Papela ledzri yaka ka Vagalatiya 6:1-18
6 Vamakwezru, nambiloko mhunu a huma ndleleni na a nga swi xiyi, n’wine vakriste lava wupfiki zamani ku wololoxa mhunu yelweyo hi moya wa ku zrula. Kambe tivonelani, akuva na n’wine mi nga txhuki mi dzringiwa.
2 Yanani mahlweni mi zrwalelana mintsrhwalu, hi ndlela leyo mi ta va na mi yingiseta nawu wa Kriste.
3 Hikusa loko mhunu a pimisa leswaku i wa lisima nakasi a hi wa ntxhumu, o tikanganyisa.
4 Kambe mun’wana ni mun’wana a a kambele mintizro yake, xileswo a ta nyonxa hi mintizro yake, na a nga tipimanisi ni vhanu van’wana.
5 Hikusa mun’wana ni mun’wana a ta zrwala ntsrhwalu wake.*
6 Handle ka leswo, mun’wana ni mun’wana lweyi a dondzrisiwaka zritu* a a yavelani mintxhumu hinkwayu leyinene ni lweyi a mu dondzrisaka.
7 Mi nga tihembeli: Xikwembu Nkulukumba a nge kanganyisiwi. Hikusa lexi mhunu a xi byalaka, a ta tsrhovela xolexo.
8 Hikusa lweyi a byalaka hi ku landzra ku navela ka mizri wake lowu nga ni xidoho a ta tsrhovela lifu swanga bindzru dzra ku navela koloko, kambe lweyi a byalaka hi ku landzra moya wa Xikwembu Nkulukumba a ta tsrhovela wutomi lebyi nga helikiki swanga bindzru dzra moya wa Xikwembu Nkulukumba.
9 Hi nga godoleni ku yentxa leswinene, hikusa hi ta tsrhovela hi nkama wa kone loko hi nga godoli.*
10 Kutani, na ha ha pfulekeliwe hi mukhandlu, a hi va yentxeleni leswinene vhanu hinkwavu, kambe ngopfungopfu lava nga na hine lipfumelweni.
11 Vonani ku kula ka maletra ya papela ledzri ni mi tsraleliki dzrone hi voko dzranga.
12 Hinkwavu lava djulaka ku nyonxeliwa hi vhanu,* hi lava va dzringisaka ku mi hlohlotela ku soka, va yentxa leswo ntsena akuva va nga ti xanisiwa hi mhaka ya mhandzri ya nxanisa* ya Kriste.
13 Hikusa nambi lava sokaka a va wu landzri Nawu kambe vo djula kuva mi sokisiwa akuva va ta kota ku tikhuza hi kola kwenu.*
14 Kambe mine a ni nge ti txhuka ni tikhuza, loko ku nga li ntsena hi mhandzri ya nxanisa* ya Hosi yezru Yesu Kriste. Kwanga a misava yi file* hi kola kwake nakone ka misava mine ni file hi kola kwake.
15 Hikusa a ku soka a hi ka ntxhumu ni ko ku nga soki a hi ka ntxhumu, kambe a xa lisima i ku va Xikwembu Nkulukumba a ku yentxa u va mhunu lwemumpshwa.
16 Hinkwavu lava hanyaka hi ku landzra nawu lowo wa mahanyela, ku nga Israyele wa Xikwembu Nkulukumba, a ku zrula ni timpswalu a swi ve na vone.
17 Ku sukela swoswi ku ya mahlweni ku nga ha vi na lweyi a ni kazrataka, hikusa a mizrini wanga ni ni mintsrhosi leyi kombisaka leswaku ni nandzra wa Yesu.
18 Vamakwezru a timpswalu letikulu ta Hosi yezru Yesu Kriste a ti ve ni moya lowu mi wu kombisaka. Amen.
Tintlhamuxelo ta le hansi
^ Kumbe: “ntsrhwalu wake wa wutiyanguleli”.
^ Kumbe: “a dondzrisiwaka zritu hi nomu”.
^ Hi ku kongoma: “loko hi nga kazrali”.
^ Kumbe: “lava djulaka ku voniwa va li vanene”.
^ Vona Ntlhamuxelo Wa Mazritu.
^ Hi ku kongoma: “hi nyama yenu”.
^ Vona Ntlhamuxelo Wa Mazritu.
^ Kumbe: “yi dlayiwe a mhandzrini ya nxanisa”.
