Mintizro ya Vapostola 3:1-26
3 Petro na Yohane a va tlhantukela tempeleni hi nkama wa xikhongoto, kolomu ka ma 15 wora,*
2 hi nkama wolowo a ku tlakuliwe wanuna wa kukazri lweyi a pswaliwiki na a limalile. Siku ni siku a va mu beka kusuhi ni nyangwa wa tempele lowu vitaniwaka Nyangwa wa ku Xonga, akuva a kota ku kombela zimola ka lava a va nghena tempeleni.
3 Kutani loko a vona Petro na Yohane na va nghena tempeleni, a sungula ku va kombela zimola.
4 Kambe Petro na Yohane va mu lavisisa, kutani Petro a ku: “Hi lavise.”
5 Xileswo a va lavisisisa, na a yimela leswaku va mu nyika swa kukazri.
6 Nambitanu, Petro a mu byela a ku: “A ni na prata a ni na woru, kambe ni ta ku nyika leswi ni nga na swone. Hi vito dzra Yesu Kriste wa Munazareta, sekeleka u famba!”
7 Xileswo, a mu khoma hi voko dzra xinene a mu sekelekisa, hi nkama wolowo a milenge yake yi tiya;
8 kutani a sekeleka hi ku kahlula, a sungula ku famba a nghena na vone tempeleni, a famba na a ntlulantlula a tlhela a dzrumisa Xikwembu Nkulukumba.
9 Vhanu hinkwavu va mu vonile na a fambafamba a tlhela a dzrumisa Xikwembu Nkulukumba.
10 Va va va swi xiya leswaku a ku li wanuna lweyi a a talisa ku tsrhamisa a kombela zimola ka nyangwa lowu vitaniwaka Nyangwa wa ku Xonga wa tempele, kutani va hlamala ngopfu swinene va tlhela va txhava hi ku vona leswi swi mu yentxekeliki.
11 Na wanuna yelweyo a ha khome Petro na Yohane, vhanu hinkwavu va tsrutsruma va va yela a mbangwini lowu vitaniwaka Ndlela ya Solomoni, na va hlamale ngopfu swinene.
12 Loko Petro a vona leswo, a byela vhanu volavo a ku: “Vavanuna va Israyele, ha yini mi hlamalisiwa hi leswi, nakone ha yini mi hi lavisa ingiki hi mu yentxi a famba hi ntamu wezru kumbe hi ku tinyiketela kwezru ka Xikwembu Nkulukumba?
13 Xikwembu Nkulukumba wa Abrahamu, Izaki na Yakobe, Xikwembu Nkulukumba wa vakokwana vezru, a tlakuxe Nandzra wake, Yesu, lweyi n’wine mi nga mu nyikela mi tlhela mi mu yala a mahlweni ka Pilatu nambileswi Pilatu a a kunguhate ku mu ntsrhunxa.
14 Ina, mi yale wanuna lweyi a a xwengile a tlhela a lulama, mi kombela ku ntsrhunxeliwa wanuna lweyi a a li mudlayi,
15 mi gama mi dlaya Muzrangeli wa wutomi. Kambe Xikwembu Nkulukumba a mu pfuxile a ku feni, nakone hine hi timboni ta swone.
16 Wanuna lweyi mi mu vonaka nakone mi mu tivaka, a tiyisiwe hi kola ka vito dzra Yesu ni hi lipfumelo ledzri hi nga na dzrone ka vito dzra Yesu. A lipfumelo ledzri hi nga na dzrone ka Yesu, dzri yentxe leswaku wanuna lweyi a hanyisiwa mahlweni kwenu hinkwenu.
17 Kutani vamakwezru, na swi tiva leswaku n’wine ni tihosi tenu mi yentxe leswi hi ku pfumala wutivi.
18 Kambe hi ndlela yoleyo Xikwembu Nkulukumba a hetisise leswi a nga swi hlaya khale hi ku tizrisa vaprofeta hinkwavu, ku nga leswaku Kriste wake a a ta xaniseka.
19 “Xileswo tisolani, mi txintxa mahanyela yenu, akuva swidoho swenu swi timiwa ku yentxela leswaku Yehovha a ta mi nyika ku wisa
20 ni leswaku a zrumela Yesu, ku nga Kriste lweyi a mi hlawuleliki yene.
21 Yene a fanela ku tama a tsrhama tilweni ku ya tlhasa loko ku pfuxetiwa mintxhumu hinkwayu leyi Xikwembu Nkulukumba a yi hlayiki hi ku tizrisa nomu wa vaprofeta vake va ku xwenga va khale.
22 Nakunene Moxe a te: ‘A makazri ka vamakwenu, Yehovha Xikwembu Nkulukumba wenu a ta mi hlawulela muprofeta wa ku fana na mine. Mi fanela ku yingiseta hinkwaswu leswi a mi byelaka swone.
23 Ina, lweyi a kalaka a nga mu yingiseti Muprofeta lweyo, a ta helisiwa a makazri ka vhanu va Xikwembu Nkulukumba.
24 Nakone vaprofeta hinkwavu lava vulavuliki, ku sukela ka Samuwele ku ya mahlweni, na vone va vulavule hi ku khanya mayelanu ni masiku lawa.
25 N’wine mi vana va vaprofeta ni va xipfumelelanu lexi Xikwembu Nkulukumba a xi hambiki ni vakokwana venu, loko a byela Abrahamu a ku: ‘A mindangu hinkwayu ya misava yi ta tovokisiwa hi ku tizrisa vanaku.’*
26 Ntsrhaku ka loko Xikwembu Nkulukumba a hlawule Nandzra wake, ku sungula a mu zrumele kwenu akuva a ta mi tovokisa hi ku mi tsrhikisa mintizro yenu ya ku biha.”
Tintlhamuxelo ta le hansi
^ Hi ku kongoma: “hi wora dzra wu 9”.
^ Hi ku kongoma: “hi ku tizrisa mbewu yaku”.
