Yehovha a vona xiboho xa wukati xi li xa lisima. A hlaye leswaku nuna ni nsati va fanela ku namazrelana. (Mt 19:5, 6) Ku ni swikombiso swinyingi swa vatekani lava nyonxiki makazri ka vhanu va Xikwembu Nkulukumba. Nambitanu, a ku na wukati lebyi hetisekiki. Ku nga ha va ni swikazratu. A hi fanelanga hi va ni vonela dzra misava leyi, dzra leswaku a ku tsravukana ni ku dlaya wukati hi wone ntlhantlhu wa swikazratu a wukatini. Xana vakriste va nga byi sizrelelisa kuyini wukati byavu?

Vona 5 wa magwansu lama pfunaka.

1. Sizrelelela mbilu yaku hi ku tingawula mintxhumu ya ku fana ni ku tlanga hi ku gangisana ni swihungatiso leswi kalaka swi nga basanga, ku nga leswi nga dlayaka wukati byaku.​—Mt 5:28; 2Pe 2:14.

2. Tiyisa wuxaka byaku na Xikwembu Nkulukumba, ni ku tama u yentxa leswi mu nyonxisaka a wukatini byaku.​—Ps 97:10.

3. Tama u yambala wumhunu lebyimpswha, ni ku yentxa mintxhumunyana yitsrongo ya wunene leyi taka yentxa wukati byaku byi nyonxisa.​—Kl 3:8-10, 12-14.

4. Kombisa xihluwa ni ku bulisana hi ndlela leyinene.​—Kl 4:6.

5. Vatekani va fanela ku kombisana mintlhaveko ni lizrandzru.​—1Ko 7:3, 4; 10:24.

Loko vakriste va hlonipha wukati, va va na va hlonipha Yehovha musunguli wa byone.

HLALELANI VÍDEO LEDZRI LIKI HI FANELA KU ‘TSRUTSRUMA HI KU TIYISELA’​—LANDZRELELA MILAWU YA MPALISANU, MI GAMA MI HLAMULA SWIVUTISO LESWI LANDZRELAKA:

• Hi swini swikazratu leswi nga ha humelelaka nambi loko wukati byi sungule hi ndlela leyinene?

• Hi yini minsinya ya milawu ya Bibele leyi nga pfunaka lava titwaka na va nga nyonxanga a wukatini byavu?

• Hi yini milawu leyi Yehovha a yi bekeliki vatekani?

• I yini leswi vatekani va faneleka ku swi yentxa akuva wukati byavu byi nyonxisa?