Papela ledzri yaka ka Vagalatiya 1:1-24
1 Mine Pawulo, mupostola lweyi a kalaka a nga zrumiwanga hi vhanu nakone a kalaka a nga hlawuliwanga hi mhunu, kambe a hlawuliwiki hi Yesu Kriste na Xikwembu Nkulukumba Papayi wezru, lweyi a pfuxiki Kriste a ku feni.
2 Mine ni vamakwezru hinkwavu lava ni nga na vone, hi tsralela mabandla ya le Galatiya:
3 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.
4 Kriste a tinyikele hi kola ka swidoho swezru akuva a hi tizrula ka misava leyi ya ku biha* hi ku ya hi ku zrandzra ka Xikwembu Nkulukumba Papayi wezru,
5 lweyi a faneliwaka hi ku dzrumisiwa hi masiku ni masiku. Amen.
6 Swa ni hlamalisa hi ku va mi kahlula mi hambuka* ka lweyi a nga yene lweyi a mi vitaniki hi timpswalu letikulu ta Kriste mi landzrela muxaka wun’wana wa madzrungula lamanene.
7 A hi leswaku ko va ni madzrungula man’wana lamanene; kambe ku ni lava va djulaka ku mi hambukisa hi ku soholota madzrungula lamanene mayelanu na Kriste.
8 Kambe nambiloko mun’we kwezru kumbe ntsrumi ya kukazri ya le tilweni a ngo txhuka a mi zrezrela madzrungula lamanene ya ku hambana ni lawa hi mi zrezreliki wone, a a zrukiwi.
9 Hi lani hi hlayiki ha kone a ku sunguleni, ni tlhela ni phindha: Mun’wana ni mun’wana lweyi a mi zrezrelaka madzrungula lamanene ya ku hambana ni lawa mi ma yamukeliki, a a zrukiwi.
10 Kasi i mani lweyi nakunene ni zamaka ku nyonxisa yene? I vhanu kumbe i Xikwembu Nkulukumba? Loko a li leswaku ni zama ku nyonxisa vhanu, a ni nandzra wa Kriste.
11 Hikusa vamakwezru, ni djula mi swi tiva leswaku a madzrungula lamanene lawa ni mi zrezreliki wone a ma pfi ka vhanu;
12 hikusa a ni ma yamukelanga ka vhanu, nakone a hi vhanu lava va ni dondzrisiki wone, kambe ne pfuleteliwa* wone ha Yesu Kriste.
13 Nakunene, mi swi twile leswi a ni hanyisa xiswone khale na na ha li ka wukhongoti bya Xiyuda, leswaku a ni tsrhamela ku xanisa bandla dzra Xikwembu Nkulukumba hi ndlela ya nsele ni tlhela ni dzri hangalasa;
14 ni leswaku a ni yentxa nhluvuku lowukulu a wukhongotini bya Xiyuda ku tlula vhanu vanyingi va ntanga yanga a tikweni dzranga, swanga hi leswi a ni wu hisekela ngopfu swinene a ntumbuluku wa vapapayi.
15 Kambe nkama lowu Xikwembu Nkulukumba, lweyi a yentxiki leswaku ni pswaliwa nakone a ni vitaniki hi timpswalu take letikulu, a voniki swi li swinene
16 kuva a tizrisa mine, akuva ni zrezrela vhanu va matiko man’wana madzrungula lamanene leswaku va kota ku tiva n’wanake, a ni tekelanga ku djuletela mpfunu wa mhunu;*
17 nambi ku tlhantukela a Yerusalema ni yela lava viki vapostola na mine ni nge si va mupostola, kambe ni ye Arabiya ni gama ni tlhelela a Damaska.
18 Kutani ntsrhaku ka malembe mazrazru ni tlhantukele a Yerusalema ni ya pfuxela Khefasi,* nakone ni tsrhame na yene ku dzringana 15 wa masiku.
19 Kambe a vapostola lavan’wana a ni va vonanga, ne vona ntsena Yakobe makwavu wa Hosi.
20 Kutani mayelanu ni leswi ni mi tsralelaka swone, na mi tiyisekisa a mahlweni ka Xikwembu Nkulukumba leswaku a ni hembi.
21 Ntsrhaku ka leswo, ni ye migangeni ya Siriya ni ya le Kilikiya.
22 Kambe a mabandla ya Kriste ya le Yudeya a ma ngi ngi sama ma ni vona.
23 Ntsena a ma tsrhamela ku twa swaku: “Wanuna lweyi khale a a hi xanisa ni ku hangalasa mabandla* swoswi a zrezra madzrungula lamanene.”
24 Xileswo va sungule ku dzrumisa Xikwembu Nkulukumba hi mhaka yanga.
Tintlhamuxelo ta le hansi
^ Kumbe: “ka xiyimu lexi xa ku biha xa misava; nguva leyi ya ku biha”. Vona Ntlhamuxelo Wa Mazritu.
^ Kumbe: “mi kahlula mi susiwa”.
^ Kumbe: “tlhamuxeliwa”.
^ Hi ku kongoma: “wa nyama ni ngati”.
^ Lweyi a tlhelaka a vitaniwa Petro.
^ Hi ku kongoma: “lipfumelo”.
