Mintizro ya Vapostola 28:1-31
28 Loko hi hulukile hi game hi tiva leswaku xihlale lexo xi vitaniwa Melita.
2 A vhanu va kohala, va hi kombe wunene lebyikulu.* Leswi a ku na mpfula ku tlhela ku va ni xizrami, hinkwezru va hi yamukele hi ndlela leyinene va tlhela va hi tlhavikela ni ndzrilo.
3 Kambe loko Pawulo a hlengelete swihunyahunyana a swi txhela ndzrilweni, ku humelele nyoka leyi nga ni mahlungu hi ku twa ku hisa, yi titsrondzriyela vokweni dzrake yi mu luma.
4 Loko vahanyi va mbangu wolowo va vona nyoka leyi nga ni mahlungu na yi titsrondzriyeli vokweni dzrake, va sungula ku byelana va ku: “Nakunene wanuna lweyi i mudlayi, nambileswi a hulukiki lwandle, Wululami* a nga swi djuli ku mu tsrhika a hanya.”
5 Nambitanu, Pawulo a hlakahla nyoka yoleyo a ndzrilweni, nambileswi yi mu lumiki a yi mu vavisanga.
6 Kambe vone a va yimele leswaku a pfimba kumbe a tekela ku fa. Kambe ntsrhaku ka loko ku khalute nkama wa ku leha na a nga yentxekeliwi hi ntxhumu xa ku biha, va txintxa miyanakanyu yavu va sungula ku hlaya leswaku Pawulo i xikwembu.
7 Kusuhi ni mbangu wolowo a ku ni masimu lawa a ma lumba muzrangeli wa xihlale xolexo lweyi a vitaniwaka Publiyu, a hi yamukele hi malwandla, hi tsrhama kaya kwake ku dzringana masiku mazrazru.
8 Ku yentxeke leswaku papayi wa Publiyu a a li mubedeni hi leswi a a vabya, a a ni dzedzedze a tlhela a hluphiwa hi ndzreni,* kutani Pawulo a mu yela a tlhasa a khongota, a mu tlhanteka mavoko a mu hanyisa.
9 Ntsrhaku ka loko ku yentxeke leswo, vhanu van’wana va le xihlaleni lava a va vabya, na vone va yele Pawulo va ya hanyisiwa.
10 Va tlhele va hi tlangela hi ku hi hanana mintxhumu ya yinyingi, nakone nkama lowu a hi tilulamisela kuva hi famba va hi longelele hinkwaswu leswi a hi swi vilela.
11 Ntsrhaku ka tihweti tizrazru, hi suke hi famba hi boti dzra le Alexandriya, a boti ledzro a dzri hete wuxika hinkwabyu a xihlaleni xolexo nakone a dzri tsraliwe leswaku: “Vana va Zewusi.”
12 Loko hi tlhasa mpolwa ya Sirakusa, hi tsrhame kone ku dzringana masiku mazrazru;
13 loko hi suka lanu hi fambe hi ya tlhasa Regiyo. Ntsrhaku ka siku dzrin’we ku be moya wa le nyingitimu kutani hi tlhasa Puteyoli hi siku dzra wubidzri.
14 Kone hi tlhase hi kuma vamakwezru lava hi tsratsriyiki ku tsrhama na vone ku dzringana 7 wa masiku, ntsrhaku ka leswo hi suke hi kongoma Roma.
15 Loko vamakwezru va le Roma va twa leswaku ha buya, va hi tlhangaveta ka bazara dzra Apiyu ni le mbangwini lowu vitaniwaka Mawotela Mazrazru. Loko Pawulo a va vona, a tlangela Xikwembu Nkulukumba a tiya nhlana.
16 Loko hi wugamu hi tlhasa Roma, Pawulo a pfumeleliwa ku tsrhama wuswake na a voneleliwa hi sotxha.
17 Nambitanu, ntsrhaku ka masiku mazrazru Pawulo a vitane vavanuna va ndhuma va Vayuda. Loko va hlengeletanile a va byela a ku: “Vavanuna, vamakwezru, nambileswi ni kalaka ni nga yentxanga ntxhumu lowu lwisanaka ni vhanu kumbe swihena swa vakokwana vezru, ni khomiwile a Yerusalema ni tlhela ni nyikeliwa a mavokweni ya Varoma.
