Papela ledzri yaka ka Varoma 6:1-23
6 Xana leswo swi djula ku hlaya leswaku hi fanela ku tama hi doha akuva hi ta kota ku yamukela timpswalu letikulu ta Xikwembu Nkulukumba na ti li tinyingi?
2 Nakunene a swi hlayi swone! Leswi hi ntsrhunxiwiki ka xidoho, ha yini a ha ha ta ya mahlweni hi hanya ha xone?
3 Kumbe mo kala mi nga swi tivi leswaku hinkwezru hi babatisiwiki ka Kriste Yesu hi babatisiwe ka lifu dzrake?
4 Xileswo hi lahliwe kun’we na yene hi ku va hi babatisiwe ka lifu dzrake, akuva ku fana ni leswi Kriste a pfuxiwiki ku feni hi kola ka ntamu lowukulu wa Papayi, na hine hi kota ku hanya wutomi lebyimpshwa swoswi.
5 Leswi hi tlhanganisiwiki na yene hi lifu dzra ku fana ni dzrake, nakunene hi ta tlhela hi tlhanganisiwa na yene hi ku pfuxiwa ku feni hi ndlela ya ku fana ni leyi yene a pfuxiwiki ha yone.
6 Hikusa ha swi tiva leswaku a wumhunu byezru bya khale byi gongondzreliwe mhandzrini kun’we na yene, akuva a ntamu wa xidoho wu susiwa a mizrini wezru, ku yentxela leswaku hi nga ha tami hi va swikazrawa swa xidoho.
7 Hikusa mhunu lweyi a fiki a xidoho xake xi dzrivaleliwile.*
8 Handle ka leswo, leswi hi fiki na Kriste, ha kholwa leswaku hi ta tlhela hi hanya na yene.
9 Hikusa ha swi tiva leswaku leswi Kriste a pfuxiwiki ku feni, a nge he tlheli a fa, a lifu a dzra ha na ntamu kwake.*
10 Hikusa a lifu ledzri a fiki dzrone, a fe kan’we swi helela kolanu akuva a susa xidoho, kambe a wutomi lebyi a byi hanyaka swoswi, a hanyela ku yentxa ku zrandzra ka Xikwembu Nkulukumba.
11 Hi lani ku fanaka, na n’wine tivonani na mi li lava fiki hi tlhelo dzra xidoho, kambe mi li lava hanyaka akuva mi yentxa ku zrandzra ka Xikwembu Nkulukumba swanga valandzreli va Kriste Yesu.
12 Xileswo mi nga pfumeleleni xidoho xi tama xi lawula ndlela leyi mi hanyaka ha yone,* mi nga yingiseteni ku navela ka mizri wenu lowu faka;
13 nambi ku tama mi nyikela mizri wenu* ka xidoho akuva wu va xitizro xa ku yentxa leswi bihiki,* kambe tinyikelani ka Xikwembu Nkulukumba swanga vhanu lava a va file kambe swoswi va hanyaka, nakone nyikelani mizri wenu ka Xikwembu Nkulukumba swanga xitizro xa ku yentxa leswinene.*
14 Hikusa a xidoho a xi fanelanga xi mi fuma swanga hi leswi mi nga liki hansi ka nawu kambe mi nga ku tikholiseni hi timpswalu letikulu ta Xikwembu Nkulukumba.
15 Xana kuva hi nga li hansi ka nawu swi djula ku hlaya leswaku hi fanela ku doha hi leswi hi nga ku tikholiseni hi timpswalu letikulu ta Xikwembu Nkulukumba? Nakunene a swi hlayi swone!
16 Xana a mi swi tivi leswaku loko mi tinyikela akuva mi yingiseta mhunu wa kukazri swanga swikazrawa swake, mi tiyentxa swikazrawa swa mhunu yelweyo ke? Xileswo loko mi li swikazrawa swa xidoho, xi ta mi yisa ku feni, kambe loko mi li swikazrawa swa Xikwembu Nkulukumba mi tlhela mi mu yingiseta, mi ta va vhanu lava fambaka ku lulameni.
17 Kambe a ku tlangeliwi Xikwembu Nkulukumba hikusa nambileswi a mi li swikazrawa swa xidoho, swoswi mi lava yingisetaka hi timbilu tenu hinkwatu a dondzro leyi mi yi yamukeliki.
18 Ina, leswi mi ntsrhunxiwiki ka xidoho, mi swikazrawa swa leswi lulamiki.
19 Ni vulavula hi ndlela leyi tolovelekiki a vhanwini hi mhaka ya ku kala ku hetiseka kwenu. Swanga hi leswi mi nyikeliki swizro swenu akuva swi va swikazrawa swa leswi kalaka swi nga basanga nakone swi lwisanaka ni nawu, swoswi nyikelani swizro swenu akuva swi va swikazrawa swa leswi lulamiki swi tlhela swi xwenga.
20 Hikusa na ma ha li swikazrawa swa xidoho, a ku lulama a ku nga mi lawuli.
21 A wu li wini ntsrhovelo wa mahanyela yenu a nkameni wolowo? A mi tsrhovela mintxhumu leyi swoswi mi nga ni tingana ha yone. Hikusa a mintxhumu yoleyo yi yisa ku feni.
22 Nambitanu, swoswi mi ntsrhunxiwiki ka xidoho nakone mi nga swikazrawa swa Xikwembu Nkulukumba, a ntsrhovelo wenu wu xwengile nakone wone wu yisa wuton’wini lebyi nga helikiki.
23 Hikusa a hakelo ledzri tisiwaka hi xidoho i lifu, kambe a nyiko leyi pfaka ka Xikwembu Nkulukumba i wutomi lebyi nga helikiki ha Kriste Yesu Hosi yezru.
Tintlhamuxelo ta le hansi
^ Kumbe: “a ntsrhunxiwile ka xidoho xake”.
^ Hi ku kongoma: “a dzra ha mu fumi”.
^ Hi ku kongoma: “xi tama xi mi fuma”.
^ Hi ku kongoma: “swizro swenu”.
^ Hi ku kongoma: “swanga tlhazri dzra leswi swi kalaka swi nga lulamanga”.
^ Hi ku kongoma: “swanga tlhazri dzra leswi lulamiki”.
