Mpfuletelo Lowu Yamukeliwiki Hi Yohane 2:1-29
2 “A ntsrumi leyi nga ka bandla dzra le Efesa yi tsraleli leswi: Leyi i mintxhumu leyi hlayiwaka hi lweyi a tameliki 7 wa tinyeleti a vokweni dzrake dzra xinene nakone a fambafambaka a makazri ka 7 wa mimotsre ya woru:
2 ‘Na yi tiva mintizro yaku ni ku tikazrata kwaku kun’we ni ku tiyisela kwaku, ni leswaku a wu va yamukeli vhanu lava bihiki, nakone wa va kambela lava hlayaka leswaku vone i vapostola kambe na va nga li vone, u va u gungula leswaku vo hemba.
3 Wa tiyisela, futsrhi u tiyiselele mintxhumu yinyingi hi kola ka vito dzranga nakone a wu kazralanga.
4 Kambe lexi u ni vilelisaka ha xone hi lexi: u tsrhike lizrandzru ledzri a wu li na dzrone a ku sunguleni.
5 “‘Xileswo dzrimuka xiyimu lexi u wiki na u li ka xone, u va u tisola u yentxa mintizro leyi a wu yi yentxa a ku sunguleni. Loko u nga swi yentxi, ni ta ku tela ni ta susa motsre waku a mbangwini wa wone, leswo ni to kala ni nga swi yentxi loko u tisola.
6 Kambe ku ni ntxhumu wun’we lowunene kwaku: u nyenya mintizro ya ntlawa wa Nikolawu, leyi na mine ni yi nyenyaka.
7 Lweyi a nga ni tindleve a a yingeli leswi moya wu swi byelaka mabandla, ku nga leswi: Lweyi a hlulaka ni ta mu pfumelela ku da mihandzru ya nsinya wa wutomi lowu nga ka paradeyisi dzra Xikwembu Nkulukumba.’
8 “A ntsrumi leyi nga ka bandla dzra le Smirna yi tsraleli leswi: Leyi i mintxhumu leyi hlayiwaka hi ‘Lweyi a nga wa ku Sungula a tlhela a va wa Wugamu’, lweyi a a file kambe a gamiki a hanya:
9 ‘Na wu tiva nhlomulo waku nakone na byi tiva wusiwana byaku, kambe u ganyile. Na swi tiva ni leswaku wa zruketeliwa hi lava hlayaka leswaku vone i Vayuda, nakasi a hi vone, vhanu lavo i sinagoga dzra Sathana.
10 Mi nga txhavi tinxanisa leti mi taka kumana na tone ku nga li khale. Lavisani! Diyavulosi a ta tama a pfalela van’we venu djele akuva mi dzringiwa hi ku helela, nakone mi ta va ni nhlomulo ku dzringana 10 wa masiku. Dumbekani nambiloko swi ngo sindzrisa kuva mi fa, kutani ni ta mi nyika ngiyana* ya wutomi.
11 Lweyi a nga ni tindleve a a yingeli leswi moya wu swi byelaka mabandla: Lweyi a hlulaka a nge ti txhuka a kumana ni lifu dzra wubidzri.’
12 “A ntsrumi leyi nga ka bandla dzra le Pergamosi yi tsraleli leswi: Leyi i mintxhumu leyi hlayiwaka hi lweyi a nga ni xipada xa ku leha, lexi lotiwiki nakone xi tsremaka hi matlhelo ha mabidzri:
13 ‘Na ku tiva lani u tsrhamaka kone, ku nga lani a xiluvelo xa Sathana xi nga kone; nambitanu u tama u khoma swi tiya a vitweni dzranga, a wu dzri landzrulanga lipfumelo ledzri u nga na dzrone kwanga nambi a masikwini ya Antipasi, mboni yanga ya ku dumbeka, leyi dlayiwiki lani u tsrhamaka kone, ku nga lani Sathana a tsrhamaka kone.
