Mpfuletelo Lowu Yamukeliwiki Hi Yohane 12:1-17
12 Kutani ni vona xiyentxakalu xa ku hlamalisa* a tilweni xa wansati lweyi a a yambale dambu, a hansi ka minkondzro yake a ku ni n’weti, a nhlokweni yake a ku ni hazri leyi hambiwiki hi 12 wa tinyeleti,
2 nakone a a ni nyimba. Futsrhi leswi a a li kusuhi ni ku phuluka a a dzrila hi zritu ledzrikulu hi mhaka ya swivavu swa ku lun’wa.
3 Ni tlhela ni vona xiyentxakalu xin’wana xa ku hlamalisa a tilweni xa dragona ledzrikulu dzra muvala wa ndzrilo, ledzri a dzri ni 7 wa tinhloko ni 10 wa timhondzro, nakone a tinhloko ta dzrone a ti ni 7 wa tihazri ta wuhosi;*
4 a nkila wa dzrone wu koke tinyeleti ta tinyingi ta le tilweni, wu ti txukumetela hansi a misaveni. A dragona a dzri tama dzri yima mahlweni ka wansati lweyi a a li kusuhi ni ku phuluka, akuva loko a phuluka dzri hahlulela n’wanake.
5 Hiloko wansati a pswala n’wana wa djaha lweyi a taka byisa matiko hinkwawu hi nhonga ya nsimbi. Kutani a n’wanake a wutliwa* a yisiwa ka Xikwembu Nkulukumba lweyi a a li xiluvelweni xake.*
6 Wansati yelweyo a tsrutsruma a ya mananga, lani a nga ni mbangu lowu lulamiseliwiki hi Xikwembu Nkulukumba nakone a a ta wundleliwa kone ku dzringana 1.260 wa masiku.
7 Kutani ku pfuka yimpi a tilweni: Mikayele* kun’we ni tintsrumi take va lwa ni dragona, na dzrone dragona dzri lwa na vone na dzri ni tintsrumi ta dzrone
8 kambe dzrone ni tintsrumi ta dzrone va hluliwile, nakone a va ha pfumeleliwanga ku tama va tsrhama a tilweni.
9 Xileswo a dragona ledzrikulu, ku nga nyoka ya khale, leyi vitaniwaka Diyavulosi na Sathana, leyi yi kanganyisaka misava hinkwayu, yi txukumeteliwe misaveni kun’we ni tintsrumi ta yone.
10 Kutani ni twa zritu ledzrikulu a tilweni dzri ku:
“Xikwembu Nkulukumba wezru a tisele vhanu ku huluxiwa, a ntamu wake wu kombekisiwile, a Mfumu wake wu simekiwile, ni wulawuli bya Kriste wake byi sungulile, hikusa a mulumbeti wa vamakwezru, lweyi a va lumbetaka wusiku ni nhlikanhi a mahlweni ka Xikwembu Nkulukumba wezru a txukumeteliwe hansi!
11 Va mu hlule hi mhaka ya ngati ya Xihambana ni hi kola ka dzrungula ledzri va dzri zrezriki, nakone a va tiyimisele nambi ku nyikela wutomi byavu* va fa.
12 Hi kola ka leswo, nyonxani n’wine matilo na n’wine mi tsrhamaka ka wone! Kambe khombo ka misava ni lwandle, hikusa Diyavulosi a xikele kwenu na a hlundzruke ngopfu swinene, hi ku tiva leswaku a nkama lowu wu mu saleliki i wutsrongo.”
13 Loko dragona dzri vona leswaku dzri txukumeteliwe misaveni, dzri xanisa wansati lweyi a pswaliki n’wana wa djaha.
14 Kambe wansati yelweyo a nyikiwa timpapa tibidzri ta gama ledzrikulu akuva a haha a ya mbangwini wake a mananga, lani a a ta wundleliwa kone ku dzringana nkama, minkama yibidzri ni hamfu ya nkama,* na a li kule ni nyoka.
15 Kutani a nyoka yi kampfula mati ya ku fana ni nambu a ntsrhaku ka wansati yelweyo, akuva a ta mbombomela a nambyeni.
16 Kambe a misava yi ya mu pfuna, yi pfula nomu wa yone yi minta nambu lowu kampfuliwiki hi dragona.
17 Xileswo, a dragona dzri hlundzrukela wansati, dzri suka dzri ya lwa yimpi ni vana vake lava saliki, lava landzraka milawu ya Xikwembu Nkulukumba nakone va nga ni ntizro wa ku nyikela wumboni mayelanu na Yesu.
Tintlhamuxelo ta le hansi
^ Hi ku kongoma: “hlolana”. Ku hlayiwa xiyentxakalu lexi nga ni nthamuxelo wa ku fanekisela.
^ Hi ku kongoma: “7 wa madiyadema”.
^ Kumbe: “a tekiwa”.
^ Ku hlayiwa xiluvelo xa Xikwembu Nkulukumba.
^ Leswi tlhamuxelaka leswaku “I Mani Lweyi A Fanaka Na Xikwembu Nkulukumba?”
^ Hi ku kongoma: “mahika yavu”. Vona Ntlhamuxelo Wa Mazritu.
^ Hi ku kongoma: “nkama, minkama ni hamfu ya nkama”. Ku hlayiwa minkama yizrazru ni hamfu.
