Yonasi 1:1-17
1 Yehovha a byela Yonasi* n’wana wa Amitayi mazritu lawa:
2 “Famba Ninivha, doropa ledzrikulu, u ya huwelela ku yavanyisiwa ka dzrone, hikusa ni vona wubihi byavu.”
3 Kambe Yonasi a teka xiboho xa ku tsrutsruma Yehovha a ya Taraxixi; a fulamela a ya Yopa a va a kuma boti ledzri a dzri ya Taraxixi. Kutani a hakela a va a khwela botini leswaku a famba ni lava a va li botini ledzri ya ka Taraxixi akuva a tsrutsruma Yehovha.
4 Hiloko Yehovha a zrumela moya lowukulu a lwandle, kutani a lwandle, ku va ni xidzedze lexikulu lakakuva a boti dzri djula ku mbombomela.
5 A vafambisi va boti va txhava ngopfu swinene lakakuva mun’wana ni mun’wana a sungula ku kombela mpfunu ka xikwembu xake. Kutani va sungula ku teka mintsrhwalu leyi a yi li botini va yi txukumetela lwandle akuva dzri nga ha bindzriwi. Kambe Yonasi a a nghene ndzreni ka boti lani a tlhasiki a yetlela a va a kuma wuzrongo lebyikulu.
6 A muzrangeli wa vafambisi va boti a mu tsrhindzrekelela a va a mu byela a ku: “U yetlelela yini? Pfuka! U kombela mpfunu ka xikwembu xaku! Kumbexana Xikwembu Nkulukumba wa ntiyiso a ta kombisa leswaku a ni mhaka na hine kutani hi nga fi.”
7 Kutani va byelana va ku: “Tanani, a hi hambeni mpshwampshwa,* akuva hi tiva leswaku i mani lweyi a vangaka khombo ledzri.” Xileswo va hamba mpshwampshwa, yi va yi kombetela ka Yonasi.
8 Va mu vutisa va ku: “Hi kombela u hi byela, i mani lweyi a hi vangelaka khombo ledzri? Hi wini ntizro waku, nakone u pfa kwini? U wa tiko dzrini, nakone u wa lixaka dzrini?”
9 A va hlamula a ku: “Ni Muheberu nakone ni gandzrela Yehovha Xikwembu Nkulukumba wa le matilweni, Yene lweyi a hambiki lwandle ni misava.”
10 Kutani a vafambisi va boti va ya va txhava ngopfu swinene, va va va mu vutisa va ku: “We yentxa yini?” (A vafambisi va boti va swi tivile leswaku a a tsrutsruma Yehovha, hikusa a a va byelile.)
11 Kutani va mu vutisa va ku: “Hi fanela ku yentxa yini akuva lwandle dzri zrula?” Hikusa a xidzedze a xi ya xi pfisa.
12 A va hlamula a ku: “Ni tlakulani mi ni txukumetela lwandle, kutani lwandle dzri ta zrula; hikusa na swi tiva leswaku hi mine ni mi vangelaka xidzedze lexi lexikulu.”
13 Xileswo, a vafambisi va boti va dzri weta hi ntamu wavu hinkwawu* akuva va dzri yisa a nkingeni wa lwandle, kambe a va swi kotanga, hikusa a xidzedze a xi ya xi pfisa ngopfu swinene.
14 Hiloko va kombela ka Yehovha va ku: “We Yehovha, ha ku kombela, u nga hi tsrhiki hi fa hi mhaka wanuna lweyi! U nga hi nyiki nandzru hi kola ka ku halata ngati leyi nga liki na nadzru, hikusa u yentxe hi ku ya hi ku zrandzra kwaku We Yehovha!”
15 Hiloko va tlakula Yonasi va mu txukumetela lwandle; kutani a lwandle dzri zrula.
16 A vafambisi va boti va txhava Yehovha ngopfu swinene, va va va nyikela gandzrelo ka Yehovha ni ku mu hambela swihlambanyu.
17 Kutani Yehovha a zrumela hlampfi leyikulu akuva yi minta Yonasi, a va Yonasi a tsrhama khuzrini dzra hlampfi ku dzringana masiku mazrazru, wusiku ni nhlikanhi.
Tintlhamuxelo ta le hansi
^ Leswi tlhamuxelaka leswaku “tuva”.
^ Kumbe: “wuhlolotwana”.
^ Kumbe: “va zama ku tsremakanya xidzedze”.
