Papela ledzri yaka ka Varoma 2:1-29
2 Kutani swi nge na mhaka leswaku hi wene mani, a wu nge swi koti ku tiyimelela loko a li leswaku u yavanyisa van’wana hi leswi na wene u swi yentxaka, hikusa loko u va yavanyisa wo tiyavanyisa na wene.
2 Kambe ha swi tiva leswaku loko Xikwembu Nkulukumba a yavanyisa vhanu lava yentxaka mintxhumu ya ku fana ni leyi, a wuyavanyisi byake byi fambisana ni ntiyiso.
3 Wene u yavanyisaka vambeni hi mintxhumu leyi na wene u yi yentxaka, xana u pimisa leswaku u ta huluka wuyavanyisi bya Xikwembu Nkulukumba?
4 Kumbe wo dzrela ku tala ka timpswalu take, ku tiyisela* ni ku lehisa kwake mbilu? Xana a wu swi tivi leswaku hi kola ka wunene byake Xikwembu Nkulukumba a ku lehisela mbilu leswaku a ku pfuna kuva u tisola?
5 Kambe loko u tiwomisa nhloko u nga djuli ku tisola mbilwini yaku, Xikwembu Nkulukumba a ta ku khatisa hi siku dzra ku hlundzruka kwake ni ku kombisa wuyavanyisi byake bya ku lulama.
6 Nakone a ta hakela mun’wana ni mun’wana hi ku ya hi mintizro yake:
7 Lava yaka mahlweni* va yentxa leswinene, na va djuletela ku phatima, ku dzrumisiwa ni ku kala va nga fi, a ta va nyika wutomi lebyi nga helikiki;
8 nambitanu, lava zrandzraka timholova ni lava kalaka va nga wu yingiseti ntiyiso, kambe va yingiseta mintxhumu leyi kalaka yi nga lulamanga, va ta hlundzrukeliwa va tlhela va khatisiwa.
9 Hinkwavu lava yentxaka swa ku biha va ta va ni mahlomulo, ku sungula hi Muyuda ku landzrela Mugriki;
10 kambe hinkwavu lava yentxaka leswinene, va ta kuma ku phatima, ku dzrumisiwa ni ku zrula, ku sungula hi Muyuda ku landzrela Mugriki.
11 Hikusa Xikwembu Nkulukumba a nga na xihlawuhlawu.
12 Hikusa hinkwavu lava dohiki na va nga wu tivi nawu, va ta fa na va nga na nawu; kambe hinkwavu lava dohiki na va wu tiva nawu, va ta yavanyisiwa hi nawu wolowo.
13 Hikusa lava lulamiki mahlweni ka Xikwembu Nkulukumba, a hi lava va tivaka nawu, kambe hi lava va wu landzraka.
14 Hikusa loko vhanu va matiko lava kalaka va nga na nawu va swi yentxa hi ntumbuluku leswi nga nawini, nambileswi va kalaka va nga na nawu, vhanu lava va ni nawu a ndzreni kwavu.
15 Va tiyisekisa leswaku leswi nawu wu swi dondzrisaka swi tsraliwile a timbilwini tavu, ni mapfalu yavu ma pfumelelana na vone,* a miyanakanyu yavu ya va ba kumbe yi va yimelela.
16 Leswo swi ta yentxeka hi siku ledzri Xikwembu Nkulukumba hi ku tizrisa Kriste Yesu, a taka yavanyisa mintxhumu leyi vhanu va yi fihliki, hi ku ya hi madzrungula lamanene lawa ni ma zrezraka.
17 Loko u tivitana Muyuda nakone u dumba nawu u tlhela u tibyela hi ku va ni wuxaka na Xikwembu Nkulukumba,
18 loko u tiva ku zrandzra ka Xikwembu Nkulukumba nakone u pfumele mintxhumu leyi yi nga yinene hi leswi u dondzrisiwiki hi Nawu wa Moxe,
19 nakone u kholwiseka leswaku u mukongomisi wa lava fiki matihlo, ni livaningu dzra lava nga munyameni,
20 mululamisi wa swiphunta ni mudondzrisi wa vatsrongwana, hi leswi u twisisaka tidondzro ta masungulo ni ntiyiso lowu nga Nawini;
21 kutani wene u dondzrisaka vambeni, ha yini u nga tidondzrisi? Wene u zrezraka u ku: “U nga yivi.” Wa yiva ke?
22 Wene u liki: “U nga yentxi wumbuye”, wa yentxa wumbuye ke? Wene u nyenyaka swithombe, xana wa yiva a matempeleni?
23 Wene u tibyelaka leswaku u tiva nawu wa Xikwembu Nkulukumba, xana wa mu danisa hi ku tlula Nawu?
24 Hikusa hi lani swi tsraliwiki ha kone: “A vito dzra Xikwembu Nkulukumba dzra zrukiwa makazri ka matiko hi mhaka yenu.”
25 Nakunene a ku soka ka pfuna loko a li leswaku wa wu yingiseta nawu; kambe loko u tlula nawu, a ku soka kwaku ku fana ni loko u ngi ngi sama u soka.
26 Kambe loko mhunu lweyi a kalaka a nga sokanga a landzrelelisa swileleto swa Nawu swa ku lulama, nambileswi a kalaka a nga sokanga a mhunu yelweyo a ta voniwa a li mhunu lweyi a sokiki, a hi swone ke?
27 Nakone loko mhunu lweyi a kalaka a nga sokanga hi le nyameni a yingiseta Nawu, a ta ku yavanyisa wene u tlulaka nawu nambileswi u nga ni nawu lowu tsraliwiki u tlhela u soka.
28 Hikusa ku va Muyuda wa ha kakunene a hi leswi u nga xiswone hi le handle, nakone a ku soka ka kakunene a hi loku yentxiwaka nyameni.
29 Kambe ku va Muyuda wa kakunene hi leswi mhunu a nga xiswone hi le ndzreni, nakone a ku soka kwake i ka le mbilwini hi moya lowa ku xwenga ku nga li hi ku landzrelela leswi tsraliwiki Nawini. Mhunu yelweyo a kulungeliwa hi Xikwembu Nkulukumba ku nga li hi vhanu.
Tintlhamuxelo ta le hansi
^ Kumbe: “lilondzro”.
^ Hi ku kongoma: “Lava tiyiselaka”.
^ Hi ku kongoma: “ma nyikela wumboni”.
