Mpfuletelo Lowu Yamukeliwiki Hi Yohane 17:1-18
-
Ku yavanyisiwa ka “Babilona Lwenkulu” (1-18)
17 Yin’we ya tintsrumi ta 7 leti a ti tamele 7 wa swibya yi ni telile yi tlhasa yi ni byela yi ku: “Tana ni ta ku komba ku yavanyisiwa ka nghwavana leyikulu leyi tsrhamiki henhla ka mati ya manyingi,
2 leyi a tihosi ta misava ti yentxiki swa tingana hi tlhelo dzra tinkuku* na yone, nakone yi yentxiki leswaku lava tsrhamaka a misaveni va popswa hi vhinyu dzra yone, ledzri fanekiselaka swiyentxo swa yone swa tingana hi tlhelo dzra tinkuku.”*
3 Hiloko a ntsrumi yi ni teka hi ntamu wa moya yi ni yisa a mananga. Kutani ni vona wansati na a tsrhamise ka xihazri xa nhova* xa ku pshwuka, lexi a xi tale hi mavito lama zrukaka Xikwembu Nkulukumba* nakone a xi ni 7 wa tinhloko ni 10 wa timhondzro.
4 Wansati yelweyo a a yambale mpahla ya ku dula, a tlhela a tixongisa hi woru, mazribye ya lisima ni maperola, nakone a vokweni dzrake a a tamele kopo dzra woru ledzri a dzri tale hi mintxhumu ya ku nyenyentsa ni hi mintxhumu leyi kalaka yi nga basanga ya swiyentxo swake swa tingana hi tlhelo dzra tinkuku.*
5 Ka ximombo xake a ku tsraliwe vito ledzri nga xihundla, ledzri liki: “Babilona Lwenkulu, mamana wa tinghwavana ni wa mintxhumu ya ku nyenyentsa ya misava.”
6 Ni vone leswaku wansati yelweyo a a popswile hi ngati ya vaxwengi ni hi ngati ya timboni ta Yesu.
A nkama ni nga mu vona ni hlamale ngopfu swinene.
7 Xileswo a ntsrumi yi ni byela yi ku: “U hlamala yini? Ni ta ku byela xihundla xa wansati lweyi kun’we ni xa xihazri xa nhova lexi a tsrhamiki ka xone lexi nga ni 7 wa tinhloko ni 10 wa timhondzro:
8 A xihazri xa nhova lexi u xi voniki a xi li kone, kambe a xa ha li kone, nambitanu ku nga li khale xi ta huma a xikheleni xa ku yenta xi gama xi helisiwa. Kutani a vhanu lava tsrhamaka a misaveni, lava ku sukela a ku tumbuluxiweni ka misava a mavito yavu ma kalaka ma nga tsraliwanga a bukwini dzra wutomi, va ta hlamala loko va vona leswaku a xihazri xa nhova a xi li kone kambe a xa ha li kone, nambitanu xi tlhela xi va kone.
9 “A mhaka leyi yi djula wutlhazri ni ku twisisa:* A 7 wa tinhloko ti fanekisela 7 wa tinhava, leti a wansati a tsrhamiki henhla ka tone.
10 Ku ni 7 wa tihosi: Ntlhanu wa tone ti wile, yin’we yi kone, leyin’wana a yi si na tlhasa; kambe loko yi tlhasa, yi to pfumeleliwa ku tsrhama swa nkamanyana.
11 A xihazri xa nhova lexi a xi li kone kambe xi kalaka xi nga ha li kone, i hosi ya wu 8, nambitanu xi huma hi ka tihosi leta 7, nakone xi ya ku helisiweni.
12 “A 10 wa timhondzro leti u tivoniki ti fanekisela 10 wa tihosi leti kalaka ti nga si na sungula ku fuma, kambe ti ta yamukela wuhosi akuva ti fuma ku dzringana nkamanyana kun’we ni xihazri xa nhova.
13 A tihosi leti ti ni miyanakanyu yin’we, xileswo ti nyika xihazri xa nhova ntamu wa tone ni wulawuli.
14 Ti ta lwa ni Xihambana, kambe leswi xone xi nga Hosi ya tihosi ni Mufumi wa vafumi, xi ta ti hlula. Ni lava va nga na xone, ku nga lava vitaniwiki, va hlawuliwiki nakone va dumbekaka, va ta ti hlula.”
15 A ntsrumi yi ni byela leswi: “A mati lawa u ma voniki, lawa a nghwavana yi tsrhamiki henhla ka wone, ma fanekisela vhanu, switsrhungu, matiko ni tindzrimi.
16 A 10 wa timhondzro leti u tivoniki, ni xihazri xa nhova, swi ta nyenya nghwavana swi yi tekela mintxhumu ya yone hinkwayu swi tlhela swi yi siya na yi nga yambalanga ntxhumu, nakone swi ta da nyama ya yone swi va swi yi hisa hi ndzrilo hi ku helela.
17 Hikusa Xikwembu Nkulukumba a ti nyike miyanakanyu ya ku yentxa ku zrandzra kwake, ina, ya kuva ti hetisisa miyanakanyu ya tone leyi fanaka hi ku nyikela wuhosi bya tone ka xihazri xa nhova, ku ya tlhasa loko mazritu ya Xikwembu Nkulukumba ma hetiseka.
18 Kutani a wansati lweyi u mu voniki a fanekisela doropa ledzrikulu ledzri fumaka tihosi ta misava.”
Tintlhamuxelo ta le hansi
^ Vona Ntlhamuxelo Wa Mazritu.
^ Hi Xigriki: porneía. Vona Ntlhamuxelo Wa Mazritu.
^ Kumbe: “xivandzrana”.
^ Hi ku kongoma: “mavito ya swizruku”.
^ Hi Xigriki: porneía. Vona Ntlhamuxelo Wa Mazritu.
^ Kumbe: “wutivi”.
