Papela ledzri yaka ka Vakolosa 4:1-18
4 N’wine vatholi, tizrisanani ni vatizri venu hi ndlela leyinene ni leyi lulamiki, na mi tiva leswaku na n’wine mi ni N’winyi a matilweni.
2 Mi nga tsrhiki ku khongota, hitekani* a mhakeni leyi, mi tlhela mi tlangela.
3 Hi nkama lowu fanaka, na hine hi khongotelelani akuva Xikwembu Nkulukumba a hi pfulela mukhandlu wa ku zrezra zritu ni ku vulavula hi xihundla xa ku xwenga mayelanu na Kriste, lexi ni pfaleliwiki djele hi kola ka xone,
4 ni leswaku ni ta kota ku xi tlhamuxela hi ndlela leyinene hi lani ni fanelaka ku swi yentxa ha kone.
5 Yanani mahlweni mi hanya hi wutlhazri loko mi tizrisana ni lava kalaka va nga li swizro swa bandla, mi wu tizrisa hi ndlela leyinene nkama wenu.*
6 Minkama hinkwayu a mazritu yenu a ma vi lawa ma nyonxisaka, lawa ma lungiwiki hi munyu, akuva mi tiva ndlela leyi mi fanelaka ku mu hlamula ha yone mun’wana ni mun’wana.
7 Tikiko makwezru lweyi a zrandzrekaka, mutizri lweyi a dumbekaka tlhelo mutizrikulozri a Hosini, a ta mi byela madzrungula hinkwawu mayelanu na mine.
8 Ni mu zrumela kwenu akuva mi ta tiva ndzrava yezru ni leswaku a ta tiyisa timbilu tenu.
9 A ta na Onezimu, makwezru lweyi a zrandzrekaka nakone a dumbekiki lweyi a pfaka hi halanu kwenu; vone va ta mi byela mintxhumu hinkwayu leyi yentxekaka halenu.
10 Arixtaku xib’otxhwakulozri, awa mi dzrungula, na yene Marka xaka dzra Barnaba awa mi dzrungula (Marka lweyi a mi dzrungulaka hi lweyi hi mi leletiki leswaku loko a tlhasa mu yamukelani ha hombe),
11 na Yesu lweyi a vitaniwaka Yuxtu nakone a nga mun’we wa lava sokiki, na yene awa mi dzrungula. Lava hi vone ntsena ni tizraka na vone a ntizrweni wa Mfumu wa Xikwembu Nkulukumba, nakone va ni tiyisa ngopfu swinene.
12 Epafrasi mutizri wa Kriste Yesu lweyi a pfaka hi halanu kwenu awa mi dzrungula. Minkama hinkwayu awa mi khongotelela hi mbilu hinkwayu, akuva mi va lava wupfiki ni kuva mi tiya ka mintxhumu hinkwayu leyi fambisanaka ni ku zrandzra ka Xikwembu Nkulukumba.
13 Na mi tiyisekisa leswaku a tikazrata ngopfu hi kola kwenu ni hi lava va nga Lawudikiya kun’we ni lava va nga Hiyerapolisi.
14 Luka dokodela lweyi a zrandzrekaka awa mi dzrungula, na yene Demasi awa mi dzrungula.
15 Ni dzrungulelani vamakwezru va le Lawudikiya na makwezru Nimfa kun’we ni bandla ledzri tlhanganaka kaya kwake.
16 Loko mi hetile ku dondzra papela ledzri, dzri zrumelani Lawudikiya akuva na vone va ta dzri dondzra nakone kombelani papela ledzri ni va zrumeliki dzrone akuva na n’wine mi ta dzri dondzra.
17 Nakone byelani Arkipu mi ku: “Yana mahlweni u tizra hi nkhinkhi akuva u hetisisa ntizro lowu u wu yamukeliki ka Hosi.”
18 Mine Pawulo ni mi tsralela madzrungula lawa hi voko dzranga. Mi nga dzrivali leswaku ni le djele. A timpswalu letikulu a ti ve na n’wine.
Tintlhamuxelo ta le hansi
^ Hi ku kongoma: “tsrhamani na mi pfukile”.
^ Hi ku kongoma: “mi tixavela nkama lowunene”.
