Papela ledzri yaka ka Varoma 12:1-21
12 Xileswo vamakwezru, leswi Xikwembu Nkulukumba a mi kombiki timpswalu, ni kombela leswaku mi nyikela mizri wenu swanga xitlhavelo lexi hanyaka, lexi xwengiki ni lexi yamukelekaka ka Xikwembu Nkulukumba, nakone tizrisani wuswikoti byenu bya ku yanakanya nkama lowu mi mu tizrelaka.
2 Tsrhikani ku yetisela vhanu va misava leyi,* kambe txintxani ndlela leyi mi yanakanyaka ha yone, akuva mi ta ku tiva ha hombe ku zrandzra ka Xikwembu Nkulukumba loku nga kunene, loku yamukelekaka ni loku ku hetisekiki.
3 Hikusa hi kola ka timpswalu letikulu leti ni hananiwiki tone, ni byela mun’wana ni mun’wana wenu leswaku a nga yanakanyi leswaku yene i wa lisima ngopfu swinene ku tlula leswi nakunene a nga swone, kambe a yanakanya hi ndlela leyi kombisaka leswaku a ni miyanakanyu leyinene* hi ku ya hi mpimu wa lipfumelo ledzri Xikwembu Nkulukumba a mu hananiki dzrone.*
4 Hikusa ku fana ni leswi mizri wu nga ni swizro swinyingi, kambe xizro xin’wana ni xin’wana xi nga ni ntizro wa xone,
5 hi lani ku fanaka, na hine nambileswi hi nga vanyingi, hi mizri wun’we hikusa hi tlhanganisiwe ka Kriste, kambe mun’wana ni mun’wana wezru i xizro xa mun’wana.
6 Kutani leswi hi nga ni tinyiko leti hambaniki hi ku ya hi timpswalu letikulu leti Xikwembu Nkulukumba a hi kombiki tone, loko hi ni nyiko ya ku profeta, a hi profeteni hi ku ya hi mpimu wa lipfumelo ledzri hi hananiwiki dzrone;
7 kumbe loko hi nyikiwe ntizro wa kukazri, a hi yentxeni hinkwaswu leswi hi nga swi kotaka akuva hi wu hetisisa; kumbe loko nyiko yezru yi li ya ku dondzrisa, a hi yentxeni hinkwaswu leswi hi nga swi kotaka akuva hi dondzrisa;
8 kumbe loko nyiko yezru yi li ya ku kutxa* van’wana, a hi va kutxeni;* lweyi a nga ni moya wa ku hanana,* a a hanani* na a ntsrhunxekile; lweyi a zrangelaka, a a swi yentxi hi nkhinkhi;* lweyi a kombaka van’wana timpswalu, a a swi yentxi hi mbilu yake hinkwayu.
9 A lizrandzru dzrenu a dzri pfumale wukanganyisi. Nyenyani leswi bihiki; mi namazrela leswinene.
10 Zrandzrananani ngopfu swinene ingiki hi loko mi li vamakwavu. Vanani va ku sungula ka ku kombisa van’wana xitxhavu.
11 Vanani ni nkhinkhi,* mi nga lolohwi. Pfumelelani moya wa ku xwenga wu mi yentxa mi hiseka.* Tizrelani Yehovha hi timbilu tenu hinkwatu.
12 Nyonxani hi dumbo ledzri mi nga na dzrone. Mi tiyisela loko mi kumana ni swikazratu. Mi nga tsrhiki ku khongota.
13 Yavelanani ni vamakwenu* leswi va swi pfumalaka. Djuletelani tindlela ta ku kombisa malwandla.
14 Tamani mi va kombelela matovoko lava mi xanisaka; mi nga va zruki.
15 Nyonxani ni lava va nyonxaka, mi dzrila ni lava va dzrilaka.
16 Zron’wekelani van’wana hi ndlela leyi mi tizron’wekelaka ha yone; mi nga tikulisi,* kambe titsrongahatani. Mi nga tibyeli leswaku mi tlhazrihile ku tlula van’wana.
17 Mi nga tlheliseli wubihi hi wubihi. Yentxani mintxhumu leyinene leyi vhanu hinkwavu va yi vonaka yi li yinene.
18 Yentxani hinkwaswu leswi mi nga swi kotaka akuva mi va ni ku zrula ni vhanu hinkwavu.
19 Vazrandzriwa, mi nga dzrihiseli, kambe tsrhikani Xikwembu Nkulukumba a kombisa mahlundzru yake ka lava yentxaka leswi bihiki; hikusa ku tsraliwe leswi: “‘A ku dzrihisela i kwanga, ni ta va hakelisa’, ku hlaya Yehovha.”
20 Kambe “loko nala waku a ni ndlala, mu phameli; loko a ni tozra, mu nyiki swa ku nwa; hikusa hi ku yentxa leswo u nga ha mu hlamalisa ni ku mu khumba mbilu”.*
21 Mi nga pfumeleli ku hluliwa hi leswi bihiki, kambe tamani mi hlula leswi bihiki hi leswinene.
Tintlhamuxelo ta le hansi
^ Kumbe: “xiyimu lexi xa misava; nguva leyi”. Vona Ntlhamuxelo Wa Mazritu.
^ Kumbe: “leyi hlutekiki”.
^ Kumbe: “a mu yaveliki wone”.
^ Kumbe: “ku tsratsriya”.
^ Kumbe: “a hi va tsratsriyeni”.
^ Kumbe: “wa ku yavela”.
^ Kumbe: “a a yaveli”.
^ Kumbe: “hi ku hiseka”.
^ Kumbe: “Hisekani”.
^ Hi ku kongoma: “Pfuzrani hi le moyeni”.
^ Hi ku kongoma: “vaxwengi”.
^ Kumbe: “mi nga beki miyanakanyu yenu ka mintxhumu leyikulu”.
^ Hi ku kongoma: “u va na u mu tlhanteka makhala lama pfuzraka a nhlokweni yake”.
