Mpfuletelo Lowu Yamukeliwiki Hi Yohane 20:1-15
20 Kutani ni vona ntsrumi na yi xika hi le tilweni na yi tamele mpfungulu wa xikhele xa ku yenta ni txhini dzra dzrikulu.
2 Yi khoma dragona, nyoka ya khale, ku nga Diyavulosi na Sathana, yi mu tsrimba ku dzringana 1.000 wa malembe.
3 Yi mu txukumetela ka xikhele xa ku yenta, yi mu pfalela yi gama yi xi lema, akuva ku dzringana 1.000 wa malembe a nga ha tlheli a kanganyisa matiko. Ntsrhaku ka leswo, a ta ntsrhunxiwa ku dzringana nkamanyana.
4 Kutani ni vona swiluvelo, lava a va tsrhame ka swone a va nyikiwe wulawuli bya ku yavanyisa. Ina, ni vone ngati* ya lava va dlayiwiki* hi kola ka ku nyikela wumboni mayelanu na Yesu ni hi ku vulavula mayelanu na Xikwembu Nkulukumba, lava va kalaka va nga xi gandzrelanga xihazri xa nhova* kumbe xifaniso xa xone nakone va kalaka va nga wu yamukelanga mfungu a mimombyeni ni le mavokweni yavu. Va tlhele va hanya, va va va fuma na Kriste ku dzringana 1.000 wa malembe.
5 Loku i ku pfuxiwa ka ku sungula. Ku dzringana 1.000 wa malembe a vafi lavan’wana a va ha tlhelanga va hanya.
6 Va nyonxa nakone va xwengile lava taka patsreka a ku pfuxiweni ka vafi ka ku sungula; vone a va nge ti kumana ni lifu dzra wubidzri, kambe va ta va vaprista va Xikwembu Nkulukumba ni va Kriste, nakone va ta fuma na yene* ku dzringana 1.000 wa malembe.
7 Loko malembe lawa ya 1.000 ma hela, Sathana a ta ntsrhunxiwa a djele,
8 kutani a ta huma a famba a hambukisa matiko ka mune wa makhona ya misava, ku nga Goge na Magoge, akuva a ma hlengeletelela yimpi. A nhlayu ya wone yi fana ni misava ya le lwandle.
9 Kutani ma hangalaka a misaveni hinkwayu, ma tsrandzrela nxaxa wa vaxwengi ni doropa ledzri zrandzrekaka. Kambe ku xika ndzrilo hi le tilweni wu ma helisa.
10 Diyavulosi lweyi a a ma hambukisa a txukumeteliwa a tiveni dzra ndzrilo ni xivavula;* lomu a xihazri xa nhova ni muprofeta wa madzrimi va txukumeteliwiki kone, nakone va ta xanisiwa* wusiku ni nhlikanhi hi masiku ni masiku.
11 Hiloko ni vona xiluvelo lexikulu xa ku basa ni Lweyi a tsrhamiki ka xone. A misava ni matilo swi mu tsrutsruma, nakone a swa ha kumeliwanga mbangu.
12 Kutani ni vona vafi, lavakulu ni lavatsrongo, na va yime mahlweni ka xiluvelo, ku gama ku pfuliwa mabuku. Kambe ku pfuliwa buku dzrin’wana, ku nga buku dzra wutomi. A vafi va yavanyisiwa hi ku landzra leswi tsraliwiki mabukwini wolawo hi ku ya hi mintizro yavu.
13 A lwandle dzri humesa vafi lava nga ka dzrone, ni lifu kun’we ni sizra* swi humesa vafi lava nga ka swone. Kutani mun’wana ni mun’wana a yavanyisiwa hi ku ya hi mintizro yake.
14 A lifu ni sizra* swi txukumeteliwa a tiveni dzra ndzrilo. A tiva dzra ndzrilo dzri fanekisela lifu dzra wubidzri.
15 Handle ka leswo, mun’wana ni mun’wana lweyi a vito dzrake dzri kalaka dzri nga tsraliwanga a bukwini dzra wutomi a txukumeteliwe a tiveni dzra ndzrilo.
Tintlhamuxelo ta le hansi
^ Hi ku kongoma: “mahika”. Vona Ntlhamuxelo Wa Mazritu.
^ Hi ku kongoma: “lava va dlayiwiki hi txhati”.
^ Kumbe: “xivandzrana”.
^ Ku hlayiwa Kriste.
^ Kumbe: “enxofri”.
^ Kumbe: “pfaleliwa”.
^ Kumbe: “Hayidesi”, ku nga sizra ledzri tolovelekiki dzra vhanu. Vona Ntlhamuxelo Wa Mazritu.
^ Kumbe: “Hayidesi”, ku nga sizra ledzri tolovelekiki dzra vhanu. Vona Ntlhamuxelo Wa Mazritu.
