Mpfuletelo Lowu Yamukeliwiki Hi Yohane 7:1-17
7 Ntsrhaku ka leswo, ni vona mune wa tintsrumi na ti yime ka mune wa makhona ya misava, ti khoma mune wa mimoya ya misava swi tiya, akuva ku nga vi na moya lowu hungaka a misaveni, a lwandle, kumbe ka nsinya wa kukazri.
2 Hiloko ni vona ntsrumi yin’wana yi tlhantuka hi le wuxeni,* na yi ni mfungu wa Xikwembu Nkulukumba lweyi a hanyaka. Kutani yi huwelela hi zritu ledzrikulu yi byela mune wa tintsrumi leti nyikiwiki ntamu wa ku hona misava ni lwandle
3 yi ku: “Mi nga honi misava, lwandle kumbe minsinya, ku ya tlhasa loko hi heta ku funga malandzra ya Xikwembu Nkulukumba wezru a mimombyeni ya wone.”
4 Kutani ni twa nhlayu ya lava va fungiwiki, a va li 144.000 wa vone, na va huma ka tinxaka hinkwatu ta vana va Israyele:
5 Ka lixaka dzra Yuda ku fungiwe 12.000 wa vone;ka lixaka dzra Rubeni ku fungiwa 12.000;ka lixaka dzra Gadi ku fungiwa 12.000;
6 ka lixaka dzra Axere ku fungiwa 12.000;ka lixaka dzra Naftali ku fungiwa 12.000;ka lixaka dzra Manasi ku fungiwa 12.000;
7 ka lixaka dzra Simiyoni ku fungiwa 12.000;ka lixaka dzra Levhi ku fungiwa 12.000;ka lixaka dzra Yisakari ku fungiwa 12.000;
8 ka lixaka dzra Zebuloni ku fungiwa 12.000;ka lixaka dzra Yosefa ku fungiwa 12.000;ka lixaka dzra Benjamini ku fungiwa 12.000 wa vone.
9 Ntsrhaku ka leswo ni lavisa, kutani ni vona xitsrhungu lexikulu lexi a ku nga na mhunu lweyi a a kota ku xi konta, a xi huma ka matiko hinkwawu, tinxaka hinkwatu, tinhlonge hinkwatu, kun’we ni tindzrimi hinkwatu. A xi yime mahlweni ka xiluvelo ni le mahlweni ka Xihambana, na xi yambale timpahla ta ku leha ta ku basa; nakone a xi tamele mazrwavi ya minkindzru.
10 A xi huwelela hi ku phindhaphindha hi zritu ledzri tlakukiki xi ku: “A ku huluxiwa ku pfa hi ka Xikwembu Nkulukumba wezru, lweyi a tsrhamiki a xiluvelweni, ni hi ka Xihambana.”
11 A tintsrumi hinkwatu a ti yime a mahlweni ka xiluvelo, ka vakulu, ni le ka swivumbiwa swa mune leswi hanyaka, kutani ti khinsama a mahlweni ka xiluvelo ti lavisa hansi ti gandzrela Xikwembu Nkulukumba,
12 ti ku: “Amen! A lidzrumu, ku phatima, wutlhazri, ku tlangeliwa, xitxhavu, ntamu, kun’we ni ku tiya, a swi ve swa Xikwembu Nkulukumba wezru hi masiku ni masiku. Amen.”
13 Mun’we wa vakulu a ni vutisa a ku: “Lava yambaliki timpahla ta ku leha ta ku basa, i vamani nakone va pfa kwini?”
14 Ni tekela ku mu byela ni ku: “Hosi yanga, hi wene u swi tivaka.” Kutani a ni byela a ku: “Lava hi lava va humaka a nhlomulweni lowukulu, va hlampswe timpahla tavu ta ku leha hi ngati ya Xihambana va ti yentxa ti va ta ku basa.
15 Hi leswo swi yentxaka va va mahlweni ka xiluvelo xa Xikwembu Nkulukumba va mu yentxela ntizro wa ku xwenga wusiku ni nhlikanhi a tempeleni dzrake; nakone Lweyi a tsrhamiki a xiluvelweni a ta va lulamiselela tende akuva a va sizrelela.*
16 A va nge he ti twa ndlala nakone a va nge he ti twa tozra, nambi dambu a dzri nge he va tlhavi, ni mumu a wu nge he va hisi ku tlula mpimu,
17 hikusa a Xihambana lexi nga makazri ka xiluvelo, xi ta va byisa, xi va kongomisa ka swihlovo swa mati ya wutomi. Kutani Xikwembu Nkulukumba a ta sula minyembeti hinkwayu a matihlweni yavu.”
Tintlhamuxelo ta le hansi
^ Kumbe: “hi le wuhumadambu”.
^ Hi ku kongoma: “a ta gwimba tende dzrake a henhla kwavu”.
