Mpfuletelo Lowu Yamukeliwiki Hi Yohane 5:1-14
5 Nakone ka voko dzra xinene dzra Lweyi a tsrhamiki a xiluvelweni ni vone buku ledzri a dzri tsraliwe ka matlhelo ha mabidzri,* na dzri lemiwe dzri tiya hi 7 wa swa ku lema ha swone.
2 Kutani ni vona ntsrumi leyi nga ni ntamu na yi huwelela hi zritu dzra ku tlakuka yi ku: “I mani lweyi a faneliwaka hi ku pfula buku ni ku namula swilemo swa dzrone?”
3 Kambe a ku nge na mhunu a matilweni, a misaveni, kumbe a hansi ka misava, lweyi a a kota ku pfula buku ledzro kumbe ku lavisa leswi tsraliwiki ka dzrone a swi dondzra.
4 Ni sungule ku dzrila ngopfu swinene, hikusa a ku nge na mhunu lweyi a a faneliwa hi ku pfula buku, kumbe ku lavisa leswi nga ka dzrone a swi dondzra.
5 Kambe mun’we wa vakulu a ni byela a ku: “Yima ku dzrila. Lavisa! A nghonyama* ya lixaka dzra Yuda, leyi nga limitsru dzra Davhida, yi hlulile akuva yi ta kota ku pfula buku ni ku namula 7 wa swilemo swa dzrone.”
6 Kutani ni vona xihambana lexi a xi tikomba ingiki xi same xi dlayiwa, a xi yime makazri ka xiluvelo ni le makazri ka swivumbiwa swa mune leswi hanyaka, kun’we ni le makazri ka vakulu, na xi ni 7 wa timhondzro ni 7 wa matihlo, a matihlo ya xone ma yimela 7 wa mimoya ya Xikwembu Nkulukumba leyi zrumeliwiki a misaveni hinkwayu.
7 Kutani a Xihambana xi tekela ku famba xi ya teka buku ka voko dzra xinene dzra Lweyi a tsrhamiki a xiluvelweni.
8 Loko Xihambana xi teke buku, a swivumbiwa swa mune leswi hanyaka, kun’we ni vakulu lava 24, va xi khinsamela, mun’wana ni mun’wana wavu a a tamele xitende ni swibya swa woru leswi a swi tale hi muzri wa ku nun’hwela. (A muzri wa ku nun’hwela, wu fanekisela swikhongoto swa vaxwengi.)
9 Kutani va yimbelela lisimu ledzrimpshwa va ku: “Swa ku fanela ku teka buku ni ku namula swilemo swa dzrone, hikusa a wu dlayiwile, nakone a ngati yaku yi xavele Xikwembu Nkulukumba a vhanu va tinxaka hinkwatu, tindzrimi hinkwatu, vhanu va tinhlonge hinkwatu, ni matiko hinkwawu.
10 U va yentxe va va Mfumu ni vaprista va Xikwembu Nkulukumba wezru, nakone va ta va tihosi a misaveni.”
11 Hiloko ni lavisa, kutani ni twa zritu dzra tintsrumi ta tinyingi leti nga matlhelweni ka xiluvelo, ni dzra swivumbiwa leswi hanyana kun’we ni dzra vakulu. A nhlayu ya tone a yi li makume ya magidi na ma yandzrisiwe hi makume ya magidi* ni magidi ya magidi,
12 a ti huwelela ti ku: “A Xihambana lexi a xi dlayiwile, swa xi fanela ku yamukela ntamu, wupfundzri, wutlhazri, ku tiya, ku hloniphiwa, ku phatima kun’we ni ku dzrumisiwa.”
13 Kutani ni twa swivumbiwa hinkwaswu leswi nga tilweni, a misaveni, a hansi ka misava ni le lwandle, kun’we ni hinkwaswu leswi nga ka swone, swi ku: “A lidzrumu, xitxhavu, ku phatima kun’we ni ntamu, a swi ve swa Lweyi a tsrhamiki xiluvelweni ni swa Xihambana, hi masiku ni masiku.”
14 A swivumbiwa leswa mune a swi ku: “Amen!” Kutani a vakulu va khinsama va gandzrela Xikwembu Nkulukumba.
Tintlhamuxelo ta le hansi
^ Hi ku kongoma: “na dzri tsraliwe ndzreni ni le handle”.
^ Kumbe: “ndzrawu”.
^ Hi ku kongoma: “mamiriyadi ya mamiriyadi”.
