Mpfuletelo Lowu Yamukeliwiki Hi Yohane 19:1-21
19 Ntsrhaku ka leswo, ni yingela zritu ledzrikulu a tilweni, ledzri a dzri tikomba dzri li zritu dzra xitsrhungu lexikulu. A xi ku: “Dzrumisani Yah!* Xikwembu Nkulukumba wezru i muhuluxi, awa phatima nakone a ni ntamu.
2 Hikusa a wuyavanyisi byake i bya ntiyiso nakone byi lulamile, a yavanyise nghwavana leyikulu, leyi honiki misava hi swiyentxo swa yone swa tingana hi tlhelo dzra tinkuku* nakone a dzrihisele ngati ya malandzra yake leyi wansati yelweyo a yi halatiki hi mavoko yake.”
3 A xitsrhungu lexikulu xi tekela ku hlaya hi khambi dzra wubidzri xi ku: “Dzrumisani Yah!* A ximusi xa ku hisiwa ka Babilona xi tama xi mpunkuka hi masiku ni masiku.”
4 Kutani a vakulu va 24 ni swivumbiwa swa mune leswi hanyaka, va khinsama va gandzrela Xikwembu Nkulukumba lweyi a tsrhamiki xiluvelweni va ku: “Amen! Dzrumisani Yah!”*
5 Ku tlhela ku twala zritu na dzri pfa hi le xiluvelweni dzri ku: “Dzrumisani Xikwembu Nkulukumba wezru, n’wine malandzra yake hinkwenu, lawa ma mu txhavaka, lavatsrongo ni lavakulu.”
6 Kutani ni twa leswi a swi twala ingiki i zritu dzra xitsrhungu lexikulu, ni leswi a swi twala ingiki i mpfumawulu wa mati ya manyingi kun’we ni leswi a swi twala ingiki i mpfumawulu wa swingwalangwandzra leswikulu, swi ku: “Dzrumisani Yah,* hikusa Yehovha Xikwembu Nkulukumba wezru, Lweyi a nga wa Ntamu Hinkwawu, a sungule ku fuma!
7 A hi nyonxeni hi nyonxisisa hi tlhela hi mu dzrumisa, hikusa a mutxhatu wa Xihambana wu tlhasile nakone a nsati wa xone a tilulamiselile.
8 Ina, a nsati wa xone a pfumeleliwe ku yambala mpahla ya panu ya lisima* ya ku basa yi tlhela yi phatima, hikusa a panu ya lisima yi fanekisela mintizro ya ku lulama ya vaxwengi.”
9 A ntsrumi yi ni byela yi ku: “Tsrala leswi: Va nyonxa lava zrambiwiki ku ta ka xilalelo xa mutxhatu wa Xihambana.” Yi tlhela yi ni byela yi ku: “Lawo i mazritu ya ntiyiso ya Xikwembu Nkulukumba.”
10 Kutani ni khinsama a minkondzrweni ya yone akuva ni yi gandzrela. Kambe yi ni byela yi ku: “Tivoneli! U nga yentxi leswo! Mine no va nandzra ntsena ku fana na wene ni vamakwenu lava nga ni ntizro wa ku nyikela wumboni mayelanu na Yesu. Gandzrela Xikwembu Nkulukumba! Hikusa a nkongometo wa wuprofeta i ku nyikela wumboni mayelanu na Yesu.”
11 Hiloko ni vona matilo na ma pfulekile, ku voneka kavhalu dzra ku basa. Lweyi a a khwele ka dzrone a vitaniwa Lweyi a Dumbekaka ni wa Ntiyiso, nakone a yavanyisa a tlhela a lwa yimpi hi ku lulama.
12 A matihlo yake ma fana ni langavi dzra ndzrilo, nakone a nhlokweni yake ku ni tihazri ta tinyingi ta wuhosi.* A tsraliwe vito ledzri ku kalaka ku nga na mhunu lweyi a tivaka ntlhamuxelo wa dzrone handle kwake,
13 a yambale mpahla leyi nthoneketeliwiki* hi ngati, nakone a vitaniwa Zritu dzra Xikwembu Nkulukumba.
