Mpfuletelo Lowu Yamukeliwiki Hi Yohane 4:1-11
4 Ntsrhaku ka leswo, loko ni lavisile ni vone xipfalu na xi pfulekile a matilweni, kutani ni twa zritu dzra ku sungula ledzri a dzri ni mpfumawulu wa ku fana ni wa xipalapala, na dzri vulavula na mine dzri ku: “Tlhantuka u ta halenu ni ta ku komba mintxhumu leyi yi fanelaka ku yentxeka.”
2 Ntsrhaku ka leswo, a moya wa Xikwembu Nkulukumba wu sungula ku tizra kwanga, ni vona xiluvelo a tilweni ni mhunu wa kukazri na a tsrhame ka xone.
3 Lweyi a a tsrhamise ka xone a a phatima ku fana ni zribye dzra yaxpa ni dzra sardoni,* nakone ka matlhelo hinkwawu ya xiluvelo a ku ni nkwangulatilo lowu a wu phatima ku fana ni zribye dzra emeralda.*
4 A matlhelweni hinkwawu ya xiluvelo a ku ni 24 wa swiluvelo, nakone ni vone 24 wa vakulu na va tsrhame ka swiluvelo swoleswo na va yambale timpahla ta ku basa, a tinhlokweni tavu a ku ni tingiyana* ta woru.
5 A xiluvelweni a ku hatima, ku twala mazritu ni ku dzruma; nakone a ku ni 7 wa mimotsre leyi a yi pfuzra a mahlweni ka xiluvelo, a mimotsre leyo yi yimela 7 wa mimoya ya Xikwembu Nkulukumba.
6 A mahlweni ka xiluvelo a ku ni ntxhumu wa ku phatima lowu a wu voneka ingiki i lwandle dzra vhidru kumbe dzra krixtali.
A makazri ka xiluvelo ni le matlhelweni ka xone a ku ni swivumbiwa swa mune leswi hanyaka, leswi a swi tale hi matihlo a mahlweni ni le ntsrhaku.
7 A xivumbiwa xa ku sungula lexi hanyaka a xi fana ni nghonyama,* a xivumbiwa xa wubidzri lexi hanyaka a xi fana ni xihon’wana, a xivumbiwa xa wuzrazru lexi hanyaka a xi ni wuso bya ku fana ni bya mhunu, a xivumbiwa xa wumune lexi hanyaka a xi fana ni gama ledzri hahaka.
8 Ka swivumbiwa swoleswo swa mune, xivumbiwa ha xin’we a xi ni 6 wa timpapa leti a ti tale hi matihlo matlhelo hinkwawu ni hi le hansi ka tone. Wusiku ni nhlikanhi a swi tama swi huwelela swi ku: “A xwengile, a xwengile, a xwengile Yehovha Xikwembu Nkulukumba wa Ntamu Hinkwawu, lweyi a viki kone, lweyi a nga kone ni lweyi a taka.”
9 Minkama hinkwayu loko swivumbiwa leswi hanyaka swi dzrumisa, swi kombisa xitxhavu ni ku tlangela lweyi a tsrhamiki a xiluvelweni, lweyi a hanyaka hi masiku ni masiku,
10 a vakulu lava va 24 va khinsamela lweyi a tsrhamiki a xiluvelweni, va gandzrela lweyi a hanyaka hi masiku ni masiku, va txukumetela tingiyana tavu a mahlweni ka xiluvelo, va ku:
11 “Swa ku fanela Yehovha Xikwembu Nkulukumba wezru, ku yamukela ku phatima, ku hloniphiwa ni ntamu, hikusa u tumbuluxe mintxhumu hinkwayu, nakone hi kola ka ku zrandzra kwaku yi ve kone, yi tumbuluxiwile.”
Tintlhamuxelo ta le hansi
^ Sardoni i zribye dzra lisima dzra muvala wa ku pshwuka.
^ Van’we va li a zribye ledzri, hi ledzri dzri tiviwaka swanga diyamanti. Ku hlayiwa zribye dzra lisima dzra muvala wa nkuxe (verde).
^ Kumbe: “tihazri”.
^ Kumbe: “ndzrawu”.
