Ruti 1:1-22
1 Hi nkama lowu a ku fuma vayavanyisi* ku ve ni ndlala a tikweni. Wanuna wa kukazri a suke ni nkatake ni vana vabidzri va madjaha a Betlehema wa Yuda, a ya tsrhama tikweni dzra Mowabu swanga muluveli.
2 A vito dzra wanuna yelweyo a ku li Elimeleki,* a nkatake a ku li Nawomi,* nakone a vanake lavabidzri va madjaha a ku li Mahaloni* na Khiliyoni.* A va li Vaefrata va le Betlehema wa Yuda. Kutani va tlhase tikweni dzra Mowabu va tsrhama kone.
3 Ntsrhaku ka nkama wa kukazri, Elimeleki nuna wa Nawomi a file, a va Nawomi a sala ni vanake vabidzri va madjaha.
4 Vana volavo va madjaha va game va txhata ni vavasati va le Mowabu. Mun’we a a vitaniwa Orpa, kasi lwemun’wana a a vitaniwa Ruti. Va tsrhame Mowabu ku dzringana kolomu ka 10 wa malembe.
5 Ntsrhaku ka leswo, vana lavabidzri va madjaha, Mahaloni na Khiliyoni, na vone va file. Kutani Nawomi a sala a nge he na vana nakone a nge he na nuna.
6 Xileswo Nawomi a suka ni vingi vake a tikweni dzra Mowabu a tlhelela kaya, hikusa na a li Mowabu a twe leswaku Yehovha a tlhele a tovokisa vhanu vake hi ku va nyika swakuda.*
7 A suka lani yene ni vingi vake vabidzri a va tsrhama kone. Na va li ndleleni va tlhelela tikweni dzra Yuda,
8 Nawomi a byela vingi vake ha vabidzri a ku: “Mukani, mun’wana ni mun’wana wenu a a tlheleli kaya ka mamana wake. Ingiki Yehovha a nga mi komba timpswalu,* ku fana ni leswi mi kombisiki timpswalu ka vanuna venu na va ha hanya ni leswi mi ti kombisiki kwanga.
9 Ingiki Yehovha a nga yentxa leswaku mun’wana ni mun’wana wenu a sizreleleka* lomu a taka tekiwa kone.” Kutani a va n’qunta, va gama va dzrila ngopfu.
10 Hiloko va byela Nawomi hi ku phindhaphindha va ku: “Im-him, a hi nge tlheli, kambe hi ta famba na wene a maxakeni yaku.”
11 Kambe Nawomi a va byela a ku: “Tlhelani vananga, ha yini mi djula ku famba na mine? Xana ni nga ha pswala vana lava nga ha vaka vanuna venu?
12 Tlhelani vananga. Fambani, hikusa ni duhwalile lakakuva a ni nge he tekiwi. Nambiloko a no va ni dumbo dzra ku kuma nuna wusiku bya namunhla ni va ni pswala vana,
13 xana a mi ta va yimela va za va kula? A mi ta tsrhika ku txhata mi yimela vone? Im-him vananga, swi ni vavisa ngopfu ku mi vona na mi le ka xiyimu lexi, hikusa Yehovha a khatisa mine.”
14 Va tlhela va sungula ku dzrila ngopfu. Ntsrhaku ka leswo, Orpa a n’qunta n’wingi wake a va a tlhela. Kambe Ruti a sala na yene.
15 Xileswo Nawomi a mu byela a ku: “Waswivo! Makwenu lweyi na yene a feliwiki a tlhelele a maxakeni yake ni ka swikwembu swake. Famba naye.”
16 Kambe Ruti a ku: “U nga ni sindzrisi leswaku ni ku tsrhika, ni tlhela, ni nga ha fambi na wene, hikusa lani u yaka kone na mine ni ta ya kone, lani u taka yetlela kone, na mine ni ta yetlela kone, a maxaka yaku ma ta va maxaka yanga, nakone Xikwembu Nkulukumba waku a ta va Xikwembu Nkulukumba wanga.
17 Lani u taka fela kone na mine ni ta fela kone, ni va ni lahliwa kone. Ingiki Yehovha a nga ni khatisa ngopfu swinene loko no hambana na wene na ku nga li hi mhaka ya lifu.”
18 Loko Nawomi a vona leswaku Ruti a sindzrisa ku famba na yene, a tsrhika ku zama ku mu tlhelisa.
19 Kutani ha vabidzri va ya mahlweni va famba va za va ya tlhasa Betlehema. Na va ha ku tlhasa Betlehema, vhanu hinkwavu va doropa va hlamala. Nakone vavasati a va vutisana va ku: “A hi Nawomi lweyi?”
20 Nawomi a byela vavasati volavo a ku: “Mi nga ni vitaneni hi vito dzra ku Nawomi,* ni vitanani hi dzra ku Mara,* hikusa Lweyi wa Ntamu Hinkwawu a ni bindzrisele wutomi.
21 Ni fambe na ni ni swinyingi, kambe Yehovha a yentxe ni tlhela na ni nga na ntxhumu. Ha yini mi ni vitana hi vito dzra ku Nawomi nakasi i Yehovha lweyi a ni fulazreliki, futsrhi hi Lweyi wa Ntamu Hinkwawu a ni vangeliki makhombo?”
22 Leswi hi leswi Nawomi a tlhelisiki xiswone hi le tikweni dzra Mowabu, na a li xikan’we na Ruti, n’wingi wake wa Mumowabu. Va tlhase Betlehema a ku sunguleni ka ntsrhovelo wa sevhada.
Tintlhamuxelo ta le hansi
^ Kumbe: “Hi nkama lowu vayavanyisi a va yentxa leswaku ku va ni wululami”.
^ Leswi tlhamuxelaka leswaku “Xikwembu Nkulukumba Wanga I Hosi”.
^ Leswi tlhamuxelaka leswaku “Lweyi A Ni Nyonxisaka”.
^ Kumbexana dzri pfa hi ka zritu dzra Xiheberu ledzri tlhamuxelaka swa ku: “Lweyi a tsraniki; lweyi a vabyaka”.
^ Leswi tlhamuxelaka swa ku: “Lweyi A Hlulekaka; Lweyi A Yaka Wugan’wini”.
^ Hi ku kongoma: “hi ku va nyika pawu”.
^ A zritu dzra Xiheberu ledzri tizrisiwiki lani dzri tlhamuxela lizrandzru ni wunene leswi nga helikiki. Vona Ntlhamuxelo Wa Mazritu. “Lizrandzru dzra ku dumbeka”.
^ Hi ku kongoma: “a kuma mbangu wa ku wisela ka wone”.
^ Leswi tlhamuxelaka leswaku “Lweyi A Ni Nyonxisaka”.
^ Leswi tlhamuxelaka leswaku “Ku bava”.
