Hi tizrisa ntamu wezru hi wutlhazri loko hi tibekela makungu ya moya. (1Ko 9:26) Leswi xiyimu xa misava leyi xi nga kusuhi ni ku hela, ku tibekela makungu ya moya swi ta hi pfuna ku tizrisa nkama wezru hi wutlhazri. (Ef 5:15, 16) Swi ngo yini loko mo bula hi makungu lawa mi navelaka ku ma tlhasela ka lembe ledzri taka dzra ntizro a wugandzrelini byenu bya ndangu? Ka Xibukwana lexi Xa Ntlhanganu, ku ni tinhlokomhaka leti mi nga ti kambisisaka hi xikhongoto akuva ti mi pfuna ku tibekela makungu.—Yk 1:5.

Hi xikombiso, xana swi nga koteka kuva xizro xin’wana ni xin’wana a ndangwini xi yentxa leswi xi nga swi kotaka akuva xi seketela nambi ko va mhunu mun’we kuva a tizra swanga phayona dzra nkama hinkwawu? Loko u vona leswaku a wu nge ti swi kota ku tlhanganisa mawora, bulisana ni maphayona lama nga ka xiyimu lexi fanaka ni xaku. (Pr 15:22) Nakone mi nga tlhela mi bulisana ni phayona dzrin’we ka wugandzreli byenu bya ndangu, mi va mi hamba xiyimiso lexi taka mi pfuna ku tlhasela kungu ledzro. Loko a li leswaku u sama u va phayona, kambela swiyimu swaku leswaku xana swi nga ku pfumelela kuva u tlhela u va phayona swoswi.

Xana swi nga koteka kuva van’we a ndangwini va teka wuphayona bya ku pfunisa hweti yin’we kumbe ku tlula? Loko a li leswaku a we he na ntamu kumbe wuswikoti bya ku heta nkama wunyingi a nsin’wini, u nga swi kota ku teka wuphayona bya ku pfunisa loko u kumeka nsin’wini siku ni siku na u heta nkama wutsrongo. Loko a li leswaku u ni nkama wutsrongo wa ku ya nsin’wini makazri ka vhiki hi leswi u tizraka siku hinkwadzru kumbe hi leswi u yaka xikole, u nga ha hlawula ku teka wuphayona ka tiwheti leti nga ni maferiyadu kumbe leti nga ni 5 wa ku hela ka vhiki. Ka kalendariyu, tsralani xiyimiso ka tiwheti leti mi taka teka wuphayona bya ku pfunisa hi tone.—Pr 21:5.

HLALELANI VHIDIYU LEDZRI LIKI VANA NI XIXIXI . . . PHAYONA, MI GAMA MI HLAMULA XIVUTISO LEXI:

• Xana xikombiso xa makwezru Aamand xi hi dondzrisa yini mayelanu ni lizrandzru dzra Yehovha ni ndlela leyi a zron’wekaka ha yone hi lava tikazratelaka ku tizra swanga maphayona?