxaka Vayuda va ni lumbeta hi xo xidumbiso lexi, we Hosi.
8 “Ha yini mi yanakanya leswaku a swi koteki kuva Xikwembu Nkulukumba a pfuxa vafi?
9 Phela na mine a ni tiyimisele ku yentxa hinkwaswu leswi ni nga swi kotaka akuva ni lwisana na Yesu wa Munazareta.
10 Hi swoleswo nakunene ni swi yentxiki a Yerusalema, ni pfalele vapfumeli vanyingi a madjele, hikusa a ni nyikiwe mpfumelelo hi vaprista lavakulu; nakone loko swi djula kuva va dlayiwa, na mine a ni yima na swone.
11 A ni famba hi sinagoga ni sinagoga ni va xanisa na ni zama ku va landzrulisa lipfumelo; nakone leswi a ni va hlundzrukele ngopfu swinene ni patsre ni ku va yela madoropeni ya le kule ni ya va xanisa.
12 “Na ni le ndleleni ya ku ya Damaska na ni zrumiwe hi vaprista lavakulu akuva ni ya yentxa ntizro lowu,
13 we Hosi, na ni le ndleleni a nhlikanhini, ni vona ku vaninga kun’wana ka ku phatima ngopfu swinene ku tlula dambu loku pfaka hi le tilweni, ku ni tsrandzrela ku tlhela ku tsrandzrela ni lava a va li na mine.
14 Kutani loko hinkwezru hi we hansi, ni twe zritu dzri ni yangula hi Xiheberu dzri ku: ‘Sawulo, Sawulo, u ni xanisela yini? Phela wo tivavisa loko u lwisana na mine.’*
15 Kambe ni ku: ‘Hi wene mani Hosi?’ Kutani a Hosi yi ku: ‘Hi mine Yesu lweyi u mu xanisaka.
16 Kambe sekeleka u yima. Ni humelele kwaku akuva ni ta ku hlawula leswaku u va nandzra wanga ni mboni ya leswi u swi voniki ni leswi na ha taka ku yentxa u swi vona mayelanu na mine.
17 Nakone ni ta ku huluxa ka vhanu lava ni ka matiko lawa ni ku zrumelaka ka wone
18 akuva u ta va pfula matihlo, u va susa munyameni va ya ku vaningeni u tlhela u va susa ka wulawuli bya Sathana va ya ka bya Xikwembu Nkulukumba, akuva hi ku kombisa lipfumelo kwanga va ta kota ku dzrivaleliwa swidoho va tlhela va kuma pfindla ledzri taka kumiwa hi lava xwengiki.’
19 “Hi ndlela leyo Hosi Agripa, ni yingisete leswi ni byeliwiki swone a xivonisweni lexi ni xi voniki na xi pfa hi le tilweni,
20 kambe ku sungula ni yeli va le Damaska, ntsrhaku ni yela va le Yerusalema, ni gama ni yela hinkwavu va muganga wa le Yudeya, kun’we ni ka vamatiko, ni va yisela dzrungula dzra leswaku va fanela ku tisola va gandzrela Xikwembu Nkulukumba hi ku yentxa mintizro leyi kombisaka leswaku va tisola.
21 Hi leswo swi yentxiki leswaku a Vayuda va ni khoma a tempeleni va tlhela va zama ku ni dlaya.
22 Kambe ku ta tlhasa namunhla, hi ku pfuniwa hi Xikwembu Nkulukumba ni tama ni zrezrela lavatsrongo ni lavakulu ni va byela ntsena leswi vaprofeta kun’we na Moxe va hlayiki leswaku a swi ta yentxeka,
23 ku nga leswaku Kriste a a ta xaniseka ni leswaku swanga hi leswi a nga wa ku sungula ku pfuxiwa ka lava fiki, a a ta huwelela livaningu ka vhanu lava kun’we ni ka vamatiko.”
24 Na Pawulo a ha tihlamulela hi ku hlaya mintxhumu leyo, Fextu a hlaya hi zritu dzra ku tlakuka a ku: “Wa hlanya Pawulo! A ku dondzra ngopfu swa ku hlanyisa!”
25 Kambe Pawulo a ku: “A ni hlanyi nkulukumba Fextu, kambe ni vulavula ntiyiso nakone leswi ni swi hlayaka swa twisiseka.
26 Nakunene a hosi leyi ni vulavulaka na yone na ni ntsrhunxekile yi yi tiva ha hombe mintxhumu leyi; na tiyiseka leswaku a ku na ntxhumu ni wun’we lowu yi kalaka yi nga wu tivi mhakeni leyi hikusa a xi kone ni xin’we ka swone xi yentxiwiki a xihundleni.
27 Hosi Agripa wa swi kholwa leswi hlayiwiki hi vaprofeta? Na swi tiva leswaku wa swi kholwa.”
28 Kambe Agripa a byela Pawulo a ku: “A wu ta ni ndzruluta mukriste hi nkamanyana wutsrongo.”
29 Xileswo Pawulo a ku: “Ni khongota ka Xikwembu Nkulukumba leswaku ku hlwela kumbe ku kahlula, ku nga vi wene ntsena kambe ni hinkwavu lava va ni yingelaka namunhla va nga va vakriste ku fana na mine, kambe na va nga tsrimbiwanga hi matxhini lawa.”
30 Kutani a hosi yi sekeleka na ye govhernadori na Bereniki kun’we ni vavanuna lava a va tsrhame na vone.
31 Kambe nkama lowu va humaka, va byelana va ku: “Wanuna lweyi a nga yentxanga ntxhumu lexi nga mu yentxaka a faneliwa hi lifu kumbe ku pfaleliwa a djele.”
32 Kutani Agripa a byela Fextu a ku: “Wanuna lweyi a a ta va a ntsrhunxiwile loko a a nga kombelanga ku yisiwa ka Khezari.”
Tintlhamuxelo ta le hansi
^ Kumbe: “a tikweni dzranga”.
^ Hi ku kongoma: “hi ku khavetela nhonga”. Ku hlayiwa nhonga leyi nga ni swinsimbana swa ku tlhavana a wungan’wini ka yone, leyi tizriseliwaka ku byisa swihazri.
