Papela ledzri yaka ka Tito 2:1-15
2 Nambitanu, wene yana mahlweni u dondzrisa leswi fambisanaka ni dondzro leyinene.*
2 Vavanuna lava kuliki va fanela ku yentxa mintxhumu hi ku dzringanisela, va va lava hloniphekaka, va va ni mayanakanyela lamanene, va tiya lipfumelweni, a lizrandzrwini, nakone va tiyiselela swikazratu.
3 Hi lani ku fanaka, vavasati lava kuliki va fanela ku va ni mahanyela lama hloniphekaka, va nga vi na mahlevo, va nga vi swikazrawa swa vhinyu, va va vadondzrisi va leswinene,
4 akuva va dondzrisa* vavasati lava ha liki vampshwa ku zrandzra vanuna vavu ni vana vavu,
5 va va ni mayanakanyela lamanene, va va lava basiki a miyanakan’wini yavu ni le swiyentxweni swavu, va tizra mintizro ya le kaya,* va va ni wunene, va titsrongahata ka vanuna vavu, ku yentxela leswaku ku nga vulavuliwi ku biha hi zritu dzra Xikwembu Nkulukumba.
6 Hi lani ku fanaka, yana mahlweni u tsratsriya madjaha leswaku ma va ni mayanakanyela lamanene,
7 u va xikombiso lexinene a mintizrweni leyinene hi tindlela hinkwatu. Dondzrisa ntiyiso* hi nkhinkhi,
8 vulavula mazritu lamanene* lama kalaka ma nge na ku soliwa, akuva lava va kanetaka va va ni tingana, va pfumala ntxhumu wa ku hi sola hi wone.
9 A vatizri va fanela ku tibeka hansi ka vatholi vavu ka mintxhumu hinkwayu, va lwela ku va nyonxisa, va nga va hlamuli hi ndlela ya ku biha,
10 va nga va yiveli, kambe va dumbeka hi ku helela, akuva hi tindlela hinkwatu va xongisa dondzro ya Muhuluxi wezru, Xikwembu Nkulukumba.
11 Hikusa a timpswalu letikulu ta Xikwembu Nkulukumba ti vonekisiwile, nakone ti buyisela huluku vhanu va tinxaka hinkwatu.
12 A timpswalu leto ti hi dondzrisa ku fulazrela mintxhumu hinkwayu leyi lwisanaka ni ku zrandzra ka Xikwembu Nkulukumba kun’we ni ku navela ka ku biha ka misava leyi, ni ku hanya hi ndlela leyi kombisaka leswaku hi ni mayanakanyela lamanene, hi lava lulamiki, nakone hi ni ku tinyiketela ka Xikwembu Nkulukumba a misaveni leyi,*
13 nkama lowu hi yimelaka dumbo dzra ku nyonxisa ni kuva Xikwembu Nkulukumba wa ntamu hinkwawu kun’we na Yesu Kriste Muhuluxi wezru va kombisa ntamu wavu.
14 Kriste a tinyikele hi kola kwezru akuva a hi huluxa* ka mintxhumu hinkwayu leyi lwisanaka ni nawu, ni ku va a basisa lava nga vhanu vake va ku hlawuleka, nakone va hisekelaka mintizro leyinene.
15 Yana mahlweni u dondzrisa mintxhumu leyi, u tsratsriya,* u kawuka swanga hi leswi u nga ni wulawuli bya ku yentxa leswo. U nga pfumeleli mhunu a ku yeyisa.
Tintlhamuxelo ta le hansi
^ Kumbe: “leyi pfunaka”.
^ Kumbe: “tlhazrihisa”.
^ Kumbe: “va hlayisa mimiti yavu”.
^ Kumbexana: “Dondzrisa hi ku xwenga”.
^ Kumbe: “lama pfunaka”.
^ Kumbe: “a xiyin’wini lexi xa misava; nguveni leyi”. Vona Ntlhamuxelo Wa Mazritu.
^ Hi ku kongoma: “akuva a hi tizrula”.
^ Kumbe: “kutxa”.
