Mpfuletelo Lowu Yamukeliwiki Hi Yohane 13:1-18
13 A dragona dzri yima misaveni ya le lwandle dzri ku tsetsezrele.
Kutani ni vona xihazri xa nhova na xi huma hi le lwandle, na xi ni 10 wa timhondzro ni 7 wa tinhloko, ka timhondzro ta xone a ku ni 10 wa tihazri ta wuhosi,* kambe ka tinhloko ta xone a ku ni mavito lama zrukaka Xikwembu Nkulukumba.*
2 A xihazri xa nhova* lexi ni xi voniki a xi fana ni yingwe,* kambe a minkondzro ya xone a yi fana ni ya bere,* a nomu wa xone a wu fana ni nomu wa nghonyama.* Kutani a dragona dzri nyika xihazri a ntamu wa xone ni xiluvelo kun’we ni wulawuli lebyikulu.
3 Ni vone leswaku yin’we ya tinhloko ta xone a yi tikomba na yi vavisiwe ngopfu swinene, kambe a xilondzra xa xone xa ku txhavisa xi dahiwile, nakone a misava hinkwayu a yi xi hlamala yi va yi xi landzrela.
4 Yi gandzrela dragona hi leswi dzri nyikiki xihazri wulawuli, yi tlhela yi gandzrela xihazri xa nhova hi mazritu lawa: “I mani lweyi a fanaka ni xihazri xa nhova, nakone i mani lweyi a nga lwaka na xone?”
5 A xihazri xa nhova xi nyikiwe ntamu wa ku tikhuza ni ku vulavula mintxhumu ya ku biha mayelanu na Xikwembu Nkulukumba, xi tlhela xi nyikiwa ntamu wa kuva xi tiyentxela ku zrandzra ku dzringana 42 wa tihweti.
6 Kutani xi pfula nomu wa xone xi vulavula mintxhumu ya ku biha mayelanu na Xikwembu Nkulukumba, xi zruka vito dzrake ni mbangu lowu a tsrhamaka ka wone, ku patsra ni lava va tsrhamaka tilweni.
7 Xi pfumeleliwe ku lwa ni vaxwengi xi va hlula, nakone xi nyikiwe wulawuli henhla ka tinxaka hinkwatu, tinhlonge hinkwatu, tindzrimi hinkwatu ni matiko hinkwawu.
8 Hinkwavu lava tsrhamaka a misaveni va ta xi gandzrela, ku nga lava ku sukela a ku sunguleni ka misava a mavito yavu ma kalaka ma nga tsraliwanga a bukwini dzra wutomi ledzri lumbaka Xihambana lexi a xi dlayiwile.
9 Lweyi a nga ni tindleve a a yingeli.
10 Loko swi djula leswaku mun’we wenu a yisiwa djele a a yi. Lweyi a dlayaka hi xipada, a fanela ku dlayiwa hi xipada. Xileswo a vaxwengi va fanela ku tiyisela ni ku va ni lipfumelo.
11 Kutani ni vona xihazri xin’wana xa nhova na xi huma hi ka misava, a xi ni timhondzro tibidzri ta ku fana ni ta xihambana, kambe xi sungula ku vulavula ku fana ni dragona.
12 Xi tizrisa ntamu wa xone lowu fanaka ni wa xihazri xa nhova xa ku sungula na xi li mahlweni ka xihazri xolexo. Nakone xi yentxa leswaku a misava hinkwayu ni vhanu hinkwavu va gandzrela xihazri xa ku sungula, lexi a xilondzra xa xone xa ku txhavisa xi dahiwiki.
13 Xi yentxa mahlolana lamakulu na vhanu va xi vona, nambi ku yentxa leswaku a tilweni ku xika ndzrilo wu ta misaveni.
14 Xi kanganyisa lava tsrhamaka misaveni, hi mhaka ya mahlolana lawa xi pfumeleliwiki ku ma yentxa a mahlweni ka xihazri xa nhova, handle ka leswo, xi byela lava tsrhamaka misaveni leswaku va hamba a xithombe xa xihazri xa nhova lexi a xi ni xilondzra lexi vangeliwiki xone hi xipada kambe xi hulukiki.
15 A xihazri xa wubidzri xa nhova xi pfumeleliwe kuva xi nyika wutomi* a xithombe xa xihazri xa nhova xa ku sungula, akuva xihazri xa nhova xi kota ku vulavula ni ku dlaya hinkwavu lava kalaka va nga xi gandzreli xithombe.
16 Xi sindzrisa vhanu hinkwavu, lavatsrongo ni lavakulu, swipfundzri ni swisiwana, vhanu lava ntsrhunxekiki ni lava nga swikazrawa, leswaku va fungiwa ka mavoko yavu ya xinene kumbe a mimombyeni yavu.
17 Ni leswaku ku nga vi na mhunu lweyi a xavaka kumbe ku xavisa na a nga na mfungu, ku nga vito dzra xihazri xa nhova kumbe nhlayu ya vito dzra xone.
18 A mhaka leyi yi djula wutlhazri: Lweyi a nga ni ku twisisa a a gunguli nhlayu ya xihazri xa nhova, hikusa i nhlayu ya mhunu, nakone a nhlayu ya xone i 666.
Tintlhamuxelo ta le hansi
^ Hi ku kongoma: “10 wa madiyadema”.
^ Hi ku kongoma: “mavito ya swizruku”.
^ Kumbe: “xivandzrana”.
^ Kumbe: “leopardo”.
^ Kumbe: “urso”.
^ Kumbe: “ndzrawu”.
^ Hi ku kongoma: “ku hefemula”.