14 “‘Kambe ku ni mintxhumunyana u ni vilelisaka ha yone, halanu u pfumelele leswaku ku va ni lava va namazrelaka dondzro ya Balama, lweyi a byeliki Balaki leswaku a hlohlotela vana va Israyele kuva va doha,* hi ku va va da mintxhumu leyi nyikeliwiki swithombe va tlhela va yentxa swa tingana hi tlhelo dzra tinkuku.*
15 Handle ka leswo, u pfumelela ni leswaku ku va ni lava va namazrelaka dondzro ya ntlawa wa Nikolawu.
16 Xileswo tisoli, loko u nga swi yentxi leswo, na ku tela hi ku kahlula, kutani ni ta lwa yimpi na vone hi xipada xa ku leha lexi humaka hi le non’wini wanga.
17 “‘Lweyi a nga ni tindleve a a yingeli leswi moya wu swi byelaka mabandla: Lweyi a hlulaka ni ta mu pambulela a mana lama fihliwiki, ni ta tlhela ni mu nyika ni zribye dzra ku basa ledzri ka dzrone ku tsraliwiki vito dzra nyiwana ledzri ku nga liki na mhunu lweyi a dzri tivaka handle ka lweyi a dzri yamukelaka.’
18 “A ntsrumi leyi nga ka bandla dzra le Tiyatira yi tsraleli leswi: Leyi i mintxhumu leyi hlayiwaka hi N’wana wa Xikwembu Nkulukumba, lweyi a matihlo yake ma fanaka ni langavi dzra ndzrilo nakone a minkondzro yake yi fanaka ni kobri dzra dzrinene:
19 ‘Na yi tiva mintizro yaku, lizrandzru dzraku, lipfumelo dzraku, ntizro lowu u wu yentxelaka Xikwembu Nkulukumba kun’we ni ku tiyisela kwaku, ni leswaku a mintizro yaku ya swoswi yi tlula ya le ku sunguleni.
20 “‘Kambe leswi u ni vilelisaka ha swone hi leswi: u tsrhika wansati lweyi a fanaka na Yezabele, lweyi a hlayaka leswaku yene i muprofeta, a dondzrisa ni ku hlohlotela malandzra yanga akuva ma yentxa swa tingana hi tlhelo dzra tinkuku* ma tlhela ma da mintxhumu leyi nyikeliwiki swithombe.
21 Ni mu nyike nkama wa kuva a tisola, kambe a nga swi djuli ku tisola ka swiyentxo swake swa tingana hi tlhelo dzra tinkuku.*
22 Lavisa! Ni ta mu vabyisa lakakuva a nga swi koti ni ku pfuka, nakone lava a yentxaka wumbuye na vone ni ta va txukumetela a nhlomulweni lowukulu, leswo ni to kala ni nga swi yentxi loko a tisola ka mintizro yake.
23 Nakone ni ta dlaya vanake hi ntungu lowu dlayaka, akuva mabandla hinkwawu ma ta swi tiva leswaku hi mine lweyi a kambelaka timbilu ni miyanakanyu ya le ndzrenindzreni* ni leswaku ni ta nyika mun’wana ni mun’wana wenu hi ku ya hi mintizro yake.
24 “‘Nambitanu, lavan’wana lava nga bandleni dzra le Tiyatira, ku nga hinkwavu lava kalaka va nga yi landzri dondzro leyi, nakone va kalaka va nga swi tivi leswi vitaniwaka “mintxhumu leyi yentiki ya Sathana” ni va byela leswi: A ni mi yengeseleli ntsrhwalu wun’wana.
25 Ntsena leswi ni mi byelaka swone i kuva mi khomelela ka leswi mi nga na swone ku ya tlhasa loko ni ta.
26 Nakone lweyi a hlulaka a tlhela a bekisa leswi ni mi leletiki swone ku ya tlhasa wugamu, ni ta mu nyika ntamu wa ku fuma matiko,
27 nakone a ta byisa vhanu hi nhonga ya nsimbi akuva va ta pandzreleliwa va va swikhemu ku fana ni swibya swa vumba, hi lani Papayi a ni nyikiki ntamu ha kone.
28 Handle ka leswo, ni ta mu nyika nyeleti ya mixo.
29 Lweyi a nga ni tindleve a a yingeli leswi moya wu swi byelaka mabandla.’
Tintlhamuxelo ta le hansi
^ Kumbe: “hazri”.
^ Kumbe: “a beka zribye dzra ku wisana; xihinga”.
^ Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Kumbe: “matitwela ya le ndzrenindzreni”. Hi ku kongoma: “tinso”.
