Mpfuletelo Lowu Yamukeliwiki Hi Yohane 11:1-19
11 Kutani ni nyiketiwa lihlanga dzra ku fana ni nhonga* ni gama ni byeliwa leswi: “Sekeleka u pima tempele* dzra Xikwembu Nkulukumba ni altari kun’we ni lava va gandzrelaka a tempeleni.
2 Kambe a gqeke ledzri nga handle ka tempele dzri tsrhiki, u nga dzri pimi hikusa dzri nyikiwe vamatiko, kutani va ta pswanyetela doropa dzra ku xwenga ku dzringana 42 wa tihweti.
3 Ni ta yentxa leswaku timboni tanga tibidzri ti profeta ku dzringana 1.260 wa masiku na ti yambale mpahla ya xidzrilo.”
4 Tone ti fanekiseliwa hi minsinya yibidzri ya minhlwazri ni mimotsre yibidzri nakone ti yime a mahlweni ka Hosi ya misava.
5 Loko mhunu wa kukazri a djula ku vavisa timboni leto, a minon’wini ya tone ku ta huma ndzrilo wu helisa valala va tone. Loko mhunu wa kukazri a djula ku vavisa timboni leto, a fanela ku dlayiwa hi ndlela yoleyo.
6 Tone ti ni ntamu wa ku pfala tilo akuva ku nga ni mpfula ku dzringana masiku lawa ti taka profeta ha wone, ti ni ntamu wa ku ndzruluta mati ma va ngati ni wa ku ba misava hi mintungu ya mixaka hinkwayu hi lani ti djulaka ha kone.
7 Loko ti gama ku profeta a xihazri xa nhova lexi humaka hi le xikheleni xa ku yenta, xi ta lwa yimpi na tone xi ti hlula xi tlhela xi ti dlaya.
8 A mintsrumbu ya tone yi ta va ka xitaratu lexikulu xa doropa ledzrikulu, lani a Hosi ya tone na yone yi dlayeliwiki kone a mhandzrini. A doropa ledzro hi ndlela ya ku fanekisela dzri vitaniwa Sodoma ni Egipta.
9 Kutani a vhanu va tinhlonge ta ku siyanasiyana, tinxaka, tindzrimi ni matiko va ta lavisa mintsrumbu ya tone ku dzringana masiku mazrazru ni hamfu nakone a va nge ti pfumela leswaku mintsrumbu ya tone yi lahliwa.
10 Lava tsrhamaka misaveni va ta nyonxa va tlhela va kulungela hi mhaka ya lifu dzra tone, nakone va ta zrumelelana tinyiko hikusa vaprofeta lavabidzri va xanise lava tsrhamaka misaveni.
11 Loko masiku lawayani ya mazrazru ni hamfu ma khalutile, a moya wa wutomi lowu pfaka ka Xikwembu Nkulukumba wu nghene ka timboni leto, ti va ti sekeleka ti yima, kutani lava va ti voniki va teliwa hi ku txhava lokukulu.
12 Ti gama ti yingela zritu ledzrikulu na dzri pfa hi le tilweni dzri ti byela dzri ku: “Tlhantukelani halenu.” Kutani ti tlhantukela tilweni hi le matlavini na ti voniwa* hi valala va tone.
13 Hi nkama wolowo ku va ni ku tsrekatsreka lokukulu ka misava, a doropa dzri yavana hi 10 wa swiyenge ku gama ku wa xiyenge xin’we; a ku tsrekatsreka koloko ku dlaya 7.000 wa vhanu, lava hulukiki va teliwa hi ku txhava lokukulu va va va dzrumisa Xikwembu Nkulukumba wa le tilweni.
14 A khombo dzra wubidzri kutani dzri khalutile. Kambe a khombo dzra wuzrazru dzra ta hi ku kahlula.
15 A ntsrumi ya wu 7 yi txhaya xipalapala xa yone. Kutani a tilweni ku twala mazritu na ma huwelela, ma ku: “A mfumu wa misava swoswi wu lumba Xikwembu Nkulukumba wezru ni lweyi a mu hlawuliki leswaku a va Kriste, nakone a ta fuma hi masiku ni masiku.”*
16 Kutani a vakulu lava 24 lava a va tsrhame ka swiluvelo swavu a mahlweni ka Xikwembu Nkulukumba, va khinsama va lavisa hansi va gandzrela Xikwembu Nkulukumba,
17 va ku: “Ha ku tlangela Yehovha Xikwembu Nkulukumba, wene wa Ntamu Hinkwawu, lweyi a nga kone nakone a viki kone, hikusa u titekele ntamu waku lowukulu u va u sungula ku fuma.
18 Kambe a matiko ma hlundzrukile, kutani u kombisa mahlundzru yaku, nakone ku tlhase nkama lowu bekisiwiki wa leswaku a vafi va yavanyisiwa, nkama lowu bekisiwiki wa leswaku ku hakeliwa vaprofeta lava ku tizrelaka, vaxwengi kun’we ni lava va txhavaka vito dzraku, lava nga ka swiyimu swa le hansi kun’we ni lava nga ka swiyimu leswi tlakukiki, ni nkama lowu bekisiwiki wa leswaku u helisa lava honaka* misava.”
19 Hiloko a tempele* dzra Xikwembu Nkulukumba a tilweni dzri pfuleka, kutani ni vona areka dzra xipfumelelanu xake a tempeleni dzrake. Ku gama ku va ni lihati, ku twala mazritu, swingwalangwandzra, ku va ni ku tsrekatsreka ka misava ni mazralana lamakulu.
Tintlhamuxelo ta le hansi
^ Kumbe: “nhonga ya ku pima ha yone”.
^ Ku hlayiwa muyaku wa le tempeleni lowu ka wone ku kumekaka Mbangu wa ku Xwengisisa ni Mbangu wa ku Xwenga.
^ Kumbe: “na ti lavisiwa”.
^ Ku hlayiwa Xikwembu Nkulukumba.
^ Kumbe: “u hohlota lava hohlotaka”.
^ Ku hlayiwa Mbangu wa ku Xwengisisa wa le tempeleni.
