Papela ledzri dzri yaka ka Vaefesa 6:1-24
6 Vana, yingisetani vapswele venu hi lani Hosi yi swi djulaka ha kone, hikusa leswo swi lulamile.
2 “Hlonipha papayi waku ni mamana waku”, lexi hi xo xileleto xa ku sungula lexi nga ni xidumbiso:
3 “Akuva swi ta ku fambela ha hombe nakone u hanya nkama wa ku leha a misaveni.”
4 Na n’wine vapapayi, mi nga hlundzrukisi vanenu, kambe va wundlani hi ku va laya ni ku va dondzrisa milawu ya Yehovha.
5 N’wine vatizri, yingisetani vatholi venu hi ku txhava ni ku zruzrumela, mi va yingiseta hi timbilu tenu hinkwatu, hi lani mi yentxaka ha kone ka Kriste,
6 mi nga swi yentxi ntsena loko mi voniwa, hi ku djula ku nyonxisa vhanu, kambe swi yentxani swanga malandzra ya Kriste lawa ma yentxaka ku zrandzra ka Xikwembu Nkulukumba hi timbilu hinkwatu.
7 Tizrelani vatholi venu hi ku swi zrandzra ingiki hi loko mi swi yentxela Yehovha ku nga li vhanu,
8 hikusa ma swi tiva leswaku ntxhumu wun’wana ni wun’wana lowunene lowu mhunu a wu yentxaka, Yehovha a ta mu hakela hi kola ka wone, swi nge na mhaka leswaku mhunu wa kone i mutizri kumbe i mhunu lweyi a ntsrhunxekiki.
9 Na n’wine vatholi, yentxani hi lani ku fanaka ka vatizri venu, mi nga va txhaviseli, hikusa ma swi tiva leswaku a n’winyi wavu ni wenu hi yelweyi wa mun’we a nga matilweni, nakone a nga na xihlawuhlawu.
10 Hi wugamu, ingiki a Hosi yi nga mi nyika ntamu hi ku tizrisa ntamu wa yone lowukulu.
11 Yambalani swiyambalu hinkwaswu swa yimpi leswi pfaka ka Xikwembu Nkulukumba akuva mi ta kota ku yima mi tiya mi lwa ni mazrengu* ya Diyavulosi;
12 hikusa hi le yimpini, kambe a hi lwi* ni vhanu, hi lwa ni mimfumu, wulawuli, vafumi va misava leyi ya munyama, ku nga mimoya ya ku biha leyi nga mimbangwini ya le tilweni.
13 Hi xivangelo lexo, yambalani swiyambalu hinkwaswu swa yimpi leswi pfaka ka Xikwembu Nkulukumba, akuva mi ta kota ku tilwela hi siku dzra khombo nakone ntsrhaku ka loko mi yentxe hinkwaswu leswi vilelekaka kwenu, mi yima mi tiya.
14 Xileswo yimani mi tiya, na mi tikhame masenge hi bandhi dzra ntiyiso, mi yambala xisizrelelo xa xifuva xa ku lulama,
15 nakone na mi yambale masandaliya ya madzrungula lamanene ya ku zrula lawa mi lulameliki ku ma zrezra.
16 Handle ka hinkwaswu leswo, tamelani xitlhangu lexikulu xa lipfumelo lexi mi taka kota ku tima ha xone a minseve hinkwayu leyi pfuzraka ya Diyavulosi.
17 Nakone yambalani kapaseti dzra ku huluxiwa, mi tamela ni xipada xa moya, ku nga zritu dzra Xikwembu Nkulukumba,
18 na minkama hinkwayu mi hamba mixaka hinkwayu ya swikhongoto ni swikombelo hi ku kongomisiwa hi moya. Nakone akuva mi swi kota leswo tsrhamani na mi pfukile, minkama hinkwayu mi va hambela swikombelo vaxwengi hinkwavu.
19 Na mine ni khongotelelani, akuva ni ta nyikiwa mazritu ya ku ma hlaya loko ni pfula nomu, ku yentxela leswaku ni kota ku vulavula hi xixixi loko ni twalisa xihundla xa ku xwenga xa madzrungula lamanene,
20 lawa ni zrumiwiki hi Xikwembu Nkulukumba akuva ni ma zrezra; hi kola ka wone ni tsrimbiwe hi matxhini. Ni khongotelelani akuva ni vulavula hi madzrungula lamanene na ni nga txhavi ntxhumu, hi lani ni fanelaka ku swi yentxa ha kone.
21 Tikiko, makwezru lweyi a zrandzrekaka, nandzra lweyi a dumbekaka a Hosini, a ta mi dzrungulela ndzrava yanga a mi byela hinkwaswu.
22 Ni mi zrumelela yene hi nkongometo wolowo, akuva a ta ta mi byela leswaku hi le ka swa ku yini ni kuva a ta tiyisa timbilu tenu.
23 Ingiki vamakwezru hinkwavu va nga va ni ku zrula, lizrandzru ni lipfumelo leswi pfaka ka Xikwembu Nkulukumba Papayi, ni le ka Hosi Yesu Kriste.
24 Ingiki hinkwavu lava zrandzraka Hosi Yesu Kriste hi lizrandzru ledzri kalaka dzri nga heli va nga va ni timpswalu letikulu.