18 Ntsrhaku ka loko va ni thethisile, va djule ku ni humesa hikusa a ku nga na xivangelo xa kuva ni dlayiwa.
19 Kambe loko Vayuda va yala kuva ni ntsrhunxiwa, ni sindzriseke ku kombela leswaku mhaka yanga yi yisiwa ka Khezari, kambe ku nga li hi leswaku a no va ni xa ku mangalela tiko dzranga ha xone.
20 Xileswo ni kombele ku mi vona ni vulavula na n’wine, hikusa ni tsrimbiwe hi matxhini lawa hi mhaka ya dumbo ledzri Vaisrayele va nga na dzrone.”
21 Va mu byela va ku: “A hi zanga hi yamukela mapapela ya le Yudeya lama vulavulaka hi wene, nambi ku li vamakwezru lava tiki a va hlayanga ntxhumu kumbe ku vulavula ku biha ha wene.
22 Kambe hi vona swi li swinene kuva hi ku yingiseta hi twa leswi u swi yanakanyaka, hikusa nakunene leswi hi swi tivaka hi wukhongoti lebyo lebyimpshwa* hi leswaku ku vulavuliwa ha byone a mimbangwini hinkwayu.”
23 Kutani va bekisa siku akuva va tlhangana na yene, loko dzri tlhasile, va mu yela lomu a a tsrhamisa kone na va yengeselekile va li vanyingi ngopfu swinene. A va tlhamuxela ni ku nyikela wumboni hi ku helela hi ta Mfumu wa Xikwembu Nkulukumba hi ku tizrisa Nawu wa Moxe ni leswi tsraliwiki hi Vaprofeta, ku sukela a mixweni dzri za dzri ya pela, akuva a va kholwisa ka Yesu.
24 Van’wana va sungula ku kholwa leswi a a swi hlaya kambe van’wana a va nga kholwi.
25 Xileswo leswi a va nga pfumelelani, va sungula ku humetela, kutani Pawulo a hlaya leswi:
“A moya wa ku xwenga a wu tiyisile loko hi ku tizrisa muprofeta Ezaya wu byela vakokwana venu,
26 wu ku: ‘Famba u ya byela vhanu lava u ku: “Nakunene mi ta yingela kambe a mi nge ti swi twisisa nikutsrongo, nakunene mi ta lavisa kambe a mi nge ti swi vona nikutsrongo.
27 Hikusa a timbilu ta vhanu lava ti tlanyalile, va tipfale tindleve tavu ni matihlo yavu leswaku va nga txhuki va vona hi matihlo yavu, leswaku va nga yingeli hi tindleve tavu ni leswaku va nga twisisi hi timbilu tavu xileswo va txintxa, kutani mine ni va daha.”’
28 Kutani swi tivani leswaku madzrungula ya ndlela leyi Xikwembu Nkulukumba a va huluxaka ha yone vhanu, ma zrumeliwe ka vamatiko; vone nakunene va ta ma yingiseta.”
29 *——
30 Xileswo a tame a tsrhama ku dzringana malembe mabidzri ka yindlu leyi a a yi lugarile, nakone hinkwavu lava a va mu yendzrela a swi koteka kuva a va yamukela hi ndlela leyinene,
31 a va zrezrela hi ta Mfumu wa Xikwembu Nkulukumba ni ku va dondzrisa hi ta Hosi Yesu Kriste na a nga txhavi ntxhumu* futsrhi na ku nga na lexi mu sivelaka.
Tintlhamuxelo ta le hansi
^ Kumbe: “va kombise wumhunu”.
^ Hi Xigriki: Díke, kumbexana ku hlayiwa xikwembu xa xisati xa ku yentxa wululami hi ku dzrihisela kumbe byo wululami hi ndlela ya ku fanekisela.
^ Hi ku kongoma: “zenteriya”.
^ Kumbe: “hi wudukwa lebyo”.
^ Mazritu ya ndzrimana leyi a ma kone ka matsralwa ya khale.
^ Kumbe: “na a ntsrhunxekile ngopfu swinene”.