14 Handle ka leswo, a a landzriwa hi makhandzra ya le tilweni, lawa a ma khwele makavhalu ya ku basa na ma yambale panu ya lisima* ya muvala wa ku basa, leyi a yi basile.
15 Hi le non’wini wake a ku huma xipada xa ku leha lexi lotiwiki, akuva a helisa matiko hi xone, nakone a ta ma byisa hi nhonga ya nsimbi. Handle ka leswo, a pswanyetela mbangu wa ku pfuvela vhinyu ka wone lowu lumbaka Xikwembu Nkulukumba wa Ntamu Hinwawu, ku nga mbangu lowu fanekiselaka mahlundzru lamakulu ya Xikwembu Nkulukumba.
16 Ka mpahla yake, ina, ka masenge yake, a tsraliwe vito ledzri liki: Hosi ya tihosi ni Mufumi wa vafumi.
17 Ni tlhela ni vona ntsrumi yin’wana na yi yime ka dambu, yi huwelela hi zritu ledzrikulu yi byela tinyanyana hinkwatu leti hahaka a mpfhukeni a xikazri ka tilo ni misava, yi ku: “Tanani halenu mi ta hlengeletana akuva mi da xilalelo lexikulu xa Xikwembu Nkulukumba,
18 leswaku mi ta da nyama ya tihosi, ya vazrangeli va yimpi, ya vavanuna va ntamu, ya makavhalu kun’we ni ya lava tsrhamiki ka wone, ni ya vhanu hinkwavu, lava ntsrhunxekiki ni lava va nga swikazrawa, lava nga ka swiyimu swa le hansi kun’we ni lava va nga ka swiyimu leswi tlakukiki.”
19 Kutani ni vona xihazri xa nhova* ni tihosi ta misava kun’we ni makhandzra ya tone na va hlengeletanile akuva va lwa yimpi ni lweyi a khweliki ka kavhalu kun’we ni khandzra dzrake.
20 Hiloko a xihazri xa nhova xi khomiwa, xone kun’we ni muprofeta wa madzrimi lweyi a a yentxa mahlolana a mahlweni ka xone, lawa ha wone a hambukisiki lava va yamukeliki mfungu wa xihazri xa nhova kun’we ni lava va gandzrelaka xithombe xa xone. Hi wubidzri byavu va txukumeteliwe a tiveni dzra ndzrilo lowu pfuzraka ni xivavula na va hanya.
21 Kambe lavan’wana hinkwavu va dlayiwile hi xipada xa ku leha lexi a xi huma hi le non’wini wa lweyi a khweliki kavhalu. Kutani a tinyanyana hinkwatu ti xuzra hi nyama yavu.
Tintlhamuxelo ta le hansi
^ Kumbe: “Haleluya”. “Yah” i ndlela ya ku hlaya vito ledzri liki Yehovha hi ku gomisa.
^ Hi Xigriki: porneía. Vona Ntlhamuxelo Wa Mazritu.
^ Kumbe: “Haleluya”. “Yah” i ndlela ya ku hlaya vito ledzri liki Yehovha hi ku gomisa.
^ Kumbe: “Haleluya”. “Yah” i ndlela ya ku hlaya vito ledzri liki Yehovha hi ku gomisa.
^ Kumbe: “Haleluya”. “Yah” i ndlela ya ku hlaya vito ledzri liki Yehovha hi ku gomisa.
^ Kumbe: “panu leyinene ya linyu”.
^ Hi ku kongoma: “madiyadema ya manyingi”.
^ Kumbexana: “a yi xwanyiwe”.
^ Kumbe: “panu leyinene ya linyu”.
^ Kumbe: “xivandzrana”.
